އެމްޓީސީސީގެ ހިއްސާދާރުންނަށް ހިއްސާއަކަށް 24ރ. ބަހަން ނިންމައިފި
12 ބިލިއަން ހިއްސާ ފައިދާގެ ގޮތުގައި ބެހުމަށް ވަނީ ހަމަޖެހިފަ
އެމްޓީސީސީ އަަހަރީ އާންމު ޖަލްސާގެ ތެރެއިން
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ހިއްސާގެ ފައިސާގެ ގޮތުގައި ހިއްސާ އަކަށް 24ރ. ބެހުމަށް ފާސްކޮށްފި އެވެ.
ދަރުބާރުގޭގައި ކުރިއަށް ދިޔަ އެމްޓީސީސީގެ އަހަރީ އާންމު ޖަލްސާގައި ހިއްސާދާރުން ވަނީ ހިއްސާގެ ފައިދާގެ ގޮތުގައި ބެހުމަށް 12 މިލިއަން ރުފިޔާ ( ހިއްސާއަކަށް 24ރ.) ދިނުމަށް ފާސްކޮށްފަ އެވެ. މިގޮތަށް ފާސްވެފައި ވަނީ ހާޒިރުވެފައިވާ ހިއްސާދާރުންގެ 99 ޕަސެންޓް ވޯޓު ލިބިގެންނެވެ. އެމްޓީސީސީގެ އާންމު އަހަރީ ޖަލްސާއަށް 194 މީހުން ވަނީ ހާޒިރުވެފަ އެވެ.
އެމްޓީސީސީގެ 2016 ވަނަ އަހަރުގެ އާމްދަނީގެ ގޮތުގައި 1.3 ބިލިއަން ރުފިޔާ ލިބިފައިވާ އިރު ސާފު ފައިދާގެ ގޮތުގައި 115.3 މިލިއަން ރުފިޔާ ވަނީ ލިބިފަ އެވެ.
މިއީ އޭގެ ކުރީ އަހަރާ އަޅާ ބަލާ އިރު 26 ޕަސެންޓް ދަށް އަދަދެކެވެ. އެކުންފުންނިން ވަނީ ވިޔަފާރި ފުޅާކުރުމުގެ ގޮތުން ވެސް މިިދިޔަ އަހަރު ގިނަ މަސައްކަތްތަކެއް ކޮށްފަ އެވެ. އެގޮތުން 124.8 މިލިއަން ރުފިޔާ ވިޔަފާރި ފުޅާ ކުރުމަށް ވަނީ ޚަރަދު ކޮށްފަ އެވެ.
