ވާޓްޒްގެ މޮޅު ކުޅުމާ އެކު، ޖަރުމަނުން ސްވިޒަލެންޑު ބަލި ކޮށްފި

ބައިނަލްއަޤުވާާމީ ރަޙުމަތްތެރި ކަމުގައި ސްވިޒަލެންޑާ ދެކޮޅަށް ކުޅުނު މެޗުން ފަހު ވަގުތު ޖަރުމަނު މޮޅުވިއިރު، ފްލޯރިއަން ވާޓްޒް މޮޅު ކުޅުމެއް ދައްކައިފި އެވެ.

ހުކުރު ދުވަހުގެ ރޭ ދަންވަރު ކުޅުނު މެޗު ޖަރުމަނުން ކާމިޔާބު ކުރީ 4-3 އިންނެވެ. މެޗުގައި ދެ ފަހަރެއްގެ މަތިން ލީޑު ނެގީ ވެސް ސްވިޒަލެންޑުންނެވެ. ނަމަވެސް، ޖަރުމަނުން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 17 ވަނަ މިނެޓުގައި ސްވިޒަލެންޑަށް ލީޑު ނަގައިދިނީ ޑަން އެންޑޮޔޭ އެވެ. ނަމަވެސް، މެޗުގެ 26 ވަނަ މިނެޓުގައި ޖޮނަތަން ޓާ ވަނީ ލަނޑު ޖަހައި ޖަރުމަނަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން ފުރަތަމަ ހާފުގެ 41 ވަނަ މިނެޓުގައި ދެ ވަނަ ފަހަރަށް ސްވިޒަލެންޑަށް ލީޑު ނަގައިދިނީ ބްރީލް އެމްބޮލޯ އެވެ.

މެޗުގެ ފުރަތަމަ ހާފުގެ އިތުރު ވަގުތުގައި ސާޖް ގްނަބްރީ ވަނީ ލަނޑު ޖަހައި ޖަރުމަނަށް ދެ ވަނަ ފަހަރަށް ނަތީޖާ ހަމަހަމަ ކޮށްދީފަ އެވެ. ޖަރުމަނުގެ ފުރަތަމަ ދެ ލަނޑު ޖަހަން ވެސް ފުރުސަތު ތަނަވަސްކޮށްދިނީ ވާޓްޒް އެވެ. އޭގެ ފަހުން މެޗުގެ 61 ވަނަ މިނެޓުގައި ވާޓްޒް ވަނީ ޖަރުމަނުގެ ތިން ވަނަ ލަނޑު ޖަހައި ލީޑު ނަގައިފަ އެވެ. 

ޖަރުމަނުން ލީޑު ނެގި ފަހުން މެޗުގެ 79 ވަނަ މިނެޓުގައި ޖޮއެލް މޮންޓެއިރޯ ވަނީ ސްވިޒަލެންޑަށް ނަތީޖާ ހަމަހަމަ ކޮށްދީފަ އެވެ. އޭގެ ހަ މިނެޓު ފަހުން ވާޓްޒް ވަނީ ޖަރުމަނުގެ ހަތަރު ވަނަ ލަނޑު ޖަހައި މެޗުން އެ ޓީމު މޮޅު ކޮށްދީފަ އެވެ. 

ބައިނަލްއަޤުވާމީ ރަޙުމަތްތެރި ކަމުގައި ޖަރުމަނުން ދެން ނިކުންނާނީ ގާާނާއާ ދެކޮޅަށެވެ.