ދެ އިންތިހާބު އެއްކޮށްލުމާ ދެކޮޅަށް އެމްޑީޕީ އިން ކުރިޔަށް ގެންދިޔަ ޕިކަޕް ޖަލްސާ ތައް ފޯރިއާއެކު ނިންމާލައިފި
2 އެޕްރީލު 2026 | ބުރާސްފަތި 20:52ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ކުރާ މަސައްކަތަކީ ވެރިކަމުގެ ދައުރު ދަންމާލައި، ހުދުމުހުތާރު ވެރިކަމެއް ގާއިމުކުރުމަށް ރާވާފައިވާ ހީލަތްތެރި ރޭވުމެއް ކަމަށް އެމްޑީޕީން ތުހުމަތުކޮށްފި. ކުރީގެ ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގެންނެވި މި ޖަލްސާގައި، ގާނޫނުއަސާސީން ލިބިދޭ ހައްގުތައް ހިމާޔަތްކުރުމަށްޓަކައި އަންނަ ހޮނިހިރު ދުވަހު ނަގާ ފެންނަ ނުފެންނަ ވޯޓުގައި "ނޫނެކޭ" ބުނުމަށް އެ ޕާޓީން ވަނީ ރައްޔިތުންނަށް އިލްތިމާސްކޮށްފަ.
ފެންނަ ނުފެންނަ ވޯޓާއި ގުޅޭގޮތުން ރައްޔިތުންނަށް މައުލޫމާތު ދިނުމަށް އެމްޑީޕީ އިން ބޭއްވިި ޕިކަޕް ޖަލްސާ ތަކުގެ ފަހު ޖަލްސާ ގެ ތެރެއިން | އެމްޑީޕީ ސެކްރިޓޭރިއެޓް
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ފެންނަ ނުފެންނަ ވޯޓެއް ނެގުމަށް ސަރުކާރުން ކުރަމުންދާ މަސައްކަތާ ދެކޮޅަށް، އިދިކޮޅު އެމްޑީޕީން ސިލްސިލާކޮށް ބާއްވަމުންދިޔަ ޕިކަޕް ޖަލްސާތައް ބުރާސްފަތި ދުވަހު ނިންމާލައިފި އެވެ.
މި ސިލްސިލާގެ އެންމެ ފަހު ޖަލްސާ ބާއްވާފައިވަނީ ބުރާސްފަތި ދުވަހުގެ ހަވީރު މާލޭގެ މާރުކޭޓް ސަރަހައްދުގަ އެވެ.
މި ޕިކަޕް ޖަލްސާގައި ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުރުން، އެމްޑީޕީގެ އިސް ސަފުގައި ހަރަކާތްތެރިވާ ގިނަ ބޭފުޅުން ބައިވެރިވެވަޑައިގެންނެވި އެވެ. މީގެ އިތުރުން ކުރިއަށް އޮތް ލޯކަލް ކައުންސިލް އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި މާލޭގެ ދާއިރާތަކަށް އެމްޑީޕީގެ ފަރާތުން ވާދަކުރައްވާ ކެނޑިޑޭޓުން ވެސް މި ހަރަކާތުގައި ބައިވެރިވެވަޑައިގެންފައިވެ އެވެ.
ފެންނަ ނުފެންނަ ވޯޓާއި ގުޅޭގޮތުން ރައްޔިތުންނަށް މައުލޫމާތު ދިނުމަށް އެމްޑީޕީ އިން ބޭއްވިި ޕިކަޕް ޖަލްސާ ތަކުގެ ފަހު ޖަލްސާ ގެ ތެރެއިން
މި ޖަލްސާގައި ވާހަކަދެއްކެވި އެމްޑީޕީގެ އިސް ބޭފުޅުން ވަނީ ދެ އިންތިހާބު އެއްކޮށްލުމާ ދެކޮޅަށް ރައްޔިތުން "ނޫނެކޭ" ބުނަންޖެހޭ ސަބަބުތައް ވަރަށް ތަފްސީލުކޮށް ހާމަކޮށްދެއްވާފަ އެވެ. އެ ބޭފުޅުން ތުހުމަތު ކުރެއްވި ގޮތުގައި، ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް މި ސަރުކާރުން މަސައްކަތް ކުރަމުންދަނީ ހީލަތްތެރި ރޭވުމެއްގެ ދަށުން ވެރިކަމުގެ ދައުރު ދަންމާލުމުގެ ބޭނުމު ގައެވެ.
ޖަލްސާގެ ބައިވެރިން ވިދާޅުވީ، ގާނޫނުއަސާސީ އަށް ބަދަލުތައް ގެނައުމަކީ ކުޅޭ ކުޅިވަރަކަށް ހަދައިގެން ރައީސް ޑރ. މުހައްމަދު މުއިއްޒުގެ ސަރުކާރުން މަސައްކަތް ކުރައްވަނީ ރާއްޖޭގައި ދިގު ޒަމާންތަކަކަށް ދެމިގެންދާނެ ހުދުމުހުތާރު ވެރިކަމެއް ގާއިމްކުރުމަށް ކަމަށެވެ. މިއީ ރާއްޖޭގެ ޑިމޮކްރަސީއަށް އޮތް ބޮޑު ނުރައްކަލެއްގެ ގޮތުގައި އެ ބޭފުޅުން ސިފަކުރެއްވި އެވެ.
ފެންނަ ނުފެންނަ ވޯޓާއި ގުޅޭގޮތުން ރައްޔިތުންނަށް މައުލޫމާތު ދިނުމަށް އެމްޑީޕީ އިން ބޭއްވިި ޕިކަޕް ޖަލްސާ ތަކުގެ ފަހު ޖަލްސާ ގެ ތެރެއިން
އެހެންކަމުން، އެތައް ބައެއްގެ ބުރަ މަސައްކަތުންނާއި ގުރުބާނީން ގެނެސްފައިވާ ގާނޫނުއަސާސީން ދިވެހި ރައްޔިތުންނަށް ލިބިދީފައިވާ ހައްގުތައް ކަށަވަރުކުރުމަށްޓަކައި، އަންނަ ހޮނިހިރު ދުވަހު ނަގާ ފެންނަ ނުފެންނަ ވޯޓުގައި ހުރިހާ ރައްޔިތުން ވެސް ނުކުމެ "ނޫނެކޭ" ބުނުމަށް އެމްޑީޕީގެ ލީޑަޝިޕުން ވަނީ އިލްތިމާސްކޮށްފަ އެވެ.
ފެންނަ ނުފެންނަ ވޯޓާއި ގުޅޭގޮތުން ރައްޔިތުންނަށް މައުލޫމާތު ދިނުމަށް އެމްޑީޕީ އިން ބޭއްވިި ޕިކަޕް ޖަލްސާ ތަކުގެ ފަހު ޖަލްސާ ގެ ތެރެއިން
މި ޕިކަޕް ޖަލްސާތަކަކީ ދެ އިންތިހާބު އެއްކޮށްލުމާ ގުޅޭގޮތުން ރައްޔިތުން ހޭލުންތެރިކުރުވުމަށާއި، ސަރުކާރުގެ ނިންމުމާ ދެކޮޅަށް ރައްޔިތުންގެ މެދުގައި ހިޔާލު އުފެއްދުމަށް އެމްޑީޕީން ކޮންމެ ދުވަހަކު ހަވީރު ސިލްސިލާކޮށް ކުރިއަށް ގެންދިޔަ ހަރަކާތްތަކެކެވެ. މި ހަރަކާތްތައް ނިންމާލާފައިވަނީ ވަރަށް ބޮޑު ތަރުހީބަކާއެކުގަ އެވެ.
