ފެންނަ ނުފެންނަ ވޯޓަކީ ލާމަރުކަޒީ ނިޒާމު ރޫޅާލައި، ރައްޔިތުންނަށް ބަސްބުނުމާއި ގޮތްކިޔުމުގެ ބާރު ނައްތާލުމަށްޓަކައި ނަގާ ވޯޓެއް: ސޯލިހު

އަންނަ އެޕްރީލް މަހުގެ ހަތަރު ވަނަ ދުވަހު ބޭއްވުމަށް ނިންމާފައިވާ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާ ގުޅޭ ފެންނަ ނުފެންނަ ވޯޓަކީ، ރާއްޖޭގެ ލާމަރުކަޒީ ނިޒާމު ރޫޅާލައި ރައްޔިތުންނަށް ބަސްބުނުމާއި ގޮތްކިޔުމަށް އޮތް ބާރު ނައްތާލުމަށް ރައީސް ޑރ. މުހައްމަދު މުއިއްޒުގެ ސަރުކާރުން ކުރިއަށްގެންދާ ރޭވުމެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެމްޑީޕީން ކުޅުދުއްފުށީގައި ބޭއްވި "ކުޅުދުއްފުށި ސިޓީ ތިލަފަތަށް" ޖަލްސާގައި ވާހަކަފުޅު ދައްކަވަމުންނެވެ.

ކުޅުދުއްފުށީގެ ރައްޔިތުންނާ މުޚާތަބު ކުރައްވައި ރައީސް ސޯލިހު ވިދާޅުވީ، ކުރިއަށް އޮތް ވޯޓާ މެދު ރައްޔިތުން އަމިއްލަ ސިކުނޑިން ފުންކޮށް ވިސްނަންޖެހޭ ކަމަށެވެ. މި ސަރުކާރު ވެރިކަމާ ހަވާލުވި ފަހުން މިހާރު ދެ އަހަރާއި ހަތަރު މަސް ވެފައިވާއިރު، ކުޅުދުއްފުށި ސިޓީއަށާއި ރާއްޖޭގެ އެހެން ރަށްތަކަށް ސަރުކާރުން ވެފައިވާ އިހުމާލުތައް ވަރަށް ބޮޑަށް ފެންނަން އެބައޮތް ކަމަށް އެމަނިކުފާނު ފާހަގަކުރެއްވި އެވެ. އަދި ރައްޔިތުން ވެރިކަމެއް ބަދަލުކުރަނީ ކުރިއަށް ވުރެ ރަނގަޅު ޚިދުމަތްތަކެއް ލިބޭނެ ކަމުގެ އުއްމީދުގައި ކަމަށާއި ނަމަވެސް، މި ސަރުކާރުން ވެފައިވާ ވައުދުތައް ފުއްދަމުން ނުދާ ކަމަށް ސޯލިހު ވިދާޅުވި އެވެ.

ރައީސް ސޯލިހުގެ ވާހަކަފުޅުގައި މި ސަރުކާރުން ދައުލަތުގެ މިނިވަން މުއައްސަސާތަކުގެ ބާރު ކަނޑުވާލައި، މުޅި ނިޒާމު ރައީސުލްޖުމްހޫރިއްޔާގެ މުށުތެރެއަށް ގެންނަން މަސައްކަތް ކުރަމުންދާ ކަމަށް ތުހުމަތު ކުރެއްވި އެވެ. އެގޮތުން އެންޓި ކޮރަޕްޝަން ކޮމިޝަނާއި އިލެކްޝަންސް ކޮމިޝަންގެ ރައީސުން އައްޔަން ކުރުމުގައި އޮތް މިނިވަންކަން ނައްތާލައި، ރައީސުލްޖުމްހޫރިއްޔާ ބޭނުންވާ ބަޔަކު އެ މަގާމުތަކަށް އައްޔަން ކުރެވޭ ގޮތަށް ގާނޫނަށް ބަދަލު ގެނެސްފައިވާ ކަމަށް އެމަނިކުފާނު ވިދާޅުވި އެވެ. މިއީ ޖަވާބުދާރީ ކުރުވުމުގެ ނިޒާމު ރޫޅާލުމަށް ކުރާ މަސައްކަތެއްގެ ގޮތުގައި އެމަނިކުފާނު ސިފަކުރެއްވި އެވެ.

