ނޯޔާއަށް އަނެއްކާ ވެސް އަނިޔާވެ ދިގު މުއްދަތަކަށް ކުޅުމާ ދުރަށް!

ޖަރުމަނުގެ ބަޔާން މިޔުނިކަށް ކުޅެމުން އަންނަ އެޓީމުގެ ތަޖުރިބާކާރު އަދި ހުނަރުވެރި ގޯލްކީޕަރު މެނޮއެލް ނޯޔާ އަށް ލިބުނު އަނިޔާއަކާ ގުޅިގެން ދިގު މުއްދަތަކަށް ކުޅުމާ ދުރުގައި ހުންނަން ޖެހިއްޖެ ކަމަށް ބަޔާން މިޔުނިކުން ބުނެފިއެވެ.

މިކަމާ ގުޅިގެން ބަޔާންއިން ނެރުނު ބަޔާނެއްގައި ބުނެފައި ވަނީ ނޯޔާ އަށް ލިބުނު އަނިޔާއަކާ ގުޅިގެން ދިގު މުއްދަތަކަށް ކުޅުމާ ދުރުގައި ހުންނަން ޖެހިފައިވާ ކަމަށާއި އަންނަ އަހަރުގެ ޖެނުއަރީގެ ކުރިން ނޯޔާއަށް ކުޅުމުގެ ތެރެއަށް އެނބުރި ނާދެވޭނެ ކަމަށް ވެސް މި ބަޔާނުގައި ބުނެފައިވެއެވެ.

ބަޔާންއިން އާންމުކުރި ބަޔާނުގައި ބުނެފައި ވަނީ އަންގާރަ ދުވަހު އެޓީމުން ބޭއްވި ފަރިތަކުރުންތަކުގައި ނޯޔާގެ ވައަތު ފައިތިލައިގެ ކަށިގަނޑަށް ވަރަށް ބޮޑަށް ގެއްލުން ލިބިފައިވާ ކަމަށާއި އެހެން ކަމުން މިހާރު ވަނީ އޮޕަރޭޝަނެއް ވެސް ކޮށްފައި ކަމަށެވެ. މި އޮޕޮަރޭޝަނަށް ފަހު މަދުވެގެން ތިން މަސް ނުވަތަ ހަތަރު މަސްވަންދެން ނޯޔާ ކުޅުމާ ދުރުގައި ހުރުމަށް ޑޮކްޓަރުން ވެސް ލަފާދީފައިވާ ކަމަށް މިބަޔާނުގައި ވެއެވެ.

ނިމިގެން ދިޔަ ސީޒަނުގައި ވެސް ނޯޔާއަށް ވަނީ އަނިޔާގެ މައްސަލަ ކުރިމަތިވެ ދިގު މުއްދަތަކަށް ކުޅުމާ ދުރުގައި ހުންނަން ޖެހިފައެވެ. މިދިޔަ އަހަރު ނޯޔާއަށް އަނިޔާވީ ޗެމްޕިއަންސް ލީގުގެ ކުއާޓާ ފައިނަލްގައި ރެއާލް މެޑްރިޑާ ދެކޮޅަށް ކުޅުނު މެޗުގައެވެ. އޭގެ ފަހުން އެނބުރި ކުޅުމުގެ ތެރެއަށް އޭނާއަށް އާދެވިފައި ވަނީ މިދިޔަ އޯގަސްޓު މަހުގެ ތެރޭގައެވެ.އަނިޔާއިން ރަނގަޅުވެ ކުޅުމުގެ ތެރެއަށް އެނބުރި އައިސް ނޯޔާއަށް އަދި ކުޅެވުނީ އެންމެ ހަތަރު މެޗެވެ.

އޭނާ އަންނަނީ އެންމެ ފަހުގެ ޗެމްޕިއަން ބަޔާންގައި މޮޅުކުޅުމެއް ދައްކަމުންނެވެ. އެގޮތުން 2011 ވަނަ އަހަރުން ފެށިގެން ބަޔާންގެ ގޯލް ބަލަހައްޓަނީ އޭނާއެވެ.

ޖެހިޖެހިގެން ތިން ސީޒަނުގައި އެންމެ މޮޅު ގޯލް ކީޕަރުކަމުގެ މަގާމު ހޯދާފައިވާ ނޯޔާއަށް އަނިޔާވުމުން ދެން ބަޔާންގެ ގޯލު ބަލަހައްޓާނީ ބަޔާންގެ ބަދަލު ކީޕަރު ސީވަން އުރިޗް އެވެ.

ނޯޔާގެ އަނިޔާއާ ގުޅިގެން މީޑިއާއާ ވާހަކަދައްކަމުން ބަޔާންގެ ޗެއާމަން ކާލް ހެއިންޒް ވިދާޅުވީ ނޯޔާއަށް އަނިޔާވެ ދިގު މުއްދަތަކަށް ކުޅުމާ ދުރަށް ދާން ޖެހުމުން ކަންބޮޑުވާ ކަމަށެވެ. އަދި ނޯޔާއަށް ލިބުނު އަނިޔާއާ ގުޅިގެން މިހާރު ފައިގެ އޮޕަރޭޝަނެއް ވެސް ކޮށްފައިވާ ކަމަށާއި އެ އޮޕަރޭޝަން ވެސް ވަރަށް ކާމިޔާބު ކަމަށް އޭނާ ވިދާޅުވިއެވެ.

"މިއީ ނޯޔާއަށް މިފަދަ ބޮޑު އަނިޔާއެއް ލިބުނު ދެވަނަ ފަހަރު، އެހެންކަމުން މިހާ ކައިރި ކައިރީގައި އަނިޔާ ލިބި ކުޅުމާ ދުރުގައި ހުންނަން ޖެހުމުން ކަންބޮޑުވޭ. ނަމަވެސް ލިބުނު އަނިޔާއާ ގުޅިގެން ކުރި އޮޕަރޭޝަން ކާމިޔާބު. އަންނަ ޖެނުއަރީ މަހު ކުޅުމުގެ ތެރެއަށް އެނބުރި އާދެވޭނެ ކަމަށް ބެލެވޭ،" ހެއިންޒް ވިދާޅުވިއެވެ.

ނޯޔާގެ އިތުރުން މިވަގުތު އަނިޔާގައި ތިބި އެހެން ކުޅުންތެރިންނަކީ އާޔަން ރޮބަން، ޑޭވިޑް އަލަބާ އަދި ހުއާން ބާނެޓް ހިމެނެއެވެ.

މީގެ ތެރެއިން ރޮބެންއަށް ބަލިވުމުގެ ސަސަބުން ކުޅުމާ ދުރުގައި ހުންނަން ޖެހިފައިވާއިރު، އަލަބާ އަދި ބާނެޓަް ކުޅުމާ ދުރުގައި ހުރީ ފަޔަށް ލިބުނު އަނިޔާއެއްގެ ސަބަބުންނެވެ.