ވީޑިއޯ އެއް އާއްމުވެ ގިނަ ބައެއްގެ ފާޑު ކިޔުން އެޗްޑީސީއަށް އަމާޒުވުމުން، ވިނަރެސް ފްލެޓުގައި ހިންގި ލޯންޑްރީ ފެކްޓްރީ މަސައްކަތް ހުއްޓާލާ، މެޝިންތައް ނެގުމަށް 7 ދުވަހުގެ މުއްދަތެއް ދީފި
ވިނަރެސް ފްލެޓެއްގައި ގަވާއިދާ ހިލާފަށް ލޯންޑްރީ ފެކްޓްރީއެއް ހިންގާ މައްސަލަ ސޯޝަލް މީޑިއާގައި ފެންމަތިވުމާ ގުޅިގެން، އެ މަސައްކަތް ހުއްޓާލުމަށް އެޗްޑީސީން ވަނީ އަންގާފައި. އެގޮތުން އެތަނުގައި ހުރި މެޝިންތައް ނެގުމަށް 7 ދުވަހުގެ މުއްދަތެއް ދީފައިވާއިރު، އާންމުން ދިރިއުޅޭ ތަންތަނުގައި މިފަދަ ވިޔަފާރި ކުރުމަކީ މަނާކަމެއް ކަމަށް އެ ކޯޕަރޭޝަނުން ބުނޭ.
ހުޅުމާލެ ވިނަރެސް ފްލެޓެއްގައި ހިންގާ ފެކްޓްރީގައި ބަހައްޓާފައި ހުރި ދޮންނަ މެޝިންތައް. މިއީ ދައުރުވަމުންދާ ވީޑިއޯގެ ސްކްރީން ޝޮޓެއް. | ރާއްޖެއެމްވީ
ހުޅުމާލެ ވިނަރެސް ފްލެޓެއްގައި ލޯންޑްރީ ފެކްޓްރީ އެއް ހިންގާ މައްސަލަ ބޮޑުވުމާއެކު އެކަން ހުއްޓާލަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފި އެވެ.
އެޗްޑީސީން ބުނީ، ވިނަރެސް ފްލެޓުތަކަކީ މީހުން ދިރިއުޅުމަށް ދޫކޮށްފައިވާ ތަންތަން ކަމަށާއި، އެތަނުގައި މިފަދަ ވިޔަފާރިއެއް ނުހިންގޭނެ ކަމަށެވެ.
ރާއްޖެއެމްވީއަށް އެޗްޑީސީގެ ތަރުޖަމާން މުހައްމަދު ސިރާޖު ވިދާޅުވީ، ސޯޝަލް މީޑިއާގައި އާއްމުވި ވީޑީއޯއާއެކު މި މައްސަލަ ސަމާލު ކަމަށް އައިސްފައިވާ ކަމަށާއި، އެތަނުގައި އެމަސައްކަތް ނުކުރުމަށް ފްލެޓުގެ ވެރިފަރާތަށް އަންގާފައިވާ ކަަމަށެވެ. ލޯންޑްރީ މެޝިންތައް ފެލެޓުން ނެގުމަށް 7 ދުވަހުގެ މުއްދަތެއް ދީފައިވާއިރު، ފްލެޓް ވެރިފަރާތުން އެ ތަކެތި އެތަނުން ނުނަގައި ވިޔަފާރި ހިންގަމުންދާނަމަ އިތުރު ފިޔަވަޅު އަޅާނެ ކަމަށް އޭނާ ވިދާޅުވި އެވެ.
އާއްމުން ދިރިއުޅޭ ތަންތަނުގައި މި ފަދަ މަސައްކަތްތައް ކުރުމަކީ މަނާ ކަމެކެވެ. އަދި ހުޅުމާލޭގައި ލޯންޑްރީގެ މިފަދަ ޚިދުމަތްދޭ ވިޔަފާރިތައް ހިންގޭނީ އެޗްޑީސީގެ ޚާއްސަ ހުއްދައާ އެކުގަ އެވެ.
ސޯޝަލް މީޑީއާއިން ދައުރުވަމުންދާ ވީޑިއޯއިން ފެންނަ ގޮތުގައި ގިނަ އަދަދެއްގެ ދޮންނަ މެޝިނާއި ހިއްކާ މެޝިންތައް ހުރިއިރު، ގިނަ އަދަދެއްގެ ބޮޑެތި ގޭސްފުޅިތައް ވެސް ބަހައްޓާފައި ހުންޓެވެ.
އެ ލޯންޑްރީ ފެކްޓްރީ ހިންގަނީ ވިނަރެސް ހުޅުމާލެ 2 ގެ 8އޭ-206 ގަ އެވެ.
މި މައްސަލައާ ގުޅިގެން ވިނަރެސްގެ ފްލެޓުތަކުގައި ދިރިއުޅޭ ބައެއް މީހުން ބުނީ މިފެކްޓްރީ ހިންގާތާ ދުވަސްތަކެއް ވެފައިވާ ކަމަށާއި، އެ ފެކްޓްރީގައި ދޮންނަން ޖެހޭ ސާމާނާއި ދޮވެފައި ހުރެ ތަކެތި އުފުލަން ބޭނުންކުރަނީ، އާއްމުން ބޭނުންކުރާ ލިފްޓު ކަމަށްވާއިރު، ދަތިތައް ކުރިމަތިވާތީ ޝަކުވާ ހުށަހެޅި ކަމަށެވެ.
ނަމަވެސް ހައްލެއް ނުލިިބުމުން ސޯޝަލް މީޑިއާގައި ވީޑިއޯ އާއްމު ކުރީ ކަމަށެވެ.
މީގެ އިތުރުން ވެސް ވިނަރެސްގެ ފްލެޓުތަކުގައި ގިނަ މައްސަލަތައް ހުރިއިރު، އެޗްޑީސީން މެއިންޓަނެންސްގެ މަސައްކަތް ނުކުރާ ކަމަށާއި، ވަރަށް ބޮޑަށް އިހުމާލުވަމުންދާ ކަމަށް ފްލެޓުތަކުގައި ދިރިއުޅޭ އާއްމު ރައްޔިތުން ބުނެ އެވެ.
