އިންތިޚާބުގެ ނަތީޖާއާއެކު ރައީސް މުއިއްޒު މިހާރުން މިހާރަށް އިސްލާހުވެވަޑައިގެން، މައިކްރޯ މެނޭޖްކުރުން ހުއްޓާލަން ޖެހޭ: މެންބަރު މީކާއީލް
އޭޕްރީލް މަހު ބޭއްވި އިންތިޚާބުތަކުގައި ސަރުކާރުން ނުފޫޒު ފޯރުވައި ރިޝްވަތު ބެހި ނަމަވެސް، ނަތީޖާއިން ފެނުނީ ރައްޔިތުން ރައީސް މުއިއްޒަށް ނޫނެކޭ ބުނިތަން ކަމަށް މެންބަރު މީކާއީލް ވިދާޅުވި. ސަރުކާރުގެ ސިޔާސީ މަގާމުތަކުގެ އަދަދު ހާމަކުރުމަށާއި މައިކްރޯ މެނޭޖްކުރުން ހުއްޓާލުމަށް ގޮވާލައްވަމުން، ކެބިނެޓަށް ގެނައި ބަދަލަކީ ހަރަދު ކުޑަކުރުމުގެ ބަދަލުގައި ރައްޔިތުންގެ ލޮލުގައި އެޅުވި އަނދުނެއްގެ ގޮތުގައި އޭނާ ސިފަކުރެއްވި. މީގެ އިތުރުން، އެކި ކުންފުނިތަކުން ބޭކާރު ވަޒީފާ ދިނުން ހުއްޓާލައި، ދައުލަތުގެ ހިންގުން އިސްލާހު ކުރުމަށް މެންބަރު މީކާއީލް ބާރުއެޅުއްވި.
ރައްޔިތުންނާއެކު ކުރިއަށް - ހަފުތާ 104 ފާހަގަކުރުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވާހަކަ ދައްކަވަނީ. | ރައީސް އޮފީސް
އޭޕްރީލް މަހުގެ 4 ވަނަ ދުވަހު ބޭއްވި ތިން އިންތިޚާބާ ގުޅިގެން ސަރުކާރުން ރިޝްވަތު އޮއްސި ކަމަށާއި، އިންތިޚާބުގެ ނަތީޖާއާއެކު ރައީސް ޑރ. މުހައްމަދު މުއިއްޒު މިހާރުން މިހާރަށް އިސްލާހުވެވަޑައިގެން، މައިކްރޯ މެނޭޖްކުރުން ހުއްޓާލަން ޖެހޭ ކަމަށް ގަލޮޅު ދެކުނު ދާއިރާގެ މެމްބަރު މިކާއިލް އަހުމަދު ނަސީމް ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު މީކާއީލް ވިދާޅުވީ، ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބަށް ސަރުކާރުން ވަރަށް ބޮޑަށް ނުފޫޒު ފޯރުވި ކަމަށާއި، މުޅި މާލެސިޓީއަށް ވެސް ރިޝްވަތު އޮއްސި ކަމަށެވެ.
ނަމަވެސް އިންތިޚާބުގެ ނަތީޖާއެކު ރައީސް މުއިއްޒަށް ރައްޔިތުން ނޫނެކޭ ބުނެފައިވާކަން ހާމަވެފައިވާ ކަމަށާއި، އެކަން އެމަނިކުފާނު ގަބޫލުފުޅުކޮށް، އިސްލާހުވެވަޑައިގަންނަވަން ޖެހޭ ކަމަށް މެންބަރު މީކާއީލް ވިދާޅުވި އެވެ. އަދި ވިދާޅުވީ ރައްޔިތުންނަށްޓަކައި މިސަރުކާރުގެ ސިޔާސީ މަގާމުތަކުގެ ޖުމްލަ އަދަދު ވެސް ރައީސް މުއިއްޒު ހާމަކުރައްވަން ޖެހޭ ކަމަށެވެ.
