ބޮޑު ހަނގުރާމައެއް ކުރިއަށް ދަނިކޮށް ތިން ދުވަހަށް އީދު ފާހަގަކުރަން ނިންމާފައިވާތީ މެންބަރު ކުޑޫ ކަންބޮޑުވުން ފާޅު ކުރައްވައިފި

ދުނިޔޭގައި ބޮޑު ހަނގުރާމައެއް ކުރިއަށް ދަނިކޮށް، "އީދު ހަވީރު 1447" ތިން ދުވަހު ކުލަގަދަކޮށް ފާހަގަކުރާ ގޮތަށް ނިންމާފައިވާތީ، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ކަންބޮޑުވުން ފާޅު ކުރައްވައިފި އެވެ. 

އެމެރިކާ އާއި އިޒްރޭލުން ގުޅިގެން އީރާނަށް ހަމަލާ ދިނުމާއި ގުޅިގެން އިރާނުން ދެމުންދާ ރައްދު ހަމަލާތަކާއެކު، މިހާރު މެދުއިރުމަތީގެ ހަމަނުޖެހުން ވަނީ ބޮޑުވެފަ އެވެ. ތެޔޮ ލިބުން ދަތިވެ، ހުރިހާ އެއްޗެއްގެ އަގު ދަނީ މައްޗަށެވެ. އެއާއެކު އެކި ގައުމުތަކުން ދަނީ ހަރަދު ކުޑަ ކުރުމަށާއި، އިގްތިސާދަށް އަންނަ ލޮޅުންތައް ކުޑަ ކުރުމަށް ބައެއް ފިޔަވަޅުތައް އަޅަމުންނެވެ.

މިކަމަށް އިޝާރާތް ކުރައްވައި މެންބަރު ކުޑޫ ވިދާޅުވީ، "އީދު ހަވީރު 1447" ތިން ދުވަހު ކުލަގަދަކޮށް ފާހަގަކުރަން ނިންމާފައިވާތީ އަޖައިބުވެ އަންތަރީސްވާ ކަމަށާއި، ނުވާންވީ ސަބަބެއް ވެސް ނެތް ކަމަށެވެ. އަދި ކޮޅެއް މެދެއް ނުފެންނަ ހަނގުރާމައެއް ކުރިމަތިވެގެން އުޅޭއިރު، ކަންކަން ބުނެދޭނެ މީހަކު ވެސް ސަރުކާރުގައި ނެތީތޯ އޭނާ ސުވާލު އުފެއްދެވި އެވެ. 

މެންބަރު ކުޑޫގެ އިތުރުން ބައެއް އާއްމު ރައްޔިތުން ދަނީ ހަނގުރާމައާ ގުޅިގެން ތެދު މައުލޫމާތު ފޯރުކޮށް ނުދޭ ކަމަށާއި، ހަރަދު ކުޑަ ކުރުމުގެ ގޮތުން ފިޔަވަޅުތައް ނާޅާތީ އެކަމުގެ ކަންބޮޑުވުން ފާޅު ކުރަމުންނެވެ.

 މީގެ އިތުރުން ފިތުރު އީދުގެ މުނާސަބަތުގައި އީދު ދުވަހުން ފެށިގެން ތިން ދުވަހު ''އީދު ހަވީރު 1447'' ވިލަރެސް މިފަހަރު ކުރަނީ ގައުމީ ދިފާއީ ބާރުންނެވެ. 

އެމްއެންޑީއެފުން ބުނީ، އީދު ހަވީރު 1447 ގައި ސިފައިންނާއި ފުލުހުންގެ އިތުރުން، ސަރުކާރުގެ 10 އެސްއޯއީއަކުން ބައިވެރިވާ ގޮތަށް  ހަމަޖެހިފައިވާ ކަމަށާއި، ހަރަކާތްތައް ފެށިގެންދާނީ އީދު ދުވަހުގެ ހަވީރު 16:00ން 18:00ށް، މާލެއާއި ހުޅުމާލޭގެ އިތުރުން ވިލިމާލޭގައި ކަމަށެވެ. 

