ގއ. އަތޮޅު ތައުލީމީ މަރުކަޒުގައި އަލިފާނުގެ ހާދިސާ އެއް ހިނގީ ކަރަންޓު ޝޯޓޭޖަކުން ކަމަށް ބެލެވޭ: ކައުންސިލް

ގއ. ވިލިނގިލީ ގައި ހުންނަ، ގއ. އަތޮޅު ތައުލީމީ މަރުކަޒުގައި އަލިފާނުގެ ހާދިސާ އެއް ހިނގީ ކަރަންޓު ޝޯޓޭޖަކުން ކަމަށް ބެލެވޭ ކަމަށް އެރަށުގެ ކައުންސިލުން ބުނެފި އެވެ. 

ގއ. އަތޮޅު ތައުލީމީ މަރުކަޒުގައި އަލިފާނުގެ ހާދިސާ އެއް ހިނގީ ބުރާސްފަތި ދުވަހުގެ ރޭ ގާތްގަނޑަކަށް 00:40 ހާއިރު އެވެ. 

ރާއްޖެއެމްވީއަށް އެރަށުގެ ކައުންސިލްގެ ރައީސް ވިޝާލު މުހައްމަދު ވިދާޅުވީ، ގއ. އަތޮޅު ތައުލީމީ މަރުކަޒުގެ ޕްރައިމަރީ ކުދިން ކިޔަވާ ބްލޮކް ބޭނުން ނުކުރެވޭ ވަރަށް އަނދާފައިވާ ކަމަށާއި، މިއީ ލިބުނު ވަރަށް ބޮޑު ގެއްލުމެއް ކަމަށެވެ. އަދި މި ބްލޮކްގައި ހުރި ސްޓާފް ރޫމް، ޕްރިންޓިން ރޫމް އަދި އެއް ކުލާސް ރޫމް އެއްކޮށް އަނދާހުލިވީ ދަރިވަރުންގެ ފޮތްތަކާއި، ހުރިހާ ސާމަނާއެކު ކަމަށެވެ.

މީގެ އިތުރުން ވިޝާލު ވިދާޅުވީ، ދަރިވަރުންގެ ކިޔެވުމުގެ ހުރިހާ އިންތިޒާމެއް ހަމަޖެހޭނެ ކަމަށާއި، ފޮތްތަކާއި، އެހެނިހެން ބޭނުންވާ ސާމާނުތައް ލިބޭނެ ކަމުގެ ޔަގީން އެޑިޔުކޭޝަން މިނިސްޓްރީން ދީފައިވާ ކަމަށެވެ. 

އަލިފާނުގެ ހާދިސާ ހިނގަން މެދުވެރިވި ސަބަބަށް އިޝާރާތް ކުރައްވައި ވިޝާލު ވިދާޅުވީ ބޮޑަށް ބެލެވެނީ ކަރަންޓު ޝޯޓޭޖަކުން ހިނގި ހާދިސާއެއް ކަމަށެވެ. އަދި އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައެއް ނުވާ ކަމަށް އޭނާ ވިދާޅުވި އެވެ. 

މިހާދިސާއާ ގުޅޭގޮތުން އެމްއެންޑީއެފުން ބުނީ، އެ ސްކޫލުގައި ރޯވި އަލިފާން، ވިލިނގިލީގައި ތިބި ސިފައިންނާއި މުއައްސަސާތައް އަދި އާންމު ރައްޔިތުން ގުޅިގެން ކުރި މަސައްކަތުން ބުރާސްފަތި ދުވަހުގެ ރޭ 01:26 ހާއިރު ކޮންޓްރޯލް ކޮށްފައިވާ ކަމަށެވެ. އަދި އަލިފާން އެއްކޮށް ނިއްވާލެވުނީ 02:50 ހާއިރު ކަމަށް އެމްއެންޑީއެފުން ބުންޏެވެ.