ކޮންއެއްޗެއްތޯ މާލޭގައި ނޯއްސަނީ؟ ވަޒީފާ ބެއްސެވި އިނގޭތޯ. ގަލޮޅު ދެކުނު ދާއިރާގެ ސިނަމާލެ ފްލެޓްތަކަށް ރިޝްވަތު ބައްސަވަން މަސައްކަތް ކުރެއްވި. އެއް ލައްކަ ރުފިޔާ ކޮންމެ ފްލެޓެއްގެ އެކައުންޓަށް އިނގޭތޯ. އެވަރުންވެސް ވޯޓެއް ނުދެއްވިއޭ. ބޮޑުތަނުން ބައްޔޭވީ. އެހެންވީމާ، ރައީސް މުއިއްޒަށް އެނގިވަޑައިގަންނަވަން އެބަޖެހޭ. ފަހުން ވާން އެބަޖެހޭ. ވިސްނިވަޑައިގަންނަވަން އެބަޖެހޭ. ރައްޔިތުން ނޫނެކޭ މި ބުނަނީ އެ މަނިކުފާނަށްކަން އިނގޭތޯ. އިތުރު މީހަކަށްނޫން، ވަޒީރަކަށް ނޫން، ހައިދަރަކަށް ނޫން، ރައްޔިތުން ނޫނެކޭ މި ބުނީ މުއިއްޒަށް. އެހެންވީމާ، މުއިއްޒު އިސްލާހުވާންވީ އިނގޭތޯ. މުއިއްޒު މައިކްރޯ މެނޭޖްކުރުން ހުއްޓާލަންވީ. މުއިއްޒު ސިޔާސީ މަގާމުތަކުގެ މީހުންގެ އަދަދު ހާމަކުރަންވީ.ގަލޮޅު ދެކުނު ދާއިރާގެ މެމްބަރު މިކާއިލް އަހުމަދު ނަސީމް
އިންތިޚާބުގެ ނަތީޖާއަށްފަހު ކުއްލިއަކަށް ރައީސް މުއިއްޒުގެ ކެބިނެޓަށް ގެންނެވި ބަދަލަށް އިޝާރާތް ކުރައްވައި މެންބަރު މީކާއީލް ވިދާޅުވީ އެއީ ރައްޔިތުންގެ ލޮލުގައި އެޅުވި އަނދުނެއް ކަމަށާއި، 18 މިނިސްޓްރީން 15 މިނިސްޓްރީއަށް ކުޑަ ކުރި ނަމަވެސް ދައުލަތުގެ ހަރަދު ކުޑަވެދާނެ ކަމާމެދު ސުވާލު އުފެދޭ ކަމަށެވެ.
މެންބަރު މީކާއީލް ވިދާޅުވީ، މިސަރުކާރުން އެމްއޭސީއެލްއަށް މަސައްކަތެއް ނެތި ގިނަ އަދަދެއް މުވައްޒަފުން ނަގާފައިވާ ކަމަށާއި، އެއްވެސް މަގެއްގެ މަސައްކަތް ކުރިއަށް ނުދާ ރަށްރަށުގައި އާރްޑީސީއަށް 40 ނުވަތަ 50 މީހުންނަށް ވަޒީފާ ދީފައިވާ ކަމަށެވެ. އަދި ރައްޔިތުންގެ ވިންދާ އެއްގޮތަށް ކަންކަން ރަނގަޅު ކުރަން ބޭނުންވާ ކަމަށްވާނަމަ ނުވަތަ މިސަރުކާރުގެ ހެޔޮ ނިޔަތެއް އޮތްނަމަ މުވައްޒަފުންގެ އަދަދު މަދުކޮށް ހާމަކަން ބޮޑު ގޮތެއްގައި މަސައްކަތް ކުރާނެ ކަމަށް މެންބަރު މީކާއީލް ވިދާޅުވި އެވެ.
