ކުޅުދުއްފުށީގެ އެއާރޕޯޓް ސަރަހައްދުގެ ގޯތިތައް އިމާރާތްކުރުމަށް ދިމާވެފައިވާ މައްސަލައަށް ރިލޮކޭޝަން ޕްލޭނެއް އެކުލަވާލާނަން: ރޯޒޭ
ކުޅުދުއްފުށީގެ އެއަރޕޯޓް ސަރަހައްދުގައި އުސްކޮށް އިމާރާތް ނުކުރެވޭ މައްސަލައަކީ ސިވިލް އޭވިއޭޝަންގެ އުސޫލުތަކާ ގުޅިގެން ދިމާވެފައިވާ ކަމެއް ކަމަށާއި މި ނިންމުމުގެ ސަބަބުން ރައްޔިތުންނަށް ކުރިމަތިވާ ދަތިތަކަށް ހައްލެއް ހޯދައިދިނުމުގެ ގޮތުން، އެފަދަ ގޯތިތަކަށް ޚާއްޞަ "ރިލޮކޭޝަން ޕްލޭން" އެއް ސިޓީ ކައުންސިލުން އެކުލަވާލާނެ ކަމުގެ ޔަގީންކަން އެ ސިޓީގެ ޑެޕިއުޓީ މޭޔަރ އަހުމަދު އަބްދުﷲ ދެއްވި.
ކުޅުދުއްފުށި ސިޓީގެ ޑެޕިއުޓީ މޭޔަރ އަހުމަދު އަބްދުالله (ރޯޒޭ) | އެމްޑީޕީ ކުޅުދުއްފުށި ސިޓީ
ކުޅުދުއްފުށީގެ އެއަރޕޯޓާއި އިންވެގެން ހުރި ގޯތިތަކުގައި އިމާރާތް ކުރުމަށް އޮތް ހުރަސްތަކާ ގުޅިގެން، އެ ސަރަހައްދުގެ ގޭބިސީތަކަށް ޚާއްޞަ "ރިލޮކޭޝަން ޕްލޭން" އެއް ހަދައިދޭނެ ކަމަށް ކުޅުދުއްފުށި ސިޓީގެ ޑެޕިއުޓީ މޭޔަރ އަޙުމަދު އަބްދުﷲ (ރޯޒޭ) ވިދާޅުވެއްޖެއެވެ.
އެމްޑީޕީން ބޭއްވި "ސިޔާސަތު ޖަލްސާ 2" ގައި ވާހަކަދައްކަވަމުން ޑެޕިއުޓީ މޭޔަރ ވިދާޅުވީ، އެއަރޕޯޓާއި އިންވެގެން ހުރި ގޯތިތަކުގައި އުސްކޮށް އިމާރާތް ނުކުރެވޭ މައްސަލައަކީ ސިޓީ ކައުންސިލުން ކުރާ ކަމެއް ކަމަށް ބުނެ އިދިކޮޅު ފަރާތްތަކުން ދޮގު މައުލޫމާތު ފަތުރަމުންދާ ކަމަށެވެ. އަދި މިކަމުގެ ހަގީގަތް ރައްޔިތުންނަށް ސާފުކޮށްދެއްވަމުން ރޯޒޭ ވިދާޅުވީ، މިއީ ސަރުކާރުގެ ކަމާބެހޭ އިދާރާތަކުން އަމަލުކުރަމުންދާ އުސޫލުތަކެއްގެ ސަބަބުން ދިމާވެގެން އުޅޭ މައްސަލައެއް ކަމަށާއި, އެއަރޕޯޓް އެންމެ ފުރަތަމަ އެޅިއިރު އިމާރާތް ކުރުމުގެ އުނދަގޫ ފޯރާނެ ކަމަށް ލަފާކުރި މިންވަރަށްވުރެ، މިހާރު ސަރުކާރުން ކަނޑައަޅާފައިވާ ސަރަހައްދު ދެގުނަ ބޮޑުކަމަށެވެ.
