ބަހްރައިން ގައި ބާރުގަދަ ގޮވުންތަކެއްގެ އަޑު އިވިއްޖެ
24 މާރިޗު 2026 | އަންގާރަ 02:12ބަހްރައިންގެ އެކި ސަރަހައްދުތަކުން ބާރުގަދަ ގޮވުންތަކެއްގެ އަޑާއެކު ނުރައްކަލުގެ އިންޒާރުދޭ ސައިރަންގެ އަޑު އިވުމާ ގުޅިގެން، އެ ގައުމުގެ ސަލާމަތީ ކަންކަން ވަނީ ވަރުގަދަކޮށްފައި.
އެމެރިކާއިން ބަހްރައިންގައި ބޭނުންކުރަމުންދާ "ޕެޓްރިއަޓް" މިސައިލެއްގެ ސަބަބުން ބާރު ގަދަ ގޮވުމެއް ގޮވާ ބޯ ދުން އަރަނީ (ފައިލް). | ރޮއިޓާސް
އީރާނާއެކު ކުރަމުންދާ ހަނގުރާމަ ހުއްޓާލުމުގެ މަޝްވަރާތައް ކުރިއަށްދާކަމަށް އެމެރިކާގެ ރައީސް ޑޮނަލްޑް ޓްރަމްޕް، ވިދާޅުވި ފަހުން، ގަލްފުގެ ގައުމެއް ކަމަށްވާ ބަހްރައިން ގައި ވަރުގަދަ ގޮވުންތަކެއްގެ އަޑާއި، ނުރައްކަލުގެ އިންޒާރުދޭ ސައިރަންގެ އަޑު ހޯމަ ދުވަހު އިވިއްޖެ ކަމަށް އޭއެފްޕީގެ ނޫސްވެރިއަކު ރިޕޯޓްކޮށްފިއެވެ.
ބަހްރައިންގެ އިންޓީރިއާ މިނިސްޓްރީން ސޯޝަލް މީޑިއާގައި އާންމުކުރި މެސެޖެއްގައި، އެ ގައުމުގެ ރައްޔިތުންނާއި އެ ގައުމުގައި ދިރިއުޅޭ ބޭރު މީހުން ކެތްތެރިކަން އިސްކުރުމަށާއި، ވީ އެންމެ އަވަހަކަށް ރައްކާތެރި ތަންތަނަށް ވަނުމަށް ވަނީ އިލްތިމާސްކޮށްފައެވެ.
