18 އަހަރުން ދަށުގެ ސާފް ޗެމްޕިއަންޝިޕް: ބޫޓާން އަތުން ރާއްޖެ ބަލިވެއްޖެ

ބޫޓާންގައި ކުރިޔަށްދާ 18 އަހަރުން ދަށުގެ ސާފް ޗެމްޕިއަންޝިޕްގައި ރާއްޖޭގެ ގައުމީ ޓީމު ކުޅުނު ފުރަތަމަ މެޗުން ބަލިވެއްޖެއެވެ.

މުބާރާތް ބާއްވަ ގައުމު ކަމަށްވާ ބޫޓާންއާ ދެކޮޅަށް ކުޅުނު މެޗުން ރާއްޖެ ބަލިވެފައިވަނީ 1-0 ގެ ނަތީޖާއަކުންނެވެ.

ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔަ މެޗުގައި ދެ ޓީމަށްވެސް ލަނޑުޖަހާނެ މާކަ ރަނގަޅު ފުރުސަތުތަކެއް ތަނަވަސް ކުރެވިފައެއް ނުވެއެވެ. މި މެޗުގައި ރާއްޖޭގެ ފުރަތަމަ 11 ގައި ހިމެނިގެން ކުޅެފައިވަނީ ގޯލްކީޕަރު އަހުމަދު ސަމާހުއެވެ. ރާއްޖޭގެ ޑިފެންސަށް ކުޅެފައިވަނީ އަލީ ޝަމާލްއާ އައްޒާމް އަބްދުﷲ އާއި ހުސައިން ފައިޝަލްއާ އިޝާގް ރަޝީދެވެ. ރާއްޖޭގެ މިޑްފީލްޑަށް ކުޅެފައިވަނީ ހުސައިން މުހައްމަދު ޒިހާންއާ ނިޝާމް މުހައްމަދުގެ އިތުރުން އަބްދުﷲ ފައިސަލްއެވެ. އަދި ރާއްޖޭގެ ފޯވާޑަށް ކުޅެފައިވަނީ ޝިނާން އިބްރާހިމްއާ މުހައްމަދު ޖައިލަމްގެ އިތުރުން އަހުމަދު ތޮލާލްއެވެ.

ރާއްޖޭގެ ގައުމީ ޓީމުން ވަނީ ރީތި ޕާސިން ގޭމެއް ކުޅެ ގިނަވަގުތު ބޯޅަ ގެންގުޅެފައެވެ. އެހެނަސް ބޫޓާންއިން އަމިއްލަ ދަނޑުގައި ކުޅުނު މި މެޗުގައި އެ ޓީމުންވަނީ ސަޕޯޓަރުންގެ ސަޕޯޓާއެކު އިތުބާރާއެކު އެޓޭކް ކޮށްފައެވެ. ފުރަތަމަ ހާފުގައި ލަނޑު ޖެހުމަށް އެންމެ ރަނގަޅު ފުރުސަތު ލިބިފައިވަނީ ބޫޓާންއަށެވެ. އެގޮތުން އެ ޓީމުގެ ކުޅުންތެރިޔަކު ދަނޑުގެ ހާފް ރޮނގުގެ މެދުން ފޮނުވާލި ހަމަލާ އަމާޒުވީ ރާއްޖޭގެ ގޯލުގެ ދަނޑިއާއެވެ. ފުރަތަމަ ހާފު ނިމިފައިވަނީ 0-0 އަކުން ދެ ޓީމު އެއްވަރުވެ އޮވެގެންނެވެ.

ދެވަނަ ހާފުގެ 53 ވަނަ މިނުޓުގައި ރާއްޖޭގެ ޓީމުގެ ޑިފެންސަށް ހެދުނު ގޯހެއްގެ ފައިދާ ނަގައި ބޫޓާންއިން ވަނީ މެޗުގެ ލީޑު ނަގާފައެވެ. އެ ލަނޑު އެ ޓީމަށް ކާމިޔާބު ކޮށްދިނީ އޮރްގިޔެން ވަންޗުލްއެވެ. ދެވަނަ ހާފުގައިވެސް ރާއްޖޭގެ ޓީމުގެ ފަރާތުން ރަނގަޅު ކުޅުމެއް ފެނުނު ނަމަވެސް ބޫޓާންގެ ގޯލުގެ ތެރެއަށް އެއްވެސް ހަމަލާއެއް ފޮނުވާލެވިފައެއް ނުވެއެވެ.

ރާއްޖެއިން މި މުބާރާތުގައި ވާދަކުރާނީ ބޫޓާން، ނޭޕާލް، އިންޑިއާ އަދި ބަންގްލަދޭޝްއާ ދެކޮޅަށެވެ. ލީގު އުސޫލުން ކުރިޔަށްދާ މި މުބާރާތުގައި ރާއްޖޭގެ ޓީމުން ކުޅޭ ދެވަނަ މެޗު ކުޅޭނީ ސެޕްޓެމްބަރު މަހުގެ 20 ވަނަ ދުވަހު ބަންގްލަދޭޝްއާ ދެކޮޅަށެވެ. މި މެޗު ފަށާނީ ރާއްޖެ ގަޑިން އިރުއޮއްސި 6 ޖަހާއިރުއެވެ.