"އެއަރޕޯޓް ކައިރީގައި ހުންނަ ގޭތަކުން އިމާރާތް ކުރުމުގެ ހުއްދައަށް އެދުމުން، ގަވާއިދު ބުނާގޮތުން ސިވިލް އޭވިއޭޝަން އޮތޯރިޓީގެ ހުއްދަ ހޯދަންޖެހޭ. ފަސްބުރިއަށް އިމާރާތް ކުރަން އެދުނު ގެއަކަށް ސިވިލް އޭވިއޭޝަނުން ހުއްދަ ދިނީ އެންމެ ދެބުރިއަށް." ރޯޒޭ ވިދާޅުވިއެވެ.
މި މައްސަލައާ ގުޅިގެން ސިވިލް އޭވިއޭޝަނާއެކު ސިޓީ ކައުންސިލުން ބޭއްވި ބައްދަލުވުމުގައި، އެއަރޕޯޓް ރަންވޭގެ އިރުމަތީ ކޮޅުން ހުރަހަށް ރޮނގެއް ދަމާލުމަށްފަހު، އެ ސަރަހައްދުގެ އެއްވެސް ގެއެއް ދެބުރިއަށްވުރެ އުސްކޮށް އިމާރާތް ނުކުރެވޭނެ ކަމަށް އެ ފަރާތުން ބުނެފައިވާ ކަމަށާއި, 2025 އޮކްޓޯބަރުގައި ލިބުނު ސިޓީއަކާއެކު ފޮނުވި ޗާޓުން، މި ނިންމުމަކީ އެއްވެސް ހަމައެއް ނެތް، ސިޔާސީ ބޭނުމެއްގައި ކުރާ ކަމެއްކަން ހާމަވާ ކަމަށްވެސް ޑެޕިއުޓީ މޭޔަރ ފާހަގަކުރެއްވިއެވެ.
އަޅުގަނޑުމެން މި ބުނަނީ, އެއްވެސް އުޞޫލެއް ޤަވާއިދެއް ނެތްކަމުގައި ވަންޏާމުން, އެހެނެއް ނުހެދޭނެއޭ. ހަމަ އެންމެ ފުރަތަމަވެސް އެއަރޕޯޓު އެޅި އިރުގައި އެ ގެއްލުންވާނެއޭ ބުނި ހިސާބުތަކަށޭ ގެއްލުންވާނީ, އޭގެ ބޭރަށް އެއްވެސް ގެއްލުމެއް ވެގެން ނުވާނެ. މިއީ އަޅުގަނޑުމެން ކައުންސިލްގެ ސްޓޭންޑަކީ.ކުޅުދުއްފުށި ސިޓީގެ ޑެޕިއުޓީ މޭޔަރ އަޙުމަދު އަބްދުﷲ (ރޯޒޭ)
ސިޓީ ކައުންސިލްގެ ސްޓޭންޑް ސާފުކޮށްދެއްވަމުން ރޯޒޭ ވިދާޅުވީ، އެއަރޕޯޓް އެޅިއިރު ގެއްލުންވާނެ ކަމަށް ބުނި ހިސާބުން ބޭރަށް އެއްވެސް އަސަރެއް ކޮށްގެން ނުވާނެ ކަމަށެވެ. އަދި މިގޮތުން އެއަރޕޯޓްގެ ސަބަބުން އަސަރުކުރާނެ ކަމަށް ބުނާ ގޯތިތަކަށް "ރިލޮކޭޝަން ޕްލޭން" އެއް ސިޓީ ކައުންސިލުން އެކުލަވާލައިދޭނެ ކަމުގެ ޔަގީންކަން ވެސް ޑެޕިއުޓީ މޭޔަރ ވަނީ ދެއްވާފައެވެ.
އެމްޑީޕީން ބޭއްވި ސިޔާސަތު ޖަލްސާތަކުގައި ސަރުކާރުގެ އިހުމާލުން ކުޅުދުއްފުށީގެ ތަރައްޤީއަށް ހުރި ހުރަސްތަކާއި، ރައްޔިތުންގެ ކަންބޮޑުވުންތަކަށް ހައްލު ހޯދައިދިނުމަށް ސިޓީ ކައުންސިލުން ކުރަމުންދާ މަސައްކަތްތަކުގެ މައްޗަށްވެސް ވަނީ އަލިއަޅުވާލާފައެވެ.