އިލެކްޝަންސް ކޮމިޝަންގެ ރައީސަކު ހޮވުމަށް ވެސް އޭރު އޮތް މިނިވަންކަން ނައްތާލައި، ރައީސުލްޖުމްހޫރިއްޔާ އިޚްތިޔާރުކުރާ މީހަކު އެތަނަށް އާދެވޭ ގޮތަށް ގެނައި ބަދަލު. މުޅި ނިޒާމު ޚަރާބުކުރުމުގެ މަސައްކަތް ކުރިއަށް ގެންދިޔައީ. ޖަވާބުދާރީކުރުވުމުގެ މުޅި ނިޒާމު އެ މަނިކުފާނު އެ ގެންދަނީ ރޫޅާލަމުން. ދެން ކުރެއްވި ކަމަކީ ތިޔަބޭފުޅުން، ރައްޔިތުންގެ މަޖިލީހަށް އިންތިޚާބުކުރެއްވި ތިޔަބޭފުޅުންގެ މަންދޫބުންގެ ބާރު ކަނޑުވާލުން. ހަމައެކަނި މަޖިލީހުގައި ވޯޓެއް ލެވޭނީ ޕާޓީއަކުން އަންގާ ގޮތް ނޫން ގޮތަކަށް ވޯޓު ނުލެވޭނެ ގޮތަށް އެ ބަދަލުކުރުން. މިނިވަން ކަމާ އެކު ކޮށްފި ނަމަ، ގޮނޑި ގެއްލޭނެކަމުގައި ގާނޫނުގައި ކަނޑައަޅައި ނިންމީ. ރައްޔިތުންގެ ބަސް މުޅިން ރައްޔިތުންގެ މަޖިލީހުން ކަނޑުވާލީ. 

ކުރީގެ ރައީސް އިބްރާހިމް މުހައްމަދު ސޯލިހު

މީގެ އިތުރުން، ރައްޔިތުންގެ މަޖިލީހުގެ މަންދޫބުންގެ ބާރު ކަނޑުވާލުމަށްޓަކައި، ޕާޓީން އަންގާ ގޮތާ ޚިލާފަށް ވޯޓުދީފި ނަމަ ގޮނޑި ގެއްލޭ ގޮތަށް ގާނޫނު ބަދަލުކޮށް، މަޖިލީހުން ރައްޔިތުންގެ ބަސް މުޅިން ކަނޑުވާލާފައިވާ ކަމަށް ސޯލިހު ވިދާޅުވި އެވެ. އަދި ޝަރުއީ ދާއިރާއަށް ރައްޔިތުންގެ އިތުބާރު އުފެދެމުން ދިޔަ ދަނޑިވަޅެއްގައި، ސުޕްރީމް ކޯޓުގެ ގާބިލު ދެ ފަނޑިޔާރަކު އޭސީސީ މެދުވެރިކޮށް ދަންވަރު ފޮނުވި ސިޓީއަކާ ގުޅުވައި ސަސްޕެންޑުކޮށް، އެ ކޯޓުގެ ބާރު ކަނޑުވާލާފައިވާ ކަމަށް ވެސް އެމަނިކުފާނު ވިދާޅުވި އެވެ.

ލާމަރުކަޒީ ނިޒާމާ ގުޅޭގޮތުން ވާހަކަދައްކަވަމުން ރައީސް ސޯލިހު ވިދާޅުވީ، ފަސް އަހަރަށް އިންތިޚާބުކޮށްފައި އޮތް ކައުންސިލެއްގެ ފަހު އަހަރު ރައްޔިތުންނަށް އެއްވެސް ކަމެއް ނުކުރެވޭ ގޮތަށް ގާނޫނަށް ބަދަލު ގެނައުމަކީ މި ނިޒާމު ފުނޑާލުން ކަމަށެވެ. އެތައް ބައެއްގެ ގުރުބާނީން ރާއްޖެއަށް ގެނައި ޑިމޮކްރެޓިކް ނިޒާމު އަނބުރާލައި، ގައުމު ޚުދުމުޚުތާރު ވެރިކަމަކަށް ބަދަލުކުރުމުގެ މަސައްކަތް ރައީސް މުއިއްޒު ކުރައްވަމުން ގެންދަވާ ކަމަށް އެމަނިކުފާނު ތުހުމަތު ކުރެއްވި އެވެ.

