އިންތިހާބު ކާމިޔާބުކުރަން ސަރުކާރުން ތެޅިފޮޅެނީ ވޭތުވެދިޔަ 2 އަހަރާއި ބައިގެ ތެރޭގައި ފެއިލްވުމުން: ރައީސް ސޯލިހު
މި ސަރުކާރުގެ ސިޔާސަތުތައް ގޯސްވެ، ވީ ވައުދުތައް ނުފުއްދޭތީ ރައްޔިތުންގެ ބޮޑެތި ޝަކުވާތަކެއް ހުރިކަން ކުރީގެ ރައީސް އިބްރާހިމް މުހައްމަދު ސޯލިހު ފާހަގަކުރެއްވި. މީގެ އިތުރުން، މިނިވަން މުއައްސަސާތަކުގެ ބާރު ކަނޑުވާލައި، ހުރިހާ ބާރެއް މުށުތެރެއަށް ޖަމާކުރުމަށް ސަރުކާރުން މަސައްކަތް ކުރަމުންދާ ކަމަށް އެމަނިކުފާނު ތުހުމަތުކުރެއްވި. އެހެންކަމުން، ސަރުކާރު ޖަވާބުދާރީ ކުރުވުމަށްޓަކައި ކުރިއަށް އޮތް އިންތިހާބުގައި އެމް.ޑީ.ޕީ.ގެ ކެންޑިޑޭޓުންނަށް ވޯޓު ދެއްވުމަށް ރައީސް ސޯލިހު އިލްތިމާސްކުރެއްވި.
ހުޅުމާލޭގައި ބޭއްވި "ހޭވައްލާ ތައްޔާރު ހުޅުމާލެ ޖަލްސާ" ގައި ކުރީގެ ރައީސް އިބްރާހިމް މުހައްމަދު ސޯލިހު ވާހަކަފުޅު ދައްކަވަނީ. | ރާއްޖެ އެމްވީ
ހޮނިހިރު ދުވަހު ބޭއްވުމަށް ހަމަޖެހިފައިވާ އިންތިހާބު ކާމިޔާބުކުރުމަށްޓަކައި ސަރުކާރުން އިންތިހާއަށް މަސައްކަތްކޮށް "ތެޅިފޮޅެމުން" ދަނީ ވޭތުވެދިޔަ ދެ އަހަރާއި ބައިގެ ތެރޭގައި މުޅި ސަރުކާރު ފެއިލްވެފައިވާތީ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ "ހޭވައްލާ ތައްޔާރު ހުޅުމާލެ ބޮޑު ޖަލްސާ" ގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ ކެމްޕެއިންގެ ތެރެއިން ރާއްޖޭގެ ގިނަ ރަށްތަކަކަށް ދަތުރުކުރެއްވިއިރު ރައްޔިތުންގެ ފަރާތުން އިވެނީ މުޅިން ތަފާތު އަޑެއް ކަމަށެވެ. މި ސަރުކާރު ކަމަކުނުދާ ކަމަށާއި، ސަރުކާރުގެ ސިޔާސަތުތައް ގޯސްވެފައިވާ ކަމުގެ ޝަކުވާ ކޮންމެ ދިމާއަކުންވެސް އިވެމުންދާ ކަމަށް އެމަނިކުފާނު ފާހަގަކުރެއްވި އެވެ. އަދި ސަރުކާރުން ރައްޔިތުންނަށް ކަމުދާ އެއްވެސް ކަމެއް ކޮށްދީފައި ނުވާކަމަށްވެސް ރައީސް ސޯލިހު ވިދާޅުވިއެވެ.
މި ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވަނީ، ރައްޔިތުންގެ މި ޝަކުވާތަކަށް އަމަލީ ސިފައެއް ގެނައުމަށްޓަކައި އެޕްރީލް މަހުގެ ހަތަރު ވަނަ ދުވަހު ނިކުމެ އެމް.ޑީ.ޕީގެ ކެންޑިޑޭޓުންނަށް ވޯޓު ދެއްވުމަށް އިލްތިމާސްކުރައްވާފަ އެވެ. މި އިންތިހާބުގެ ކެމްޕެއިންގެ ފޯރި ހުރި ގޮތުން، މިއީ ރިޔާސީ އިންތިހާބެއްގެ ކެމްޕެއިންތޯ ނުވަތަ މަޖިލިސް އިންތިހާބެއްގެ ކެމްޕެއިންތޯ ބައެއް ފަހަރު ހިތަށް އަރާވަޑައިގަންނަވާ ކަމަށްވެސް އެމަނިކުފާނު ވިދާޅުވި އެވެ.
