ރަމަޟާންމަހު ސިއްހީ ޚިދުމަތްތެރިންގެ މަސައްކަތު ގަޑި ތަފާތު ކުރާ ކަމަށް ބުނެ، ކަންބޮޑުވުން ފާޅުކޮށްފި

ރަމަޟާން މަހުގެ ރަސްމީ މަސައްކަތު ގަޑި ކަނޑައެޅުމުގައި އެކި ދާއިރާތަކުގެ މަސައްކަތްތެރިންގެ މެދުގައި ހޮސްޕިޓަލްތަކުން ތަފާތު ކުރުން ގެންގުޅެމުން ގެންދާތީ ސިއްހީ މަސައްކަތްތެރިންގެ ޖަމިއްޔާ (އެމްއެޗްޕީޔޫ)އިން ކަންބޮޑުވުން ފާޅުކޮށްފި އެވެ.

އެމްއެޗްޕީޔޫ އިން ނެރުނު ބަޔާނެއްގައި ބުނީ، މީގެ ކުރީގެ އަހަރުތަކުގައި ވެސް ހަމަ ޖައްސާފައިވާ ގޮތަށް 1447 ވަނަ އަހަރުގެ ރަމަޟާން މަހުގެ ދުވަސްތަކާއި، ޝައްވާލު މަހުގެ ފުރަތަމަ 7 ދުވަުގެ ރަސްމީ މަސައްކަތު ގަޑިއަކީ ހެނދުނު 9:00ން މެންދުރުފަހު 1:00ށް ކަމުގައި 15 ފެބްރުއަރީ 2026 ގައި ރައީސް އޮފީހުން ހާމަ ކޮށްފައިވާ ކަމަށެވެ. ރަމާޟާން މަހު ދައުލަތުގެ އެންމެހައި އިދާރާތަކުގެ ރަސްމީ މަސައްކަތުގެ ވަގުތަކީ 4 ގަޑިއިރު ކަމުގައި ރައީސް އޮފީހުން ކަނޑަޅާފައިވަނިކޮށް ސިއްހީ ޚިދުމަތްދޭ އިދާރާތަކުގެ މުވައްޒަފުންގެ މެދުގައި ރަސްމީ މަސައްކަތުގެ ގަޑި ތަފާތުކޮށް އެކި މުވައްޒަފުންނަށް ތަފާތު ވަގުތުތަކެއް ރަސްމީ ގަޑީގެ ގޮތުގައި އެ އިދާރާތަކުން ކަނޑައަޅާފައިވުމަކީ ކަންބޮޑުވާ މައްސަލައެއް ކަމަށެވެ. 

ދިވެހި ސިވިލް ސަރވިސްގެ އެންމެހައި މުވައްޒަފުން 1 ނޮވެންބަރު 2025 ގައި ދިވެހި ދައުލަތުގެ އައު ވަޒީފާ އޮނިގަނޑުތަކަށް ހިޖުރަކޮށްފައިވާއިރު، އައު އޮނިގަނޑުތަކަށް ހިޖުރަކޮށްފައިވާ މުވައްޒަފުންގެ ވަޒީފާގެ އުސޫލުތަކާއި މިންގަނޑުތައް ކަނޑައަޅަނީ ''ނެޝަނަލް ޕޭ ސްޓޭންޑަރޑްސް'' ގެ ދަށުންކަން ފާހަގަކޮށް ބަޔާނުގައި ބުނީ، ނޭޝަނަލް ޕޭ ސްޓޭންޑަރޑްތަކުގައި ސިވިލް ސަރވިސްގެ އެންމެހައި މުވައްޒަފުންނަށް އެއް މިންގަނޑަކުން ވަޒީފާގެ ޝަރުތުތައް އަދި އުސޫލުތައް ބަޔާންކޮށްފައި ވަނިކޮށް މަސައްކަތްތެރިންގެ މެދުގައި މިފަދަ ތަފާތު ކުރުންތަކެއް ގެންގުޅުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގައި މަސައްކަތް ކުރުމުގެ ހައްގު ބަޔާންކޮށްފައިވާ  37 ވަަނަ މާއްދާ އާއި ވަޒީފާއާ ބެހޭ ގާނޫނުގައި ތަފާތު ނުކުރުމަށް ބަޔާންކޮށްފައިވާ 4 ވަނަ މާއްދާގެ (ހ)ގެ ރޫހާ ހިލާފު ކަމެއް ކަމަށެވެ. 

