ވާލާއި ކާޅު މަރާނަމަ، އެކަން ކުރަން ޖެހޭނީ ޚާއްސަ ސަމާލުކަމެއް ދީގެން: މިނިސްޓަރު މާރިޔާ
ދަނޑުވެރިންނަށް ކުރިމަތިވާ އުނދަގޫތައް ހައްލުކުރުމަށްޓަކައި، ރަށްރަށުގައި ވާލާއި ކާޅު އުޅޭ މިންވަރު ބަލައި ސާވޭކުރުމަށް ކައުންސިލްތަކުގައި އެދިފައިވާ ކަމަށް އެގްރިކަލްޗަރ މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ. މި ސޫފިތައް މެނޭޖްކުރުމުގެ މަސައްކަތް ތިމާވެށީގެ ގަވާއިދުތަކާ އެއްގޮތަށް ކުރިއަށްގެންދާއިރު، މިހާތަނަށް ފަސް ސަރަހައްދެއްގައި ކަމާގުޅޭ އިދާރާތަކާ ގުޅިގެން މި ހަރަކާތްތައް ހިންގާފައިވާކަން މިނިސްޓަރު ފާހަގަކުރެއްވި. އެގޮތުން މި މަސައްކަތް ކުރަނީ ދަނޑުވެރިކަމަށް ލިބޭ ގެއްލުންތައް ކުޑަކުރުމަށްޓަކައި ބޭނުންވާ މައުލޫމާތު އެއްކުރުމަށް ފަހުގަ.
ރައީސް ޑރ. މުހައްމަދު މުއިއްޒުގެ އެގްރިކަލްޗަރ އެންޑް އެނިމަލް ވެލްފެއަރ މިނިސްޓަރު ޑރ. މަރިޔަމް މާރިޔާ. | ރައީސް އޮފީސް
ވާލާއި ކާޅުގެ ސަބަބުން ދަނޑުވެރިންނަށް އުނދަގޫ ވާތީ އެކަން ހައްލު ކުރުމަށް ވާލާއި ކާޅު މެނޭޖް ކޮށް، މަރަން ޖެހޭ ހާލަތްތަކުގައި އެކަން ކުރަމުންދާނީ ޚާއްސަ ސަމާލުކަމެއް ދީގެން ކަމަށް ރައީސް ޑރ. މުހައްމަދު މުއިއްޒުގެ އެގްރިކަލްޗަރ އެންޑް އެނިމަލް ވެލްފެއަރ މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ އެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ ކައުންސިލްތަކުގައި އެދިފައި ވާނީ އެ ރަށްރަށުގައި ވާލާއި ކާޅު އުޅެނީ ކިހާ އަދަދަކަށް ތޯ ބަލައި އެ މޮނިޓަރ ކޮށް، ސަރވޭ ކުރުމަށް ކަމަށެވެ. އަދި އެ މެނޭޖް ކުރާނެ ގޮތެއް ހޯދަނީ އެ ހުރިހާ ކަމެއް ކުރުމަށްފަހުގައި ކަމަށް ވެސް މިނިސްޓަރު ވިދާޅުވި އެވެ.
މެނޭޖްކުރުމުގެ ގޮތުން އެންވަޔަރަމަންޓް މިނިސްޓްރީ އާ އަޅުގަނޑުމެންނާ މަޝްވަރާ ކޮށް އެންމެ ރަނގަޅު ގޮތެއްގަ މި ސޫފި ތައް މެނޭޖް ކުރެވޭނީ ކިހިނެއްތޯ ބަލަން. ތިމާވެއްޓާ ބެހޭ ގަވާއިދުތަކެއް އޮވޭ. އިންޓަރނޭޝަނަލް ގަވާއިދުތަކެއް ވެސް އޮވޭ. އަޅުގަނޑުމެންގެ ގައުމުގަ މިއުޅޭ ވާލަކީ ނޫނީ ކާޅަކީ ހަމައެކަނި ރާއްޖޭގަ އުޅޭ ސްޕީޝީޒް އެއް ކަމަށް ވަނީ. އެހެންވީމަ އަޅުގަނޑުމެންނަށް އިލްތިމާސް ކޮށްފަ ވަނީ އަޅުގަނޑުމެން ވަރަށް ރަނގަޅަށް ބަލައި، މެނޭޖް ކޮށްގެން މި ސޫފާސޫފި މެރިޔަސް އެހެން ކަމެއް ކުރިޔަސް، މި ޕޮލިސީ އާ އެއްގޮތަށް މަސައްކަތް ކުރަން.ރައީސް ޑރ. މުހައްމަދު މުއިއްޒުގެ އެގްރިކަލްޗަރ އެންޑް އެނިމަލް ވެލްފެއަރ މިނިސްޓަރު ޑރ. މަރިޔަމް މާރިޔާ
މިނިސްޓަރު ވިދާޅުވީ މިހާތަނަށް ދަނޑުވެރިންނަށް ވާލާއި ކާޅުގެ ސަބަބުން އުނދަގޫ ވެގެން މައްސަލަ ދިމާވަނީ ކިތައް ރަށް ތޯ ބަލައި ރަށުގެ އާބާދީ އާ ގަސްގަހާގެހީގެ މައުލޫމާތު ވެސް އެއްކޮށްފައިވާ ކަމަށެވެ.
އެގޮތުން މިހާތަނަށް ފަސް ރަށެއްގައި މިނިސްޓްރީ އޮފް ޑިފެންސާ އެންވަޔަރަމަންޓް މިނިސްޓްރީ އަދި ކަމާ ގުޅޭ އެހެން މިނިސްޓްރީ ތަކާ ގުޅިގެން ވާލާއި ކާޅު މެނޭޖްކުރުމުގެ މަސައްކަތް ކުރިއަށް ގެންގޮސްފައިވާ ކަމަށް މިނިސްޓަރު ވިދާޅުވި އެވެ. އެއީ އެއީ އައްޑޫ ސިޓީ، ކުޅުދުއްފުށި ސިޓީ، ފުވައްމުލަށް ސިޓީ، ހއ. ކެލާ އަދި ލ. ފޮނަދޫ ކަމަށް ވިދާޅުވެ މިނިސްޓަރު ވިދާޅުވީ މިހާރު ވެސް މި މަސައްކަތް ދަނީ ކުރިއަށް ކަމަށެވެ.
