ކަށިމިޔަރު ގެ މަސްވެރިކަން ހުއްޓުވަން އަލުން ހުށަހެޅި ދުސްތޫރީ މައްސަލަ ވެސް ބޭރުކޮށްލައިފި

ރާއްޖޭގައި މަނާ ކޮށްފައި އޮތް ކަށި މިޔަރުގެ މަސްވެރިކަން މި ސަރުކާރުން ހުޅުވާލާފައިވާތީ އެކަން ހުއްޓުވުމަށް ހައިކޯޓަށް ހުށަހެޅި ދުސްތޫރީ މައްސަލަ އަނެއްކާ ވެސް ބޭރުކޮށްލައިފި އެވެ. 

ދައުލަތާއި ދެކޮޅަށް މި މައްސަލަ ދުސްތޫރީ މައްސަލައެއްގެ ގޮތުގައި ހުށަހެޅީ ހުމައިދާ އަބްދުއްޣަފޫރު / ހ. ޝޭޑީކޯނަރ އަދި މުހައްމަދު ސިނީން / މ. މާމުލި އެވެ. މި ދެމީހުންނަކީ ވެސް ތިމާވެށި ހިމާޔަތްކުރުމަށް ވަކާލާތުކުރާ ދެ އެކްޓިވިސްޓުންނެވެ. އެންމެ ފުރަތަމަ މި މައްސަލަ ހުށަހެޅީ މިދިޔަ ޑިސެމްބަރު މަހު އެވެ. އެ ފަހަރު ވެސް މައްސަލަ ބޭރުކޮށްލި ނަމަވެސް އަލުން 2026 ފެބްރުއަރީ  2 ވަނަ ދުވަހު މައްސަލަ އަލުން ކޯޓަށް ހުށަހެޅި އެވެ. 

ނަމަވެސް ރަޖިސްޓްރާ ވަނީ އެ މައްސަލަ ބަލައިގަނެވެން ނެތްކަމަށް ބުނެ މައްސަލަ ބޭރުކޮށްލާފަ އެވެ. ބުރާސްފަތި ދުވަހު ރަޖިސްޓްރާ ނިންމި ނިންމުމުގައި ބުނެފައިވަނީ 2025 އޮކްޓޯބަރު 31 ވަނަ ދުވަހު ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ "ދިވެހިރާއްޖޭގެ ކަށިމިޔަރު މަސްވެރިކަން މެނޭޖްކުރުމުގެ ޕްލޭން" އާއި ކަށިމިޔަރުގެ މަސްވެރިކަން ރާވައި ހިންގައި ބެލެހެއްޓުމާ ބެހޭ ގަވާއިދު ދިވެހިރާއްޖޭގެ ގާނޫނުއަސާސީ އާއި މަސްވެރިކަމުގެ ގާނޫނާ ހިލާފުކަމަށް ހުށަހެޅިފައިވާ ދައުވާގެ ސީޣާގައި ބަޔާންކޮށްފައިވީ ނަމަވެސް ދުސްތޫރީ މައްސަލަ ހުށަހަޅާ ފޯމުގެ 5 ވަނަ ނަންބަރުގެ ދަށުން ހިމަނާފައިވާ ގާނޫނުއަސާސީގެ 22 ވަނަ މާއްދާއާއި ހިލާފުވުމާއި މަސްވެރިކަމުގެ ގާނޫނުގެ 5 ވަނަ މާއްދާއާއި މި ދާއިރާއާއި ގުޅިފައިވާ ރާއްޖެއިން ބައިވެރިވެފައިވާ އެކި ބައިނަލްއަގުވާމީ މުއާހަދާތަކާ ހިލާފުވުމާއި ގާނޫނު އަސާސީގެ 268 ވަނަ މާއްދާއާއި މަބްދައުއް ސުމުއްވިއް ދުސްތޫރިއްޔާ އަދި ކުރިއަރާފައިވާ ހިސާބުން ފަހަތަށް ނުދިއުމުގެ ގާނޫނީ އުސޫލުގެ ދަށުން ބަޔާންކޮށްފައިވަ ނުކުތާތަކަށް ބަލާއިރު، ކަށިމިޔަރުގެ މަސްވެރިކަން ރާވައި ހިންގައި ބެލެހެއްޓުމާ ބެހޭ ގަވާއިދު ގާނޫނުއަސާސީ އާއި މަސްވެރިކަމުގެ ގާނޫނާއި ހިލާފުވާކަމަށް ބަޔާންކުރުމަށްފަހު، އެ ޕްލޭނާއި ގަވާއިދު ގާނޫނުއަސާސީ އަދި މަސްވެރިކަމުގެ ގާނޫނާއި ތައާރުޒުވާ ގޮތް ތަފްސީލުކޮށް ސަބަބުތަކާއެކު ބަޔާންކޮށްފައި ނުވާތާ މި މައްސަލަ ކޯޓަށް ބަލައިގަނެވެން ނެތްކަމަށެވެ. 

