ޓްރަމްްޕްގެ އަމިއްލަ ރިސޯޓު މާ އަ ލާގޯ ހިމެނޭ ފްލޮރިޑާގެ ޤާނޫނު ހަދާ މަޖިލީހުގެ ގޮނޑި، އިދިކޮޅު ޑިމޮކްރަޓިކް ޕާޓީ އިން ކާމިޔާބު ކޮށްފި

އެމެރިކާގެ ރައީސް ޑޮނަލްޑް ޓްރަމްޕްގެ ލަގްޒަރީ އަމިއްލަ ރިސޯޓު މާ އަ ލާގޯ ހުންނަ، ފްލޮރިޑާގެ ޤާނޫނު ހަދާ މަޖިލީހުގެ ގޮނޑި އިިދިކޮޅު ޑިމޮކްރަޓިކް ޕާޓީ އިން ކާމިޔާބު ކޮށްފައިވާ ކަމަށް ނަތީޖާ ތަކުން ދައްކައިފި އެވެ.

ރަމްޒީ ބޮޑު މުހިންމު ކަމެއް ދެވިފައިވާ މި ބައި އިލެކްޝަންގައި، ފްލޮރިޑާގެ ޑިސްޓްރިކްޓް 87ގެ ގޮނޑި، އިދިކޮޅު ޑިމޮކްރަޓިކް ޕާޓީ އިން ކާމިޔާބު ކޮށްފައިވާ ކަމަށް، ސީއެންއެން އާއި ނިއުޔޯކް ޓައިމްސް އިން ވަނީ ހާމަ ކޮށްފަ އެވެ. 

މި އިންތިޚާބުގައި ފުރަތަމަ ފަހަރަށް ވާދަ ކުރެއްވި ޑިމޮކްރަޓިކް ޕާޓީގެ ކެންޑިޑޭޓް އެމިލީ ގްރެގަރީ ވަނީ، ރައީސް ޓްރަމްޕްގެ ތާއީދާ އެކު ނިކުމެ ވަޑައިގެންނެވި ރިޕަބްލިކަން ޕާޓީގެ ކެންޑިޑޭޓުގެ މައްޗަށް ކުރި ހޯއްދަވައިފަ އެވެ. މި ކާމިޔާބީއާ ގުޅިގެން ފްލޮރިޑާގެ ޑިމޮކްރަޓިކް ޕާޓީ އިން ބުނެފައި ވަނީ، ޓްރަމްޕް އަމިއްލަ ގޮނޑި އާއި، މާ އަ ލާގޯ ހިމެނޭ ދާއިރާ އެ ޕާޓީ އިން ކާމިޔާބު ކޮށްފައިވާ ކަމަށާއި، އެމިލީ ގްރެގަރީ ހޯއްދެވި ކާމިޔާބީ އަށް މަރުޙަބާ ކިޔާ ކަމަށެވެ. 

އެމިލީ ގްރެގަރީގެ މި ކާމިޔާބީ އަކީ، މިފަހަކަށް އައިސް އެމެރިކާގެ އެކި ސަރަހައްދު ތަކުގައި ރިޕަބްލިކަން ޕާޓީގެ މައްޗަށް، ޑިމޮކްރަޓިކް ޕާޓީ އިން ހޯދަމުންދާ ކާމިޔާބީ ތަކުގެ ތެރެއަށް އިތުރުވި ބޮޑު ކުރިއެރުމެކެވެ. މީގެ ކުރިން މިދިޔަ ޖަނަވަރީ މަހު ޓެކްސަސްގައި ބޭއްވި އިންތިޚާބު ވެސް، ރިޕަބްލިކަން ޕާޓީގެ ބާރުގަދަ ދާއިރާއެއްގެ ސްޓޭޓް ސެނެޓު ގޮނޑި ޑިމޮކްރަޓިކް ޕާޓީ އިން ވަނީ ކާމިޔާބު ކޮށްފަ އެވެ. ސިޔާސީ މަސްރަހު ދިރާސާ ކުރާ ފަރާތްތަކުން ބުނާ ގޮތުގައި، މިއީ ރިޕަބްލިކަން ޕާޓީއާ މެދު އާންމު ރައްޔިތުންގެ މެދުގައި އޮތް ތާއީދު ކުޑަވަމުންދާ ކަމުގެ ހެއްކެކެވެ. 

މީގެ އިތުރުން މިދިޔަ އަހަރުގެ ފަހު ކޮޅު ނިއު ޖާޒީ އާއި، ވާޖިނިއާގެ ގަވަރުނަރުންގެ ގޮތުގައި ޑިމޮކްރަޓިކް ޕާޓިގެ ކެންޑިޑޭޓުން އިންތިޚާބު ވެފައިވާއިރު، ނިއުޔޯކް ސިޓީގެ މޭޔަރުގެ މަޤާމަށް އިންތިޚާބުވެފައި ވަނީ ޒޯރަން މަމްދާނީ އެވެ. މި ކާމިޔާބީ ތަކާ އެކު އިދިކޮޅު ޑިމޮކްރަޓިކް ޕާޓީގެ ޙަރަކާތް އަދި ރޫހު ވަނީ އިތުރަށް ވަރުގަދަ ވެގެން ގޮސްފަ އެވެ. 

މިއާ އެކު، މިއަހަރުގެ ނޮވެމްވަރު މަހު ބޭއްވުމަށް ހަމަޖެހިފައިވާ މިޑް ޓާމް އިންތިޚާބަކީ، ކޮންގްރެސްގެ މެޖޯރިޓީ އޮތް ވެރިކަން ކުރާ ރިޕަބްލިކަން ޕާޓީ އަށް ބޮޑެތި ގޮން ޖެހުން ތަކެއް ކުރިމަތި ވާނެ އިންތިޚާބެއް ކަމަށް ބެލެވެ އެވެ. ޚާއްސަކޮށް އިޤްތިޞާދީ ގޮތުން ކުރިމަތި ވެފައިވާ ފިއްތުން ތަކާއި، އީރާންއާ ދެކޮޅަށް ކުރަމުން އަންނަ ހަނގުރާމަ ދިގު ލައިގެން ދިޔުމުގެ ބިރު އޮތުމަކީ އެ ޕާޓީ އަށް އޮތް ބޮޑު ކަންބޮޑުވުމެކެވެ.