ސަރުކާރުގެ ހަލަބޮލިކަން: ކުއްލި ބަދަލުތަކާއެކު ސަރުކާރަށް އިތުބާރު ގެއްލި، ރައްޔިތުންގެ ކެތްތެރިކަން ކޮޅުންލަނީ!

ދިވެހި ސަރުކާރުގެ 10 ވަޒީރުން ކުއްލި ގޮތަކަށް އިސްތިއުފާ ދެއްވައި، ކެބިނެޓަށް މި ސަރުކާރުން ގެނައި ކުއްލި ބަދަލާއެކު، އާންމު ރައްޔިތުންގެ މެދުގައި އޮތް ކަންބޮޑުވުންތައް އަނެއްކާވެސް މިވަނީ ބޮޑުވެފައެވެ. މި ބަދަލުތަކަކީ ރައްޔިތުންގެ ލާބައާއި މަންފާއަށް ގެނައި ބަދަލުތަކެއް ކަމަށް ސަރުކާރުން ބުނި ނަމަވެސް، ގިނަ ރައްޔިތުންނަށް މިހާރު އެކަން ގަބޫލެއް ނުކުރެވެއެވެ.

އޭގެ ބަދަލުގައި، ރައްޔިތުންނަށް ފެންނަނީ ރައީސް ޑރ މުޙައްމަދު މުއިއްޒުގެ ދުރުވިސްނުންފުޅެއް ނެތް ކުއްލި ނިންމުންތަކާއި، ސާބިތުކަމެއް ނެތް ލީޑަރޝިޕަކާއި، ސާފު މިސްރާބެއް ނެތް އުސޫލުތަކެކެވެ. މިއީ ރައްޔިތުންގެ އިތުބާރު ސަރުކާރަށް ކުޑަވަމުންދާ މައިގަނޑު ސަބަބުތަކެވެ.

އެއްފަހަރާ ގިނަ އަދަދެއްގެ ވަޒީރުން ވަކިކުރަށަވައި ބައެއް ވަޒީރުންގެ މަޤާމު ބަދަލުވެ، ކެބިނެޓަށް މި އައި ކުއްލި ބަދަލަކީ ރައްޔިތުންގެ ވިންދާ އެއްގޮތަށް ވެރިކަން ހިންގަން ގެންނަ ބަދަލެއްކަމަށް ރައީސް އޮފީހުން ބުނި ނަމަވެސް، ހަގީގަތުގައި މިފަދަ ކުއްލި ބަދަލުތަކުގެ ސަބަބުން ހިނގަމުންދާ މަޝްރޫއުތަކަށް ހުރަސްއެޅި، މުހިންމު އިސްލާހީ މަސައްކަތްތައް ލަސްވެ، ސިވިލް ސަރވިސްގެ ތެރޭގައިވެސް ނުތަނަވަސްކަން އުފެދެއެވެ.

މިއީ މިއަދު ހަމައެކަނި ކެބިނެޓުގެ ޙާލަތެއް ނޫނެވެ. ދައުލަތުގެ ގިނަ ވިޔަފާރި ކުންފުނިތަކެއް މެނޭޖިންގ ޑިރެކްޓަރުންނާ ނުލައި ހިންގަމުންދާ ދިއުމަކީ ސަރުކާރުގެ ނާޤާބިލުކަން ހާމަވާ އަނެއް ސަބަބެވެ. މި ކުންފުނިތަކަކީ ގައުމުގެ އިގްތިސާދީ އަދި އިޖުތިމާއީ އޮނިގަނޑުގެ މުހިންމު ބައެކެވެ.

ސަރުކާރުން ގެންނަމުންދާ ކުއްލި ބަދަލުތަކާއެކު މި ކުންފުނިތަކުގެވެސް ސާފު ލީޑަރޝިޕެއް ނެތުމުން، ކުންފުނިތަކުގެ ހިންގުން ދޯދިޔާވެ، ނިންމުންތައް ނިންމުން ވަނީ އިންތިހާއަށް ލަސްވެފައެވެ. ރާއްޖޭގެ އިގްތިސާދަށް އެތެރެއާއި ބޭރުން ގޮންޖެހުންތައް ކުރިމަތިވެފައިވާ މި ދަނޑިވަޅުގައި، މިފަދަ މުހިންމު މުއައްސަސާތަކެއްގެ ވެރިން ނެތި ދޫކޮށްލާފައި އޮތުމަކީ، ސަރުކާރުގެ އިސްކަންދޭ ކަންކަމާއި ރޭވުންތެރިކަމާ މެދު ސީރިއަސް ސުވާލުތަކެއް އުފެދޭ ކަމެކެވެ.

