ސަރުކާރު ބަންދުކުރުމާ ގުޅިގެން ސަރުކާރުގެ ހޮސްޕިޓަލުތަކުން ސްޕެޝަލިސްޓް އޯޕީޑީގެ ޚިދުމަތް މެދުކަނޑާލައިފި

ސަރުކާރު ބަންދުކުރުމާ ގުޅިގެން ސަރުކާރުގެ ހޮސްޕިޓަލުތަކުން ސްޕެޝަލިސްޓް އޯޕީޑީގެ ޚިދުމަތް މެދުކަނޑާލައިފި އެވެ. 

ހޮނިހިރު ދުވަހު ކުރިއަށް ގެންދިޔަ ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބާ ގުޅިގެން އާދިއްތަ ދުވަހާއި ހޯމަ ދުވަސް ސަރުކާރުން ވަނީ ބަންދުކޮށްފަ އެވެ. 

ސަރުކާރު ބަންދު ކުރުމާއި ގުޅިގެން އައިޖީއެމްއެޗުން ބުނީ، ސަރުކާރު ބަންދު ދުވަސްތަކެއް ކަމުގައިވާ މި ދެ ދުވަހު ދަރުމަވަންތަ ހޮސްޕިޓަލް، އައިޖީއެމްއެޗް އަދި ވިލިމާލެ ހޮސްޕިޓަލުގެ ސްޕެޝަލިސްޓް އޯޕީޑީ އަދި އެހެނިހެން ކްލިނިކް ޚިދުމަތްތައް ބަންދުވާނެ ކަމަށެވެ. 

އެ ޚިދުމަތްތައް ނުލިބުނު ނަމަވެސް މި ދެދުވަހު އައިޕީޑީ އަދި އިމަޖެންސީގެ ޚިދުމަތްތައް މެދުނުކެނޑި ކުރިއަށް ދާނެ ކަަމަށް އައިޖީއެމްއެޗުން ބުނެ އެވެ.

ސަރުކާރު ބަންދުކުރާ ދުވަސްތަކުގައި ހޮސްޕިޓަލްތަކުން ޚިދުމަތް ނުލިބޭ މައްސަލަ ވަރަށް ބޮޑެވެ. އެއްވެސް ސަރުކާރެއްގައި މިހާތަނަށް މިމައްސަލައަށް ހައްލެއް ހޯދައިދީފައިނުވާއިރު، ހަފްތާ ބަންދު ދުވަސްތައް ކަމުގައިވާ ހުކުރު ދުވަހާއި ހޮނިހިރު ދުވަހު ޚިދުމަތް ބޭނުންވާ ކަމަށް ބުނެ ގިނަ ރައްޔިތުން އެކަމުގެ ޝަކުވާ ކުރެ އެވެ. މީގެ އިތުރުން ހުކުރު ދުވަސްތަކުގައި ސަރުކާރު ހޮސްޕިޓަލުގެ އިތުރުން އަމިއްލަ ޚިދުމަތް ދޭ ކްލިނިކަކުން ވެސް އެންމެ އާދައިގެ ލޭގެ ޓެސްޓެއް ވެސް ނުހެދެ އެވެ.

ނަމަވެސް ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ ރާއްޖޭގެ ސިއްހީ ޚިދުމަތް އިތުރު ހަރުފަތަކަށް ގެންދާނެކަމުގެ ވައުދުފުޅާ އެކު އެވެ. މިސަރުކާރަށް ދެ އަހަރަށް ވުރެ ގިނަ ދުވަސްވެފައިވާއިރު، ކުރިއަށް ވުރެ މިހާރު ސިއްހީ ޚިދުމަތުގެ ފެންވަރު ދަށްވެ، އިހުމާލުން މީހުންގެ ފުރާނަ ގެއްލި، ބޭހުގެ ދަތިކަން ކުރިމަތިވެފައިވާ ކަމަށް ގިނަ ރައްޔިތުން ދަނީ ބުނަމުންނެވެ.