ރާއްޖޭގައި މަނާ ކޮށްފައި އޮތް ކަށި މިޔަރުގެ މަސްވެރިކަމަށް ސަރުކާރުން ހުޅުވާލާފައިވާ އިރު، އޭގެ ކުޑަ ދުވަސް ކޮޅެއް ފަހުން ކަށި މިޔަރު ހިމެނޭ ގޮތައް 70 ބާވަތެއްގެ މިޔަރާއި މަޑީގެ ބާވަތްތަކުގެ ބައިނަލް އަގްވާމީ ވިޔަފާރި އަށް ހުރަސް އަޅަން ފާސް ކުރުމުގައި ރާއްޖެ އިން ވަނީ ބައިވެރިވެފަ އެވެ.

ކޮންވެންޝަން އޮން އިންޓަރނޭޝަނަލް ޓްރޭޑް އިން އެންޑެންޖާޑް ސްޕީޝީޒް އޮފް ވައިލްޑް ފައުނާ އެންޑް ފްލޯރާ (ސައިޓީސް) ގެ މެމްބަރު ގައުމުތަކުން، ފެހުރިއްސާއި، އެން މަޑީގެ ހުރިހާ ބާވަތްތައް ވަނީ އެޕެންޑިކްސް I ގެ ދަށަށް ގެނެސްފައެވެ. މި ގޮތަށް ނިންމުމާ އެކު އެންމެ މަތީ ދަރަޖައިގެ ރައްކާތެރިކަން މި ބާވަތްތަކަށް ލިބި، މި ބާވަތްތަކާއި އެ ތަކެތީގެ އުފެއްދުންތަކުގެ ހުރިހާ ބައިނަލްއަޤްވާމީ ވިޔަފާރިއެއް މަނާ ވެގެން ދާނެ އެވެ.

ނޮވެމްބަރު މަހުގެ 1 ވަނަ ދުވަހު ރާއްޖޭގައި ހުއްދަ ކުރި ކަށި މިޔަރުގެ ބައިނަލް އަގުވާމީ ވިޔަފާރި އަށް ސައިޓީސްގެ ނިންމުމުގެ ސަބަބުން ވަރަށް ބޮޑަށް ހުރަސް އެޅޭނެ އެވެ. ހުސްވި ނޮވެމްބަރު މަހު ބޭއްވި ސައިޓީސް ގެ ބައްދަލުވުމުގައި ކަށިމިޔަރު ވަނީ އެ މުއާހަދާ ގެ އެޕެންޑިސް 2 ގައި ހިމަނަން ފާސް ކޮށްފަ އެވެ.

ސަރުކާރުން ކަށި މިޔަރުގެ މަސްވެރިކަމަށް ހުއްދަ ދިން އިރު، ކަށި މިޔަރު ގެ މަސްވެރިކަން އަލުން ފެށުމާ ރައްޔިތުން ދެކޮޅު ކަން ގައުމީ ސަރވޭއަކުން ވަނީ ހާމަ ވެފަ އެވެ.

ބްލޫ މެރިން ފައުންޑޭޝަން ނަމަކަށް ކިޔާ ކަނޑުގެ ތިމާވެށި ރައްކާތެރިކުރުމުގެ ޖަމުއިއްޔާ އަކާއި، މޯލްޑިވްސް ރެޒިލިއަންޓް ރީފްސް އަދި މޯލްޑިވިއަން މިޔަރު ޝާކް ޕްރޮގްރާމްގެ ބައިވެރިވުމާއެކު ހެދުނު ގައުމީ ސާވޭގެ ނަތީޖާ ބުނާ ގޮތުން، ކަށި މިޔަރުގެ މަސްވެރިކަން އަލުން ފެށުމަށް ސާވޭގައި ބައިވެރިވި މީހުންގެ 77 އިންސައްތަ މީހުން ދެކޮޅެވެ.

ދިވެހިރާއްޖޭގައި 2010 ވަނަ އަހަރު ހުރިހާ ބާވަތެއްގެ މިޔަރު މަސްވެރިކަމެއް މުޅިން މަނާކުރި އެވެ. އަދި މިޔަރު މަސްވެރިކަން އަލުން ފަށައިފިނަމަ، މިޔަރު ސެންކްޗުއަރީ އެއްގެ ލަގަބު ރާއްޖެ އަށް ގެއްލިގެންދާނެ އެވެ.