އަޅުގަނޑު ބައެއް ފަހަރު ހިތަށްއަރާ މި ކުރެވުނީ ރިޔާސީ އިންތިޚާބުގެ ކެމްޕެއިންބާއޭ. ނޫނިއްޔާ ރައްޔިތުންގެ މަޖިލީހުގެ ކެމްޕެއިންބާއޭ. އެހާވެސް ހަރަކާތްތައް ގިނަ މުޅި ރާއްޖޭގައި ހަރަކާތްތައް ގިނަ. އަދި މާލޭގައި ވެސް އެހާ ހަރަކާތް ގިނަ. އިންތިޚާބަކަށް ވާދަވެރި ކެމްޕޭނަކަށް މިއީ ކެމްޕޭން ވެގެން ހިނގައްޖެ. މާލޭގައި ބަހައްޓާފައި ހުރި ފޮޓޯތަކަށް ބެލިޔަސް، ދަމާހުރި ދިދައަށް ބެލިޔަސް މި ހީވަނީ ރާއްޖޭގެ ރައީސުލްޖުމްހޫރިއްޔާއެއް ހޮވަން އުޅޭނީ. ގައިމު މުހިންމު އިންތިޚާބަކަށް ވެއްޖެ. ސަރުކާރަށް ވެސް، ރައްޔިތުންނަށްވެސް އެކަން އަޅުގަނޑުމެންނަށް ފެނޭ. ސަބަބަކީ ކޮބައިތޯ؟ މި ވޭތުވެދިޔަ ދެ އަހަރު ބައިގެތެރޭގައި ރައްޔިތުން އިންތިޚާބުކުރި ސަރުކާރުން ފެއިލްވެފައިވާކަން. ކޮންކަމެއްތޯ ވީ ވަޢުދާ އެއްގޮތަށް ކުރެވިފައި އޮތީ؟ ފުރަތަމަ ދުވަހު ވަޑައިގެން ކުރައްވަން ފެއްޓެވި ކަންތައްތައް. މިނިވަން މުއައްސަސާތަކުގެ ބާރުތައް ކަނޑާލީ.ކުރީގެ ރައީސް އިބްރާހިމް މުހައްމަދު ސޯލިހު
ސަރުކާރުގެ އަމަލުތަކަށް ފާޑުވިދާޅުވަމުން ރައީސް ސޯލިހު ވިދާޅުވީ، ރައީސް ޑރ. މުއިއްޒު ވެރިކަމަށް ވަޑައިގެން ފުރަތަމަ ދުވަހުން ފެށިގެންވެސް މަސައްކަތް ކުރެއްވީ މިނިވަން މުއައްސަސާތަކުގެ ބާރުތައް ކަނޑުވާލައި، ހުރިހާ ބާރެއް މުށުތެރެއަށް ޖަމާކުރަން ކަމަށެވެ. ހާއްސަކޮށް އޭ.ސީ.ސީ އާއި އިލެކްޝަންސް ކޮމިޝަން ފަދަ މުއައްސަސާތަކުގެ މިނިވަންކަން ގެއްލުވާލާފައިވާ ކަމަށާއި، އެ މުއައްސަސާތަކުން ރައްޔިތުންނަށް މައުލޫމާތު ދިނުމުގެ ބަދަލުގައި ރައީސް ވިދާޅުވާ ގޮތަށް ކަންކަން ކުރަމުންދާ ކަމަށް އެމަނިކުފާނު ވިދާޅުވި އެވެ.
މީގެ އިތުރުން، ޝަރުއީ ދާއިރާއަށް ބާރު ފޯރުވުމާއި، ރައްޔިތުންގެ މަޖިލީހުގެ ބާރު ކަނޑުވާލުމަށްޓަކައި މަޖިލީހުން ފާސްކުރި ގާނޫނުގެ މައްސަލަ ސުޕްރީމް ކޯޓަށް ހުށަހެޅި ނަމަވެސް ކޯޓަށް ނުފޫޒު ފޯރުވައި އެކަން ބަލަންތިބި ފަނޑިޔާރުން ވެސް މަގާމުން ދުރުކޮށްފައިވާ ކަމަށް ސޯލިހު ވިދާޅުވި އެވެ. އަދި ސަރުކާރުން ވައުދުތައް ނުފުއްދައި، ދޮގު ހަދަމުންދާ ކަމަށާއި، މުޅި ރާއްޖެއިން އިވެމުންދަނީ މި ސަރުކާރު ގޯސްވެފައިވާ ކަމުގެ އަޑުތައް ކަމަށް ވިދާޅުވެ ރައީސް ސޯލިހު ވިދާޅުވި އެވެ.
