އާ އަހަރުގެ އުފާފާޅުކުރުމުގެ ތެރޭގައި ސްވިސް ސްކީ ރިސޯޓެއް ގައި އަލިފާން ރޯވެ އެތައް ބަޔަކު މަރުވެއްޖެ
ހާދިސާގައި ގާތްގަނޑަކަށް 40 މީހުން މަރުވެ، 100 އެއްހާ މީހުން ޒަޚަމްވެފައިވާ ކަމަށް ބެލެވޭ ކަމަށް ރިޕޯޓުތައް ބުނޭ.
އާ އަހަރުގެ އުފާފާޅުކުރުމުގެ ތެރޭގައި ސްވިސް ސްކީ ރިސޯޓެއް ކަމަށްވާ ކްރެންސް-މޮންޓަނާގެ ތޮއްޖެހިފައިވާ ލެ ކޮންސްޓެލެޝަން ބާ އެއް ގައި އަލިފާން ރޯވެ އެތައް ބަޔަކު ވަނީ މަރުވެފައި.
ސްވިޒަލޭންޑުގެ ރިޒޯޓް ރަށެއް ކަމަށްވާ ކްރާންސް-މޮންޓާނާގައި އާ އަހަރު ފާހަގަކުރުމަށް ބޭއްވި ހަފުލާއެއްގެ ތެރޭގައި ހިނގި އަލިފާނުގެ ހާދިސާގައި ގާތްގަނޑަކަށް 40 މީހުން މަރުވެ، 100 އެއްހާ މީހުން ޒަޚަމްވެފައިވާ ކަމަށް ބެލެވޭ ކަމަށް ރިޕޯޓުތައް ބުނެފިއެވެ.
ސްވިސް ފުލުހުންނާ ހަވާލާދީ އިޓަލީގެ ފޮރިން މިނިސްޓްރީން އިތުރަށް ހާމަކުރި ގޮތުގައި، މި އަލިފާނުގެ ހާދިސާއަކީ ގަސްތުގައި ބަޔަކު ކުރި ކަމެއް ކަމަށް ނުބެލެވެއެވެ. އަދި ލިބިފައިވާ އަނިޔާތަކުގެ ސަބަބުން ހަށިގަނޑުތައް ވަރަށް ބޮޑަށް އަނދާފައިވާތީ، މަރުވި މީހުން ދެނެގަތުމަށް މިވަގުތު ވަނީ ދަތިތަކަކާ ކުރިމަތިވެފައެވެ.
ސްވިޒަލޭންޑުގެ މަޝްހޫރު ސްކީ ރިޒޯޓެއްގައި މީހުން ތޮއްޖެހިފައި އޮތް ބާ އެއްގައި ރޯވި މި އަލިފާނުގެ ހާދިސާގައި އެތައް ބަޔަކު މަރުވެފައިވާ ކަމަށް ފުލުހުން ކުރިން ވެސް ވަނީ ބުނެފައެވެ.
އާ އަހަރުގެ އުފާފާޅުކުރުންތައް ކުރިއަށްދަނިކޮށް، ފަތުރުވެރިންގެ މެދުގައި މަގުބޫލު ބާ އެއްގައި ރޯވި މި އަލިފާންގަނޑު ރޯވާން މެދުވެރިވި ސަބަބު އަދި ދެނެގަނެވިފައި ނުވާ ކަމަށް ވޮލިސް ފުލުހުންގެ ބަޔާނުގައިވެ އެވެ.
މި ހާދިސާއަކީ ވަރަށް ނުރައްކާތެރި ހާދިސާއެއްގެ ގޮތުގައި ސިފަކޮށް، ފުލުހުންގެ ބަޔާނުގައި ބުނެފައިވަނީ ގިނަ ބައެއްގެ ފުރާނަ ގެއްލި، އެތައް ބަޔަކަށް އަނިޔާވެފައިވާ ކަމަށާއި، ކަމާބެހޭ ފަރާތްތަކުން މިހާރު ދަނީ ކުއްލި ހާލަތުގައި ދޭންޖެހޭ އެހީތެރިކަން ފޯރުކޮށްދިނުމުގެ ބޮޑު އޮޕަރޭޝަނެއް ހިންގަމުން ކަމަށް ފުލުހުން ބުނެފައިވެ އެވެ.
ހާދިސާ ހިނގި ސަރަހައްދަށް ފުލުހުންނާއި، ފަޔާ ފައިޓަރުންގެ އިތުރުން ރެސްކިއު މަސައްކަތްތެރިންގެ ބޮޑު ޓީމަކުން ވަގުތުން ގޮސް، އަނިޔާލިބުނު ގިނަ އަދަދެއްގެ މީހުންނަށް އެހީތެރިކަން ފޯރުކޮށްދީފައިވާ ކަމަށް ވެސް އެ ބަޔާނުގައި ބުނެފައިވެއެވެ.
މި ހާދިސާގައި މަރުވި މީހުން ދެނެގަތުމާއި، ވީ އެންމެ އަވަހަކަށް އެމީހުންގެ ހަށިގަނޑުތައް އާއިލާތަކާ ހަވާލުކުރުމުގެ މަސައްކަތް ކުރަމުންދާ ކަމަށް އެ ސަރަހައްދުގެ ޗީފް ޕްރޮސެކިއުޓަރ ބިއެޓްރިސް ޕިލޫޑް އާ ހަވާލާދީ ބީބީސީ އިން ރިޕޯޓު ކޮށްފައިވެ އެވެ.
ސްވިޒަލޭންޑަށް ކަނޑައަޅާފައި ހުންނަވާ އިޓަލީގެ ސަފީރު ވިދާޅުވި ގޮތުގައި، މަރުވި މީހުން ގެ ހަށިތައް ދެނެގަތުމަށް ހަފުތާތަކެއް ނަގާފާނެއެވެ. މީގެ އިތުރުން، އިޓަލީގެ ފޮރިން މިނިސްޓަރު ވިދާޅުވީ، ހަށިގަނޑުތައް ވަރަށް ބޮޑަށް އަނދާފައި ހުރުމުގެ ސަބަބުން އެއީ ކޮންބައެއްކަން ދެނެގަތުމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށެވެ.
މި ހާދިސާގައި އެކި ގައުމުތަކަށް ނިސްބަތްވާ މީހުން ހިމެނޭ ކަމަށް ބެލެވޭއިރު، ފަރަންސޭސި މީޑިއާތަކުން ރިޕޯޓްކޮށްފައިވާ ގޮތުގައި އަނިޔާވި މީހުންގެ ތެރޭގައި ފަރަންސޭސިވިލާތުގެ މަދުވެގެން ދެ މީހަކު ހިމެނެއެވެ.
ފަރަންސޭސި ރައީސް އިމަނުއެލް މެކްރޯން ވަނީ މި ހިތާމަވެރި ދަނޑިވަޅުގައި ސްވިޒަލޭންޑާއެކު ފަރަންސޭސިވިލާތް އޮތްކަން ހާމަކުރައްވައި، ފަރަންސޭސިވިލާތުގެ ފުރިހަމަ އެއްބާރުލުމާއި އެހީތެރިކަން ފޯރުކޮށްދެއްވާނެ ކަމުގެ ޔަގީންކަން ދެއްވާފައެވެ.