މިއީ މި ސަރުކާރުން، ރައީސް ޑޮކްޓަރ މުޢިއްޒު ވެރިކަމާ ހަވާލުވެ ވަޑައިގަތުމަށްފަހު މުޅި ނިޒާމަށް ގެންނަމުން ގެންދިޔަ ބަދަލުތައް. އަޅުގަނޑުމެން އެތައް ބަޔަކު، އެތައް ދުވަހަކު، އެތައް ޤުރުބާނެއް ވެގެން ރާއްޖެއަށް މި ގެނައި ނިޒާމު ސީދާ އަނެއްކޮޅަށް ޖެހުމުގެ މަސައްކަތް ކުރަނީ ޚުދުމުޚުތާރު ވެރިކަމަކަށް ރާއްޖެ ބަދަލުކުރުމުގެ މަސައްކަތް ކުރައްވަމުން ގެންދަވަނީ. މިއީ އަޅުގަނޑުމެންގެ ކުރިމަތީގައި އެޕްރީލު ހަތަރު ވަނަ ދުވަހު މި އޮތް ދެ މައްސަލައަކީ. އެއް ކަމަކީ، ލާމަރުކަޒީ ނިޒާމުން ސީދާ ރައްޔިތުންނާ ކައިރީގައި ތިބެގެން ރައްޔިތުންނަށް ޚިދުމަތްކުރުމަށްޓަކައި އުފެދިފައި އޮތް ނިޒާމު މުޅިން ރޫޅާލަން. އަނެއް ކަމަކީ، ރައްޔިތުންނަށް ބަސްބުނުމުގެ، ގޮތްކިޔުމުގެ ބާރު ނައްތާލުމަށްޓަކައި، ދެ އިންތިޚާބު އެކުގައި ބޭއްވުމަށްޓަކައި ރާވައިގެން ކުރިއަށްގެންދާ ރޭވުން. އެހެންވީމާ، މި ކަންތައްތަކާ ދޭތެރޭގައި ކުޅުދުއްފުށީގެ ރައްޔިތުން ހަމަގައިމު ވެސް ވިސްނަންވާނެ.

ކުރީގެ ރައީސް އިބްރާހިމް މުހައްމަދު ސޯލިހު

އެޕްރީލް ހަތަރު ވަނަ ދުވަހު އޮތް ވޯޓަކީ ރައްޔިތުންނާ ގާތުން ޚިދުމަތް ދިނުމަށް އޮތް ލާމަރުކަޒީ ނިޒާމު ރޫޅާލުމަށާއި، ރައްޔިތުންގެ ބަސްބުނުމުގެ ބާރު ނައްތާލުމަށް ރާވައިގެން ކުރިއަށްގެންދާ ކަމެއް ކަމަށް ސޯލިހު ވިދާޅުވި އެވެ. ނަމަވެސް ކުޅުދުއްފުށީގެ ރައްޔިތުންނަކީ ކަންކަމުގައި ކެރިގެން ބަސްބުނާ ބައެއް ކަމަށާއި، އެ ދުވަހު ނިކުމެ ސަރުކާރުގެ މި ސިޔާސަތުތަކަށް ރައްޔިތުން "ނޫނެކޭ" ބުނާނެ ކަމުގެ ފުރިހަމަ ޔަގީންކަން އެބައޮތް ކަމަށް ވިދާޅުވެ ރައީސް ސޯލިހު ވަނީ ވާހަކަފުޅު ނިންމަވާލައްވާފަ އެވެ.