ދޯދި 11 ކައިރީ ހުރި ކުނިފުންޏެއްގައި ރޯވި އަލިފާންގަނޑު، ހަ ގަޑިއިރު ފަހުން ނިއްވާލައިފި

ހުޅުމާލޭ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން އިމާރާތްކޮށްފައިވާ ޓަވަރުތަކެއް ކައިރީ ހުރި ކުނިފުންޏެއްގައި ރޯވި އަލިފާންގަނޑު، ހަ ގަޑިއިރަށްވުރެ ގިނަ އިރުގެ މަސައްކަތުން އެމްއެންޑީއެފުން ނިއްވާލައިފި އެވެ.
މި ހާދިސާ ހިނގާފައިވަނީ ހުކުރު ދުވަހުގެ ރޭ ދަންވަރުގެ ވަގުތެއްގައެވެ.

އެމްއެންޑީއެފް އިން މައުލޫމާތު ދިން ގޮތުގައި، ހުޅުމާލޭ ފޭސް 2 ގެ ދޯދި ފުލެޓް 11 ކައިރީ ހުރި ކުނިތަކެއްގައި އަލިފާން ރޯވެގެން ރިޕޯޓް ލިބިފައިވަނީ ހުކުރު ދުވަހުގެ ރޭ ދަންވަރު 02:21 ހާއިރު އެވެ. ހާދިސާގެ މައުލޫމާތު ލިބުމާއެކު، ހުޅުމާލޭ ފަޔާ ސްޓޭޝަނުގެ ފަޔާ ފައިޓަރުން ވަނީ ވަގުތުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފަ އެވެ.

ފަޔަ ފައިޓަރުން މެދުކެނޑުމެއްނެތި ކުރި މަސައްކަތުން އަލިފާންގަނޑު އެއްކޮށް ކޮންޓްރޯލްކޮށް ނިއްވާލެވިފައިވަނީ ހޮނިހިރު ދުވަހުގެ ހެނދުނު 08:18 ހާއިރު ކަމަށް އެމްއެންޑީއެފުން ބުނެ އެވެ. މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައި ނުވި ނަމަވެސް، ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުން ފެންނަ ގޮތުގައި އަލިފާންގަނޑު ވަނީ ވަރަށް ބޮޑަށް ފެތުރިފަ އެވެ. އަދި މި ހާދިސާގެ ސަބަބުން އެ ސަރަހައްދުގެ ބޮޑު ބަޔަކަށް ބޯ ދުންގަނޑު ފެތުރިފައި އޮތް މަންޒަރު ފެނެ އެވެ.

އެފްޑީސީން އިމާރާތްކުރި މި ޓަވަރުތަކަކީ މިދިޔަ އަހަރުގެ ސެޕްޓެންބަރު މަހުގެ ފަހުކޮޅުން ފެށިގެން މީހުން ދިރިއުޅެން ފަށާފައިވާ ތަނެކެވެ. ނަމަވެސް، ފުލެޓުތަކަށް މީހުން ބަދަލުވާން ފެށި ފަހުން ޓަވަރުތައް ކައިރިއަށް ކުނި އެޅުމުގެ މައްސަލަ ވަނީ ވަރަށް ބޮޑަށް ގޯސްވެފަ އެވެ. ބައެއް ޓަވަރުތައް ކައިރީގައި ބޮޑެތި ކުނިފުނިތައް އުފެދިފައި އޮތުމުގެ ސަބަބުން އެ ސަރަހައްދުގައި ދިރިއުޅޭ އާންމު ރައްޔިތުން އަންނަނީ ތަކުރާރުކޮށް ނުރުހުން ފާޅުކުރަމުންނެވެ.

މި މައްސަލައާ ގުޅިގެން އެފްޑީސީ އިން މީގެ ކުރިން ބުނެފައިވަނީ، ކުނި ސާފުކުރުމުގެ މަސައްކަތް އެ ކުންފުނިން ކުރަމުންދާ ކަމަށެވެ. އަދި އުސޫލާ ޚިލާފަށް ކުނި އަޅާ ފަރާތްތައް ޖޫރިމަނާ ކުރާނެ ކަމުގެ އިންޒާރު ދިނުމުގެ އިތުރުން، ބައެއް ފަރާތްތައް މިހާރު ވެސް ޖޫރިމަނާ ކޮށްފައިވާ ކަމަށް އެ ކުންފުނިން ވަނީ ހާމަކޮށްފަ އެވެ. މިފަދަ ބޮޑު އަލިފާނުގެ ހާދިސާ އެއް ހިނގާފައި މިވަނީ ކުނީގެ މައްސަލަ ބޮޑުވެފައިވާ ދަނޑިވަޅެއްގަ އެވެ.