އެމްޓީސީސީގެ އޮޕަރޭޝަންސްތައް ރަގަޅު ކުރުމަށް އައު ޓަގްބޯޓަކާއި ބާޖެއް ގެނެސްފި

އެމްޓީސީސީގެ އޮޕަރޭޝަންސްތައް ރަގަޅުކުރުމަށް "ޓެންގޯ 9" ނަމަކަށް ކިޔާ އައު ޓަގްބޯޓަކާއި "ހިތަ" ނަމަކަށް ކިޔާ އައު ބާޖެއް ގެނެސްފިއެވެ.

ޓަގް ބޯޓަކީ 73 ފޫޓް ދިގު، 21 ފޫޓް ފުޅާ އުޅަނދަކަށް ވާއިރު ޓަގް ބޯޓުގައި 500 ހޯސްޕަވަރުގެ 2 އިންޖީނު ހަރުކުރެވިފައި ވެއެވެ. އަދި ބާޖަކީ 140 ފޫޓް ދިގު، 40 ފޫޓް ފުޅާ 1000 ޓަނުގެ މުދާ އުފުލޭ ބާޖެކެވެ.

ޓަގްބޯޓް އަދި ބާޖް ބޭނުން ކުރަން ފެށުމުގެ ގޮތުން ތިލަފުށީގައި ބޭއްވި ރަސްމިއްޔާތުގައި ނޫސްވެރިންނަށް މައުލޫމާތު ދެއްވަމުން އެމްޓީސީސީގެ ލޮޖިސްޓިކަލް އޮޕަރޭޝަންސް ޑިޕާރޓްމަންޓުގެ އެގްޒެކްޓިވް ހުސެއިން ޒުހުރީ ވިދާޅުވީ މި ޓަގްބޯޓް އަދި ބާޖަކީ މިއަހަރު ތެރޭގައި އަލަށް ބަދެވިގެން ގެނެވިފައިވާ އުޅަނދުތަކެއް ކަމަށާއި މި އުޅަނދުތައް ބޭނުންކުރަން ނިންމާފައިވަނީ ޕްރޮޖެކްޓް ސައިޓްތަކުގައި، އެއް ރަށުން އަނެއް ރަށަށް މުދާ އުފުލުމާއި ވެހިކަލް އުފުލުމާއި މެޝިނަރީޒް އުފުލުމަށް ކަމަށެވެ.

ހުސެއިން ޒުހުރީ އިތުރަށް ވިދާޅުވީ މި އުޅަނދުތައް ޙާއްސަކޮށް ޖެޓީ ހަދަން ބޭނުންކުރާ ބްލޮކްސް އުފުލުމަށް ވެސް ބޭނުންކުރެވިގެންދާނެ ކަމަށެވެ. އަދި އެމްޓީސީސީގައި 9 ބާޖާއި 6 ޓަގްބޯޓް އާއި 1 ލޭންޑިންގ ކްރާފްޓް އޮޕަރޭޝަނެއްގައި ބޭނުންކުރާ ކަމަށްވެސް އޭނާ ވިދާޅުވިއެވެ.

މި އުޅަނދުތަކުގެ ޙިދުމަތް ފެށުމާއި އެކު ރާއްޖޭގެ އެތެރޭގެ ލޮޖިސްޓިކްސް ޚިދުމަތުގެ ޤާބިލްކަން އިތުރުވެގެންދާނެ އެވެ.

މި ރަސްމިއްޔާތުގައި ވަނީ ދިދަ ނެގުމުގެ ހަރަކާތެއްވެސް ކުރިއަށް ގެންގޮސްފަ އެވެ.