އެމްޓީސީސީގެ އަހަރީ އާއްމު ޖަލްސާ އޮގަސްޓް 29 ގައި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ 2016 ވަނަ އަހަރުގެ އަހަރީ އާއްމު ޖަލްސާ މި މަހު 29 ވަނަ ދުވަހު ބޭއްވުމަށް އެ ކުންފުނިން ނިންމައިފި އެވެ.

ދަރުބާރުގޭގެ ރަންނަބަނޑޭރި މާލަމުގައި މިމަހުގެ 29 ވަނަ ދުވަހުގެ ރޭ 09:00 ގައި ބާއްވާ މިޖަލްސާގައި 2015 ވަނަ އަހަރުގެ އަހަރީ އާއްމު ޖަލްސާގެ ޔައުމިއްޔާ ފާސްކުރުމާއި، މިއަހަރު ބޭއްވި ހާއްސަގޮތުން ކުރާ އާއްމު ޖަލްސާގެ ޔައުމިއްޔާ ފާސްކުރުމުގެ އިތުރުން 2016 ވަނަ އަހަރުގެ ޑިރެކްޓަރުންގެ ރިޕޯޓު ހުށަހެޅުމާއި ފާސްކުރުން ވެސް އޮންނާނެ އެވެ.

Advertisement

ހިއްސާދާރުންނަށް ބަހާނެ ފައިދާއާ ގުޅޭ ގޮތުން ޑިރެކްޓަރުންގެ ބޯޑުން ހުށަހަޅާފައިވާ ހުށަހެޅުމާމެދު ގޮތެއް ނިންމުން ވެސް އޮންނާނެ އެވެ. މީގެ އިތުރުން އެ ކުންފުނީގެ ހިންގާ ގަވާއިދަށް ހުށަހަޅާފައިވާ އިސްލާހުތައް ފާސްކުރުމާއި ބެހޭ ހާއްސަ ގަރާރު ފާސްކުރުން ވެސް އޮންނާނެ އެވެ.

އެ ޖަލްސާގައި ބައިވެރިވުމުގެ ފުރުސަތު އެ ކުންފުނީގެ ހިއްސާދާރުންގެ ގޮތުގައި ރެޖިސްޓްރީ ކޮށްފައިވާ ފަރާތްތަކަށް މިމަހުގެ 27 ވަނަ ދުވަހުގެ ރޭ 09:00 އާ ހަމައަށް ހުޅުވާލާފައިވާ ކަމަށް އެ ކުންފުނިން ބުނެ އެވެ. އެ ޖަލްސާގއި ބައިވެރިވުމަށް ރެޖިސްޓްރީ ވެވޭނީ އަންނަ ހޯމަ ދުވަހުގެ ނިޔަލަށް އެކުންފުނީގެ ހިއްސާދާރުންގެ ގޮތުގައި ރެޖިސްޓްރީ ވާ ފަރާތްތަކަށެވެ.

(އެމްޓީސީސީ) އަށް ދެވަނަ ކުއާޓަރުގައި ލިބުނު ސާފު ފައިދާ ރެކޯޑު އަދަދަކަށް ވަނީ އިތުރުވެފައެވެ.

އެމްޓީސީސީގެ ދެވަނަ ކުއާޓަރުގެ ތަފާސް ހިސާބުތައް ދައްކާ ގޮތުން ސާފު ފައިދާގެ ގޮތުގައި 24 މިލިއަން ރުފިޔާ ލިބިފައިވާ އިރު މިއީ ފުރަތަމަ ކުއާޓަރުގައި ލިބުނު 5.8 މިލިއަން ރުފިޔާގެ ފައިދާއާ އަޅާބަލާއިރު ގާތްގަނޑަކަށް 321 ޕަސެންޓް އިތުރު އަދަދެކެވެ. އެމްޓީސީސީގެ ދެވަނަ ކުއާޓަރުގެ މާލީ ރިޕޯޓު ބުނާ ގޮތުގައި، މިއަހަރުގެ ދެވަނަ ކުއާޓަރުގައި އެމްޓީސީސީއަށް 341.6 މިލިޔަން ރުފިޔާގެ އާމްދަނީއެއް ލިބިފައި ވެއެވެ. މިއީ މިދިޔަ ކުއާޓަރުގައި އެމްޓީސީސީ އަށް ލިބުނު 306.9 މިލިޔަން ރުފިޔާއާ އަޅާ ބަލާއިރު 12 ޕަސަންޓުގެ ކުރިއެރުމެކެވެ.

މިއަހަރުގެ ފުރަތަމަ ކުއާޓަރުގައި އެމްޓީސީސީއަށް ލިބުނު ސާފު ފައިދާގެ މިންވަރަކީ އޭގެ ކުރީ ކުއާޓަރުގައި، މިދިޔަ އަހަރުގެ ފަހު ކުއާޓަރުގައި ކުންފުންޏަށް ލިބުނު 40.8 މިލިއަން ރުފިޔާގެ 85 ޕަސެންޓު ދަށް އަދަދެކެވެ.

މިދިޔަ އަހަރުގެ ފުރަތަމަ ކުއާޓަރުގައި އެކުންފުންޏަށް ސާފު ފައިދާގެ ގޮތުގައި ލިބިފައި ވަނީ 29.8 މިލިއަން ރުފިޔާ އެވެ. ދެވަނަ ކުއާޓަރުގައި ލިބުނު އާމްދަނީ 29.3 މިލިއަންއަށް ދަށްވެ، ތިން ވަނަ ކުއާޓަރުގައި އެ އަދަދު 14.4 މިލިއަނަށް ވެއްޓުނެވެ. ނަމަވެސް 2016 ވަނަ އަހަރުގެ ފަހު ކުއާޓަރުގައި ކުންފުނީގެ ސާފު ފައިދާ ވަނީ 115.1 ޕަސެންޓު އިތުރުވެ 40.8 މިލިއަން ރުފިޔާއަށް އަރައިފަ އެވެ.

މިދިޔަ އަހަރުގެ ފުރަތަމަ ކުއާޓަރުގައި ކުންފުންޏަށް ލިބުނު ފައިދާ މަދުވި އިރު މިދިޔަ އަހަރުގެ ނިޔަލަށް ކުންފުންޏަށް ސާފު ފައިދާގެ ގޮތުގައި ލިބިފައި ވަނީ 104 މިލިއަން ރުފިޔާއެވެ.

މިދިޔަ އަހަރުގެ ފައިދާއިން ކުންފުނީގެ ހިއްސާދާރުންނަށް ބަހަން ނިންމާފައި ވަނީ ހިއްސާއަކަށް 24 ރުފިޔާއެވެ.

ކުންފުނީގެ ދެވަނަ ކުއާޓަރގެ ފާއިދާ ރަނގަޅުވީ އެމްޓީސީސީއިން ކުރިއަށްގެންދިޔަ ބޮޑެތި މަޝްރޫއުތަކާއި އަދި މީގެ ތެރެއިން ފަސް މަޝްރޫއެއްގެ މަސައްކަތް ވަނީ ނިންމާފަ އެވެ.

އެގޮތުން ކުންފުނިން 61 މަޝްރޫއެއްގެ މަސައްކަތް ދަނީ ކުރަމުންނެވެ.