އެމްއެންްޑީއެފުން ބުނީ، އީދު ހަވީރަށް އާންމުންގެ ފަރާތުން މިދިޔަ އަހަރު ލިބުނު ތަރުހީބަށް ބަލައި މިފަހަރު އީދު ހަވީރު 1447 ތިން ދުވަހަށް ކުރިއަށް ގެންދާއިރު، މާލޭގައި ހަރަކާތްތައް އޮންނާނީ އިސްލާމީ މަރުކަޒުގެ ބޭރުގައިވާ މާބަލް ސަރަހައްދުން ފެށިގެން ޖުމްހޫރީ މައިދާނާއި ރަސްމީ ބޮޑު ފާލަމުގެ ސަރަހައްދު ހިމެނޭ ގޮތަށް ކަމަށެވެ. އަދި މި ހަވީރުގައި ހުޅުމާލެ ސެންޓްރަލް ޕާކާއި ފޭސް 2ގެ ހިޔާ ޕާކް ސަރަހައްދާއި، ވިލިމާލެ ފުޓްބޯޅަ ދަނޑުގައި އީދު ހަވީރު 1447 ގެ ހަރަކާތްތައް ކުރިއަށް ގެންދަން ނިންމާފައިވާ ކަމަށް އެމްއެންޑީއެފުން ބުނެ އެވެ. 

މީގެ އިތުރުން އެމްއެންޑީއެފުން ބުނީ، އީދު ހަވީރުގެ ހަރަކާތްތައް ކުރިއަށް ގެންދާ ގޮތަށް ހަމަޖެހުމާއެކު ސަލްޓަން ޕާކް އީދު ދުވަހު ހުޅުވާގޮތަށް ސަރުކާރުން ހަމަޖައްސާފައިވާ ކަމަށެވެ. 

އެމްއެންޑީއެފުން ބުނީ، މި ހަވީރުގައި އެކި ކަހަލަ ހަރަކާތްތަކާއި ކުޅިވަރުތަކުގެ އިތުރުން މުނިފޫހިފިލުވުމާއި އީދު ހަދިޔާ ދިނުން ވެސް އޮންނާނެ ކަމަށާއި، ދައުލަތުގެ އެކި މުއައްސަސާތަކާއި ވިޔަފާރި ކުންފުނިތަކުން ތައްޔާރުކުރާ ސްޓޯލްތަކުން ތަފާތު އެކި ގޭމްތަކާއި ކުޅިވަރު ހަރަކާތްތައް ކުރިއަށް ގެންދާނެ ކަމަށެވެ. އެ ސްޓޯލްތައް ތައްޔާރުކުރުމަށް ހަމަޖެހިފައިވަނީ އެކި ތީމުތަކަށް، ތަފާތު އެކި ތަޖުރިބާތައް ކުރެވޭނެހެން އަދި ކުޑަކުދިން ގަޔާވާނެ އެކި ކަހަލަ ހަރަކާތްތައް ހިމަނައިގެން ކަމަށް އެމްއެންޑީއެފުން ބުނެ އެވެ.

"އީދު ހަވީރު 1447" ގައި ސިފައިންގެ ޚާއްސަ ހަރަކާތްތަކެއް ވެސް އޮންނާނެކަން ފާހަގަކޮށް އެމްއެންޑީއެފުން ބުނީ، އޭގެ ތެރޭގައި ސިފައިންގެ ޔުނިފޯމްތަކާއި އޮޕަރޭޝަންތަކުގައި ބޭނުންކުރާ އެކި ކަހަލަ ހަތިޔާރުތަކާއި އެއްގަމާއި ކަނޑުމަތީގައި ބޭނުންކުރާ އެކި އުޅަނދުތައް ދައްކާލުމާއި އެ ތަކެއްޗާ އެކު ފޮޓޯ ނެގުމާއި، ތަޖުރިބާކޮށްލުމުގެ ފުރުސަތު ލިބޭނެ ކަމަށެވެ. 

މި އަހަރުގެ އީދު ހަވީރުގައި ބައިވެރިވާ އެސްއޯއީތަކުގެ ތެރޭގައި ސްޓެލްކޯއާއި، އެމްޑަބްލިއުއެސްއީއާއި، ވެމްކޯއާއި، އެމްޕީއެލްއާއި، އެޗްޑީސީއާއި، އެސްޓީއޯއާއި، އެމްއޭސީއެލްއާއި، އާރުޑީސީއާއި، އެމްޓީސީސީ އަދި މިފްކޯ ހިމެނެ އެވެ.