ބަޔާނުގައި ބުނީ، 1 މެއި 2022 ގައި އަމަލު ކުރަން ފަށާފައިވާ ދިވެހި ދައުލަތުގެ ޕޭ ފްރޭމްވަރކްގެ މިންގަނޑުތަކުގައި ވާ ގޮތުން މިއޮނިގަނޑަށް ހިޖުރަކޮށްފައިވާ މުވައްޒަފުންގެ މުސާރަތައް ކަނޑައަޅާފައިވަނީ ދުވާލަކު 8 ގަޑިއިރު އަދި ހަފުތާއަކު 6 ދުވަހުގެ މަސައްކަތު ގަޑިއަށް ކަމަށާއި، އެހެންކަމުން ނުސީދާ ގޮތެއްގައި ދައުލަތުގެ އައު ވަޒީފާގެ އޮނިގަނޑުތަކަށް ހިޖުރަކޮށްފައިވާ މުވައްޒަފުންގެ މަސައްކަތު ގަޑިއަކީ ދުވާލަކު 8 ގަޑިއިރު އަދި ހަފްތާއަކު 6 ދުވަސް ކަމަށެވެ. ނަމަވެސް ދައުލަތުގެ އިދާރާތަކުގެ މުވައްޒަފުންނަށް ސަރުކާރުން ދީފައިވާ ލުއިގެ ތެރެއިން ބައެއް މުވައްޒަފުން މަސައްކަތް ކުރަމުން އަންނަނީ ދުވާލަކު 6 ގަޑިއިރު އަދި ހަފުތާއަކު 5 ދުވަހު ކަމަށެވެ. ނަމަވެސް ސިއްހީ ދާއިރާގެ މަސައްކަތްތެރިންގެ ތެރެއިން ވަކި ގިންތިތަކަކަށް ނިސްބަތްވާ މަސައްކަތްތެރިން ދުވާލަކު 8 ގަޑިއިރު އަދި ހަފުތާއަކު 6 ދުވަހު މަސައްކަތް ކުރަމުންދާކަން ވެސް ފާހަގަކޮށްފައިވެ އެވެ. މިއީ އެއްހަމައަކުން މުސާރައާއި ވަޒީފާގެ އުސޫލުތައް ކަނޑައެޅިފައިވާ މުވައްޒަފުންގެ މެދުގައި ގެންގުޅޭ ވަރަށް ބޮޑު ތަފާތު ކުރުމެއް ކަމަށް އެމްއެޗްޕީޔޫ އިން ބުނެ އެވެ. 

މީގެ އިތުރުން އެމްއެޗްޕީޔޫ ބުނީ، ރަމަޟާން މަހުގެ ރަސްމީ މަސައްކަތުގެ ގަޑިއަކީ 4 ގަޑިއިރު ކަމަށް ރައީސް އޮފީހުގެ ދެންނެވުމަކުން ކަނޑައަޅާފައިވަނިކޮށް، ސިއްހީ ދާއިރާގެ މުވައްޒަފުންގެ ތެރެއިން ވަކި ގިންތިތަކަކަށް ނިސްބަތްވާ މުވައްޒަފުންތަކެއްގެ ރަސްމީ މަސައްކަތުގެ ގަޑިއަކީ 6 އާއި 8 ގަޑިއިރާއި ދެމެދުގެ ވަގުތުތަކެއް ކަމުގައި މިހިނގާ 1447 އަހަރުގެ ރަމަޟާން މަހު އެކި ހޮސްޕިޓަލްތަކުން ކަނޑައަޅައިފައިވާ ކަމަށެވެ. އަދި މިފަދައިން ތަފާތުތައް ގެންގުޅޭއިރު، މިރަމަޟާން މަހު ރަސްމީގަޑީގެ ގޮތުގައު ރައީސް ކަނޑައަޅުއްވާފައިވާ 4 ގަޑިއިރަށް ވުރެ އިތުރަށް މަސައްކަތް ކުރުމަށް ހޮސްޕިޓަލުތަކުން އަންގާފައިވާ މުވައްޒަފުންނަށް 4 ގަޑިއިރަށް ވުރެ އިތުރުވާ ވަގުތުތަކަށް އިތުރު އެއްވެސް އިނާއަތެއް ނުދީ މަސައްކަތް ކުރުމަކީ އެމަސައްކަތްތެރިންނާ މެދު ވެވޭ ނުހަނު ބޮޑު ބޭއިންސާފެއް ކަމަށެވެ. 

