ވިނަރެސް ފްލެޓުތައް ބެލެހެއްޓުމުގައި ފެއިލްވެފައިވާ ކަމަށް ބުނެ އެޗްޑީސީގެ ކުރިމަތީގައި މުޒާހަރާ ކޮށްފި
ބުދަ ދުވަހުގެ ހެނދުނު ގާތްގަނޑަކަށް 10:45 ހާއިރު ވިނަރެސްގައި ދިރިއުޅޭ މީހުންތަކެއް އެއްވެ، އެޗްޑީސީއާ ދެކޮޅަށް ވަނީ އަޑު އުފުލާފައި. ވިނަރެސް ޓަވަރުތައް ހުރި ސަރަހައްދުގައި އެޗްޑީސީން ގާއިމްކޮށްފައިވާ އޮފީހުގެ ދޮރުމަތީގައި ގާތްގަނޑަކަށް ގަޑިއެއް ހާ އިރު ވަންދެން ކުރިއަށް ގެންދިޔަ މި މުޒާހަރާގެ ބައިވެރިން ބުނީ ވިނަރެސް ފްލެޓުތަކުގެ މެއިންޓަނަންސް މަސައްކަތް ކުރުމުގައި ވަރަށް ބޮޑަށް ފެއިލް ވެފައިވާ ކަމަށާއި، ރަނގަޅު ޚިދުމަތެއް ނުދެވޭ ކަމަށް. އަދި ކަންބޮޑުވުންތަކަށް އެދެވޭ ޖަވާބެއް ނުލިބޭތީ މައްސަލަ ހައްލުވަންދެން ސިލްސިލާކޮށް އަޑުއުފުލުމަށް މުޒަހަރާގެ ބައިވެރިން ނިންމާފައިވޭ.
ވިނަރެސް ފްލެޓުތައް ބެލެހެއްޓުމުގައި ފެއިލްވެފައިވާ ކަމަށް ބުނެ އެޗްޑީސީގެ ކުރިމަތީގައި މުޒާހަރާ ކުރަނީ. | ސޯޝަލް މީޑިއާ
ވިނަރެސް ފްލެޓުތައް ބެލެހެއްޓުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ފެއިލްވެފައިވާ ކަމަށް ބުނެ، މުޒާހަރާ ކޮށްފި އެވެ.
ބުދަ ދުވަހުގެ ހެނދުނު ގާތްގަނޑަކަށް 10:45 ހާއިރު ވިނަރެސްގައި ދިރިއުޅޭ މީހުންތަކެއް އެއްވެ، އެޗްޑީސީއާ ދެކޮޅަށް ވަނީ އަޑު އުފުލާފަ އެވެ. ވިނަރެސް ޓަވަރުތައް ހުރި ސަރަހައްދުގައި އެޗްޑީސީން ގާއިމްކޮށްފައިވާ އޮފީސް ދޮރުމަތީގައި ގާތްގަނޑަކަށް ގަޑިއެއްހާ އިރަށް ކުރިއަށް ގެންދިޔަ މި މުޒާހަރާގެ ބައިވެރިން ބުނީ ވިނަރެސް ފްލެޓުތަގެ މެއިންޓަނަންސް މަސައްކަތް ކުރުމުގައި ވަރަށް ބޮޑަށް ފެއިލް ވެފައިވާ ކަމަށާއި، ރަނގަޅު ޚިދުމަތެއް ނުދެވޭ ކަމަށެވެ.
ވިނަރެސްގެ ބޭރު ދޮރު ހަލާކުވެ، ސެކިއުރިޓީ ގޮތުން އެއްވެސް ރައްކާތެރި ކަމެއް ނެތް ކަމަށާއި، ބޭނުން ބަޔަކަށް އިމާރާތުގެ ތެރެއަށް ވަދަ ނުކުމެ ހެދޭ ކަމަށް އެމީހުން ބުނެ އެވެ. އަލިފާން ނިއްވާ ސިސްޓަމް ހަލާކުވެފައި ހުންނަތާ އަހަރަކަށްވުރެ ގިނަ ދުވަސްވެފައިވާ ކަމަށާއި، މި މައްސަލަ ހައްލު ކުރުމަށް މަސައްކަތް ނުކުރާ ކަމަށް މުޒާހަރާގެ ބައިވެރިން ބުނެފައިވެ އެވެ.
