ރައީސް މުއިއްޒު އަށް ރިޔާސީ އިންތިޚާބު ކާމިޔާބު ކުރެވޭނެ ފޯމިއުލާ އެއް ނެތް، ދެ އިންތިޚާބު އެއްކޮށްލުމުގެ ބޭނުމަކީ އެ ކަމަށް ނުފޫޒު ފޯރުވުން: ރައީސް ސޯލިހު
ރެފަރެންޑަމް ވޯޓަކީ ހެޔޮ ބަދަލެއް ގެނައުމުގެ ނިޔަތުގައި ކުރި ކަމެއް ނޫން ކަމަށް ރައީސް ސޯލިހު ވިދާޅުވި. މީގެ އިތުރުން، ވޯޓުލާ މީހުން މަދު ލޯކަލް ކައުންސިލް އިންތިޚާބާ ދިމާކޮށް އަދި ރައްޔިތުންނަށް ދަތިވާނެހެން ފުރުޞަތުތައް ހަނިކޮށްފައިވާ ދަނޑިވަޅެއްގައި ރެފަރެންޑަމަކަށް ދިއުމަކީ ބަލައިގަނެވޭނެ ކަމެއް ނޫން ކަމަށް ވެސް އެމަނިކުފާނު ފާހަގަކުރެއްވި.
ކުރީގެ ރައީސް އިބްރާހިމް މުހައްމަދު ސޯލިހު، ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ބައިވެރިވެވަޑައިގެން ވާހަކަދައްކަވަނީ | ރާއްޖެ އެމްވީ
ރައީސް ޑރ. މުހައްމަދު މުއިއްޒު އަށް ކުރިއަށް އޮތް ރިޔާސީ އިންތިޚާބު ކާމިޔާބު ކުރެވޭނެ ފޯމިއުލާ އެއް ނެތް ކަމަށާއި ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމުގެ ބޭނުމަކީ އެ ކަމަށް ނުފޫޒު ފޯރުވުން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެ މަނިކުފާނު އެފަދައިން ވިދާޅުވީ ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުންނެވެ.
ސަރުކާރުން ދެ އިންތިޚާބު އެއްކޮށްލަނީ ޚަރަދު ކުޑަކުރަން ކަމަށް ބުނި ނަމަވެސް އެކަމުގެ ފަހަތުގައި ފޮރުވިފައި ހުރި ވަރަށް ގިނަ ސިއްރުތަކެއް ހުރި ކަމަށް ރައީސް ސޯލިހު ވަނީ ވިދާޅުވެފަ އެވެ. ރެފަރެންޑަމްގެ މަގްސަދުގެ ގޮތުގައި ބޭރުން ދައްކާ މަގްސަދު ނޫން މަގްސަދެއް މިކަމުގެ ފަހަތުގައި ވާ ކަމަށް އެ މަނިކުފާނު ވަނީ ތުހުމަތު ކުރައްވާފަ އެވެ. ރައީސް ސޯލިހު ވަނީ އިންތިޚާބުތައް އެއްކޮށްލަނީ ޚަރަދު ކުޑަކުރަން ކަމަށް ސަރުކާރުން ބުނަނީ އޮޅުވާލަން ކަމަށް ވެސް ވިދާޅުވެފަ އެވެ.
މީގެ އިތުރުން، ރެފަރެންޑަމް ވޯޓަކީ ހެޔޮ ބަދަލެއް ގެނައުމުގެ ވިސްނުމުގައި ކޮށްފައިވާ ކަމެއް ނޫން ކަމަށް ރައީސް ސޯލިހު ވިދާޅުވި އެވެ. އެގޮތުން މި ވެރިކަމުގެ ކުރީކޮޅު ރައްޔިތުންގެ މަޖިލީހުގެ ބަސް ބުނުމުގެ ބާރު ގާނޫނީ ގޮތުން ކަނޑުވާލާފައިވާ ކަމަށާއި މެމްބަރުން ޕާޓީ އިން ބުނާ ގޮތަށް ވޯޓުދީ، ޕާޓީން ބުނާ ގޮތަށް އަމަލުކުރަން މަޖުބޫރު ވާގޮތަށް ޤާނޫނު ބަދަލުކޮށްފައިވާކަން އެ މަނިކުފާނު ފާހަގަކުރެއްވި އެވެ. އެ ހިސާބުން ޕާޓީ އިން ވަކި ގޮތަކަށް ކަމެއްގައި ނިންމައިފި ނަމަ އެ މެމްބަރަކަށް އަމިއްލަ ހިޔާލު ފާޅު ނުކުރެވޭނެ ކަމަށް ރައީސް ސޯލިހު ވިދާޅުވި އެވެ.
"އަޅުގަނޑަށް ޔަގީން މެމްބަރުންގެ ތެރެއިން ވަރަށް ގިނަ ބޭފުޅުން ރެފަރެންޑަމްގައި ނޫނެކޭ ވިދާޅުވާނެ. އެކަމަކު އެ ދުވަހު މަޖިލީހުގައި އެކަން ކުރަން، ކެރިވަޑައި ނުގަތީ. އެ އޮތީ ވިޕްލައިނެއް ބްރޭކްކޮށްފިއްޔާ ޕާޓީއަކުން ވަކި ގޮތެއް ނިންމައިފިއްޔާ އެ އާއި އިދިކޮޅަށް ވޯޓު ދީފިއްޔާ ޕާޓީން ވަކި ކުރީމަ ގޮނޑި ގެއްލޭނެ. އެއީ ނޫންތޯ މިކަން ފެށުނު ގޮތަކީ؟" ރައީސް ސޯލިހު ވިދާޅުވި އެވެ.
ލޯކަލް ކައުންސިލް އިންތިޚާބަކީ ނިސްބަތުން އެންމެ މަދު މީހުން ވޯޓުލާ އިންތިޚާބަށް ވާއިރު އެ އިންތިޚާބާއި ދިމާކޮށް ރެފަރެންޑަމް ވޯޓު ބާއްވާ ސަބަބާއި މެދު އެ މަނިކުފާނު ވަނީ ސުވާލު އުފައްދަވާފަ އެވެ. ، ވޯޓު ފޮށިތައް މަދުކޮށް، ރައްޔިތުންނަށް ދަތިވާނޭހެން ފުރުޞަތު ހަނިކޮށްފައިވާ ދަނޑިވަޅެއްގައި ރިފަރެންޑަމަކަށް ދިއުމަކީ ބަލައިގަނެވޭނެ ކަމެއް ނޫން ކަމަށް ރައީސް ސޯލިހު ވަނީ ވިދާޅުވެފަ އެވެ.