ރަމަޟާން މަހުގެ ރަސްމީ މަސައްކަތުގެ ވަގުތު ރައީސް އޮފީހުން 4 ގަޑިއިރަށް ކުރުކޮށްފައިވަނީ މި މާތް މައްސަރުގެ ސަވާބާއި ދަރުމަ ހޯދުމަށް އެދި މަސައްކަތް ކުރުމަށް ސަރުކާރުގެ މުވައްޒަފުންނަށް ވީހާވެސް ގިނަ ވަގުތު ދިނުމަށްކަން ފާހަގަކޮށް ބަޔާނުގައި ބުނީ، އެއް މިންގަނޑަކުން މުސާރައާއި ވަޒީފާގެ އުސޫލުތައް ކަނޑައަޅާފައިވާ މުވައްޒަފުންތަކެއް ތެރެއިން ބައެއް މުވައްޒަފުންނަށް ދުވާލަކު 6 އާއި 8 ގަޑިއިރާ ދެމެދުގެ ވަގުތުތަކެއްގައި ރަސްމީ ގަޑީގެ ގޮތުގައި ވަޒީފާ އަދާ ކުރުމަށް ހޮސްޕިޓަލުތަކުގެ ވެރިން މުވައްޒަފުންނަށް މުޖުބޫރު ކުރުމުން ގެންދިއުމަކީ އަދުލު އިންސާފަށް އެއްވެސް ވަރަކަށް ބެލުމެއްނެތި އަދި މުވައްޒަފުންގެ މެދުގައި ފިތުނަ އުފެދޭ ގޮތަށް ހޮސްޕިޓަލުތަކުގެ ވެރިން ކުރަމުން ގެންދާ ކަމެއް ކަމަށެވެ.

ސިއްހީ މަސައްކަތްތެރިންނަކީ އެ މަސައްކަތްތެރިންގެ ސަލާމަތާއި ސިއްހީ ރައްކާތެރިކަމާ ގުޅޭ އެތަކެއް ހިރާސްތަކެއް އެކުލެވޭ މާހައުލުތަކެއްގައި ރައްޔިތުންނަށް ބޭނުންވާ ނުހަނު ހައްސާސީ އަސާސީ ޚިދުމަތްތެއް ދިނުމުގައި މަސައްކަތް ކުރަމުން ގެންދާ ބަޔަކަށްވާއިރު، އެއް މިންގަނޑަކުން މުސަރައާއި ވަޒީފާގެ އުސޫލުތައް ކަނޑައަޅާފައިވާ މުވައްޒަފުންތަކެއް ދެމެދުގައި މިފަދަ ބޭއިންސާފީ ގޮތަކަށް ތަފާތު ކުރުން ގެންގުޅުމަކީ  އެމަސައްކަތްތެރިންނަށް ނަފުސާނީ ގޮތުން އިތުރު ބުރައަކަށްވެފައިވާ ކަމެއް ކަމަށް ބަޔާނުގައި ބުނެފައިވެ އެވެ. 

އެހެންކަމުން މި ރަމަޟާން މަހުގެ ރަސްމީ މަސައްކަތުގެ ވަގުތުކަމުގައި ރައީސް އޮފީހުންް ކަނޑައަޅާފައިވާ 4 ގަޑިއިރަކީ ހޮސްޕިޓަލްތަކާއި ސިއްހީ ޚިދުމަތްދޭ އެންމެހައި އިދާރާތަކެއްގެ ހުރިހާ ގިންތިއެއްގެ މުވައްޒަފުން ވެސް ރަސްމީ ގަޑީގެ ގޮތުގައި ހަމަޖެއްސުމާއި، 4 ގަޑިއިރަށް ވުރެ އިތުރަށް މުވައްޒަފުން ލައްވާ ކުރުވާ މަސައްކަތަށް އެކަށީގެންވާ އިނާޔަތެއް ހަމަޖެއްސުމަށް ސަރުކާރަށް އަދި ނެޝަނަލް ޕޭ ކޮމިޝަނަށް އެ ޔޫނިއަންއިން ވަނީ ގޮވާލާފަ އެވެ.  މީގެ އިތުރުން ރަސްމީ މަސައްކަތުގެ ވަގުތު ކަނޑައެޅުމުގައި އަހަރުގެ އެހެނިހެން މަސްތަކުގައި ވެސް ދައުލަތުގެ ޕޭ ފްރޭމް ވަރކްގައި ތިބި ހުރިހާ މުވައްޒަފުންނަށް އެއް ހަމައަކުން އަމަލު ކުރުމަށް ވެސް ބަޔާނުގައި ގޮވާލާފައިވެ އެވެ.