ގޮންޖެހުންތަކާއި އެކު އެމްޑީޕީ އިން އައްޑޫގައި ހޯދި ކާމިޔާބީ އަކީ ރައްޔިތުންނަށްޓަކައި ރައްޔިތުން ހޯދި މޮޅެއް: ނިޒާރު
އިންތިޚާބުގެ ނަތީޖާއިން ފެނިގެންދިޔައީ ސަރުކާރުން އައްޑޫގެ ތަރައްޤީއަށް އިހުމާލުވުމުން ރައްޔިތުން މާޔޫސްވެފައިވާ މިންވަރު ކަމަށް މޭޔަރު އަލީ ނިޒާރު ވިދާޅުވި.
އައްޑޫގެ މޭޔަރ އަލީ ނިޒާރު | ރާއްޖެ އެމްވީ
ގޮންޖެހުންތަކާއި އެކު އެމްޑީޕީ އިން އައްޑޫގައި ހޯދި ކާމިޔާބީ އަކީ ރައްޔިތުންނަށްޓަކައި ރައްޔިތުން ހޯދި މޮޅެއް ކަމަށް އައްޑޫސިޓީގެ މޭޔަރ އަލީ ނިޒާރު ވިދާޅުވެއްޖެ އެވެ.
ނިޒާރު އެފަދައިން ވިދާޅުވީ ރާއްޖެ ޓީވީ އަށް ދެއްވި އިންޓަރވިއު އެއްގަ އެވެ. ނިޒާރު ވިދާޅުވީ ހޮނިހިރު ދުވަހު ބޭއްވި އިންތިޚާބުން އައްޑޫ އިން ދައްކުވައިދިނީ ސަރުކާރާއި މެދު މާޔޫސްވެފައިވާ މިންވަރު ކަމަށެވެ. އެއީ އައްޑޫ ސިޓީގެ ތަރައްޤީއަށްޓަކައި މިހާރުގެ ކައުންސިލުން ނިންމާފައިވާ ނިންމުންތަކާއި ޕްލޭންތަކަށް އާއްމުން އިތުބާރުކުރާކަން ހާމަވާ ކަމެއް ކަމަށް އޭނާ ވިދާޅުވި އެވެ.
"ސަރުކާރުން ވަނީ އައްޑޫ އަށް ވަރަށް ބޮޑަށް އިހުމާލުވެފައި. ވީ އެއްވެސް ވައުދެއް ނުފުއްދާ. ލިންކްރޯޑުގެ މައްސަލަ އަށް ހައްލެއް ނުހޯދޭ. މީގެ މައްސަލަ އަކީ ކުންފުނިތަކާއި ކަންކަން ހަވާލުކޮށް ސޮއިކުރި ނަމަވެސް އެއްވެސް މަސައްކަތެއް ނުކުރޭ." އޭނާ ވިދާޅުވި އެވެ.
ނިޒާރު ވަނީ ސަރުކާރަށް ރައްޔިތުން ބޮޑުތަނުން ނޫނެކޭ ބުނެފައިވާ ކަމަށާއި މިއީ ސަރުކާރަށް ދިން ވަރުގަދަ މެސެޖެއް ކަމަށް އޭނާ ވިދާޅުވި އެވެ. ނިޒާރު ވަނީ ހުރިހާ ސިޓީތަކާއި އާބާދީ ބޮޑު އެހެން ތަންތަނުން ސަރުކާރަށް ލިބުނު ނަތީޖާ އިން ސަރުކާރު ފެއިލްވެފައިވާކަން އެނގޭ ކަމަށެވެ. ސަރުކާރުން ކިތަންމެ ވަރަކަށް ގަދަ ބާރާއި ނުފޫޒު ފޯރުވި ނަމަވެސް ރައްޔިތުންނަށް އޮޅުވައި ނު ލެވޭނެކަން ވޯޓުން ރައްޔިތުން މި ވަނީ ސާބިތުކޮށްދީފައި ކަމަށް އޭނާ ވަނީ ވިދާޅުވެފަ އެވެ.
ނިޒާރު ވަނީ މިއީ ލާމަރުކަޒީ ނިޒާމުގެ ބާރު ކަނޑުވާލުމަށް މަސައްކަތް ކުރުމުގެ ނަތީޖާ ކަމަށް ވެސް ވިދާޅުވެފަ އެވެ. ރައްޔިތުންނަށް ކަންކަން ކޮށްދެވޭނީ ރައްޔިތުންނާއި ގާތުން މަސައްކަތް ކޮށްގެން ކަމަށާއި ކައުންސިލްތަކަށް އިތުރަށް ބާރުވެރިކަން ލިބެންޖެހޭ ކަމަށް ނިޒާރު ވިދާޅުވި އެވެ.
