ހުޅުމާލެ ފޭސް-3ގެ ކުރީގެ އެކޮމަޑޭޝަން ބްލޮކެއްގައި ރޯވެ ގެއްލުންތަކެއް ލިބިއްޖެ
ހުޅުމާލޭ ފޭސް 3 ގައި ކުރިން ބޭނުންކުރި އެކޮމަޑޭޝަން ބްލޮކެއްގައި ހޮނިހިރު ދުވަހުގެ ހަވީރު ރޯވި އަލިފާން، އެމްއެންޑީއެފްގެ ފަޔަރ ފައިޓަރުން ވަނީ ނިއްވާލާފައި. މި ހާދިސާގައި އެ އިމާރާތަށް އެކި ވަރުގެ ގެއްލުންތައް ލިބިފައިވީ ނަމަވެސް، އެއްވެސް މީހަކަށް އަނިޔާއެއް ލިބިފައެއް ނުވޭ. މީހުން ދިރިނޫޅޭ އެ ތަނުގައި އަލިފާން ރޯވާން މެދުވެރިވި ސަބަބު އަދި ކަމާބެހޭ އިދާރާތަކުން ހާމަކޮށްފައެއް ނުވޭ.
ހުޅުމާލެ ފޭސް-3ގެ ކުރީގެ އެކޮމަޑޭޝަން ބްލޮކެއްގައި ރޯވެ ބޮޑެތި ގެއްލުންތަކެއް ވަނީ ލިބިފައި. | އެމްއެންޑީއެފް
ހުޅުމާލޭގެ ފޭސް 3 ގައި ކުރިން ބޭނުންކުރި އެކޮމަޑޭޝަން ބްލޮކެއްގައި އަލިފާން ރޯވެ ގެއްލުންތަކެއް ލިބިއްޖެ އެވެ.
ހޮނިހިރު ދުވަހު އެމްއެންޑީއެފުން ބުނީ، ހުޅުމާލޭގެ ފޭސް 3 ގައި ކުރިން ބޭނުންކުރި އެކޮމަޑޭޝަން ބްލޮކެއްގައި ރޯވި އަލިފާން، އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަންގެ ފަޔަރ ފައިޓަރުން ނިއްވާލާފައިވާ ކަމަށެވެ.
މި ހާދިސާގެ މައުލޫމާތު އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަނަށް ލިބިފައިވަނީ ހޮނިހިރު ދުވަހުގެ ހަވީރު 17:12 ހާއިރު ކަމަށާއި، ރޯވި އަލިފާން ނިއްވާލެވުނީ 17:38 ހާއިރު ކަމަށެވެ.
މި ހާދިސާގައި އެކޮމަޑޭޝަން ބްލޮކްގެ އެކިބައިތަކަށް ވަނީ ގެއްލުން ވެފަ އެވެ.
އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައިނުވާ ކަަމަށް އެމްއެންޑީއެފުން ބުންޏެވެ.
މީހުން ނޫޅޭ ތަނެއްގައި ކުއްލިއަކަށް އަލިފާން ރޯވާން މެދުވެރި ސަބަބެއް އެއްވެސް އިދާރާއަކުން ހާމަކޮށްފައިނުވެ އެވެ.