ވިނަރެސްގެ 1-4 ވަނަ ޓަވަރުގެ ޕާކިން މަސައްކަތް ހުއްޓިފައި އޮތުމާއި، ވިނަރެސް 5-8 ވަނަ ޓަވަރުގެ މަގު ނުހެދި 3 އަހަރު ވެފައިވާކަން ފާހަގަކޮށް އެކަމުގެ ކަންބޮޑުވުން ވެސް ފާޅުކޮށްފައިވެ އެވެ.
އެޗްޑީސީން ވިނަރެސް އެޕަރޓްމަންޓުތައް ވިއްކި އެއްބަސްވުމާއި ހިލާފުވެފައިވާކަން ފާހަގަކޮށް މުޒާހަރާގެ ބައިވެރިން ބުނީ، ގިނަ ކަންބޮޑުވުންތަކާއެކު އެޗްޑީސީއަށް މައްސަލަ ހުށަހެޅި ނަމަވެސް ޖަވާބެއް ނުލިބޭ ކަމަށާއި، އީމެއިލް ކުރި ނަމަވެސް ބައެއް މައްސަލަތަކަށް ދެނީ ވަރަށް ޖެނަރަލް ޖަވާބެއް ކަމަށެވެ.
މީގެ އިތުރުން މުޒާހަރާގެ ބައިވެރިން ވަނީ އެޗްޑީސީގެ އިސްބޭފުޅުންނާ ބައްދަލު ކުރުމަށް މަސައްކަތް ކޮށްފަ އެވެ. އެކިއެކި ޝުއޫރުތައް ލިޔެފައިވާ ބޯޑުތައް ހިފައިގެން އެޗްޑީސީގެ އޮފީހަށް މުޒާހަރާގެ ބައިވެރިން ދިޔަ ނަމަވެސް ބިޒީ ކަމަށް ބުނެ އިސްވެރިން ވަނީ މުޒާހަރާގެ ބައިވެރިންނާ ބައްދަލު ކުރުމަށް ދެކޮޅު ހަދާފަ އެވެ.
އެހެން ނަމަވެސް މުޒާހަރާގެ ބައިވެރިން ބުނީ މައްސަލަތަކަށް ހައްލު ލިބެންދެން ނުވަތަ ކަންބޮޑުވުންތަކަށް އެދެވޭ ޖަވާބެއް ލިބެންދެން ސިލްސިލާ ގޮތެއްގައި މިގޮތަށް އެއްވެ އަޑު އުފުލާނެ ކަމަށެވެ. ކޮންމެ މަހަކު މެއިންޓަނަންސްގެ ގޮތުގައި ކުލީގެ އިތުރުން 1000 ރުފިޔާ ދައްކާއިރު، ލިބެން ޖެހޭ ޚިދުމަތް ނު ލިބުމަކީ ވަރަށް ބޮޑު ކަންބޮޑުވުމެއް ކަމަށް އެމީހުން ބުންޏެވެ.
އެޗްޑީސީން ވިނަރެސް ފްލެޓުތައް ބެލެހެއްޓުމުގައި ފެއިލްވެފައިވާ ކަމަށް ބުނެ މުޒާހަރާ ކޮށްފައިވާއިރު، މީގެ ކުރިން ވެސް ވިނަރެސް ފްލެޓުގައި ހުރި ގިނަ މައްސަލަތައް ފާހަގަކޮށް، އެ މައްސަލަތައް ހައްލު ކުރުމަށް އެ ފްލެޓްތަކުގައި އުޅޭ 510 މީހުންގެ ފަރާތުން އެޗްޑީސީއަށް ސިޓީއެއް ފޮނުވާފައިވެ އެވެ.