އާންމު ރައްޔިތުންނަށް މުހިންމީ ސިޔާސީ ކުޅިވަރުތަކެއް ނޫނެވެ. އެމީހުން ބޭނުންވަނީ ނަތީޖާއެވެ. އަމާންކަމާއި، ހަމަޖެހުމާއި، ދިރިއުޅުމުގެ ފެންވަރު ރަނގަޅުވުމަށް އެދި ރައްޔިތުން ދަނީ އަޑުއުފުލަމުންނެވެ. އިންތިޚާބުތަކުގެ ކެމްޕޭން ތެރޭގައި ވީ ވައުދުތައް ފަސްކުރުމެއް ނެތި ފުއްދައިދިނުމަށް ރައްޔިތުން ބޭނުންވެއެވެ. ބޯހިޔާވަހިކަމަކީ އަދިވެސް ގިނަ އާއިލާތަކެއްގެ ބޮޑު ކަންބޮޑުވުމަކަށް ވާއިރު، އެންމެ ކުޑަމިނުން ބޯހިޔާވަހިކަމުގެ ވައުދު ފުއްދައިދެވޭނެ އިރެއް މިއަދު ރައްޔިތުންނަކަށް ޔަޤީނެއް ނޫނެވެ.

މި ބަދަލުތަކަކީ އިސްލާހަށްޓަކައި ގެނައި ބަދަލުތަކެއް ކަމަށް ބުނެ ސަރުކާރުން ދައްކާ އުޒުރު ގަބޫލުކުރެވެން ނެތީ އެކަމުގައި ދެފުށް ފެންނަ ސިޔާސަތެއް ނެތުމާއި، އަމަލީ ނަތީޖާ ފެންނަން ނެތުމުންނެވެ.

ހަގީގަތުގައި އެއްފަހަރާ 10 ވަޒީރުން ވަކިކުރަން ޖެހުނު ހަގީގީ ސަބަބަކީ ކޮބައި ހެއްޔެވެ؟ ކުރިއަށް އޮތް ތަނުގައި ސަރުކާރުގެ ހިންގުން މެދުނުކެނޑި ކުރިއަށްދާނެކަން ކަށަވަރުކުރަން އަޅާފައިވާ ފިޔަވަޅުތަކަކީ ކޮބައި ހެއްޔެވެ؟ މި ސުވާލުތަކަށް ސާފު ޖަވާބެއް ނުލިބޭ ތަނުގައި ފެންނަނީ ހައްތަހާވެސް ވެރިކަމުގެ ބާރު ފުޅާ ކުރެވޭނެ ގޮތްތައް ހޯދުމަށް ކުރަމުންދާހާ މަސައްކަތެވެ.

ދިވެހި ރައްޔިތުން އެދެނީ ހުރިހާ ކަމެއް ފުރިހަމަވާކަށް ނޫނެވެ. ރައްޔިތުން އެދެނީ ހަމަޖެހުމަށާއި، ވީ ވައުދުތައް ފުއްދުމަށާއި، ގައުމު ހިންގުމުގެ ގާބިލުކަން ހުރި ސަރުކާރެއް ފެނުމަށެވެ. މި އުންމީދުތައް ހާސިލުނުވާހާ ހިނދަކު، ކިތަންމެ ވަރަކަށް މަގާމުތަކަށް ބަދަލު ގެނައި ނަމަވެސް، މިއީ "ރައްޔިތުންގެ ލާބައަށް" ކުރާ ކަމެއް ކަމަށް ރައްޔިތުން ގަބޫލެއް ނުކުރާނެއެވެ. ރައްޔިތުންގެ ކެތްތެރިކަން އެބަ ކޮޅުންލައެވެ.