ފިތުރު ޒަކާތުގައި ލިބުނު ފައިސާއިން ޣައްޒާގެ ރައްޔިތުންނަށާއި، ދަތި ހަލުގައި އުޅޭ ފަރާތްތަކަށް އެހީވުމަށް ގިނަ އަދަދެއްގެ ފައިސާ ހަވާލުކޮށްފި
ފިތުރު ޒަކާތުގެ ގޮތުގައި ލިބުނު ފައިސާއިން ޣައްޒާގެ ރައްޔިތުންނަށް ކާބޯތަކެތީގެ އެހީ ފޯރުކޮށްދިނުމަށް 500,000 ރުފިޔާ އިސްރާ އެސޯސިއޭޝަނާ ވަނީ ހަވާލުކޮށްފައިވާއިރު، ރާއްޖޭގެ ދަތި ހާލުގައި އުޅޭ ފަރާތްތަކަށް އެހީވުމަށް 423,749 ރުފިޔާ ސޯޝަލް މިނިސްޓްރީގެ ޓްރަސްޓް ފަންޑަށް ދީފައިވޭ. އަދި މިއަހަރުގެ ފިތުރު ޒަކާތް ބޮލަކަށް 6,000 ރުފިޔާގެ މަގުން ފަގީރުންނަށް ބަހައި ވަނީ ނިންމާފައި.
ފިތުރު ޒަކާތުގައި ލިބުނު ފައިސާއިން ޣައްޒާގެ ރައްޔިތުންނަށާއި، ދަތި ހަލުގައި އުޅޭ ފަރާތްތަކަށް އެހީވުމަށް ގިނަ އަދަދެއްގެ ފައިސާ ހަވާލުކުރި ރަސްމިއްޔާތުގެ ތެރެއިން. | ޒަކާތް ހައުސް
ފިތުރު ޒަކާތުގައި ލިބުނު ފައިސާއިން ފަލަސްތީނުގެ ޣައްޒާގެ ރައްޔިތުންނަށާއި، ދަތި ހަލުގައި އުޅޭ ފަރާތްތަކަށް އެހީވުމަށް ގިނަ އަދަދެއްގެ ފައިސާ ހަވާލުކޮށްފި އެވެ.
މޯލްޑިވްސް ޒަކާތު ހައުސްއިން ބުނީ، ފިތުރު ޒަކާތުގެ ގޮތުގައި ލިބުނު ފައިސާއިން، ފަލަސްތީނުގެ ޣައްޒާގެ ރައްޔިތުންނަށް ކާބޯތަކެތީގެ އެހީތެރިކަން ފޯރުކޮށްދިނުމަށް 500،000 ރުފިޔާ އިސްރާ އެސޯސިއޭޝަނާ ބުރާސްފަތި ދުވަހުގެ ރޭ ހަވާލު ކޮށްފައިވާ ކަމަށެވެ. އަދި ދަތި ހަލުގައި އުޅޭ ފަރާތްތަކަށް އެހީވުމަށް ސޯޝަލް މިނިސްޓްރީގެ އިޖުތިމާއީ ޓްރަސްޓް ފަންޑަށް އެހީތެރިކަން ފޯރުކޮށްދިނުމުގެ ގޮތުން 423,749 ރުފިޔާ ވަނީ ސޯޝަލް މިނިސްޓްރީއާވެސް ހަވާލުކޮށްފައިވާ ކަމަށް ޒަކާތު ހައުސްއިން ބުންޏެވެ.
އިޒްރޭލުން ދެމުންދާ ހަމަލާތަކާއި ގުޅިގެން ޣައްޒާގެ ރައްޔިތުން ދިރިއުޅުމުން ދަނީ ވަރަށް ނިކަމެތި ދަތި ހާލަތެއްގަ އެވެ. އެކިގޮތްގޮތުން ޣައްޒާގެ ރައްޔިތުންނަށް އެހީތެރިވުމުގެ މަސައްކަތް ކުރާއިރު، އިޒްރޭލުން ދަނީ އެކަމަށް ވެސް ހުރަސް އަޅަމުންނެވެ.
ޒަކާތު ހައުސިން އިން ފަލަސްތީން ރައްޔިތުންނަށް އެހީތެރިވުމަށް ފައިސާ ހަވާލުކުރި އިސްރާ އެސޯސިއޭޝަނަކީ ޣައްޒާގެ ރައްޔިތުންނަށް އެހީތެރިކަން ފޯރުކޮށްދިނުމުގެ މަސައްކަތްތައް ކުރަމުން އަންނަ ޖަމްއިއްޔާއެކެވެ. މި ޖަމްއިއްޔާއިން މީގެކުރިން ވެސް ޣައްޒާގެ ރައްޔިތުންނަށް އެހީތެރިކަން ފޯރުކޮށްދީފައިވެ އެވެ.
މީގެ އިތުރުން ސޯޝަލް މިނިސްޓްރީގެ އިޖުތިމާއީ ޓްރަސްޓް ފަންޑަށް ހަވާލުކުރި 423،749 ރުފިޔާ ބޭނުން ކުރާނީ ރާއްޖޭގެ ދަތި ހާލުގައި އުޅޭ ފަރާތްތަކަށް އެހީތެރިކަން ފޯރުކޮށްދިނުމަށެވެ. މި ފައިސާ ބޭނުންކޮށްގެން އެހީގެ ބޭނުމުގައި ތިބި ފަރާތްތަކަށް ކާބޯތަކެއްޗާއި، ސިއްހީ ފަރުވާގެ އިތުރުން ދިރިއުޅުމުގެ އެހެނިހެން ބޭނުންތައް ފުއްދައިދެވޭނެ ކަމަށް ސޯޝަލް މިނިސްޓްރީން ބުނެ އެވެ.
ފިތުރު ޒަކާތުގައި ލިބުނު ފައިސާއިން ފަލަސްތީނުގެ ޣައްޒާގެ ރައްޔިތުންނަށާއި، ދަތިހާލުގައި އުޅޭ ފަރާތްތަކަށް އެހީވުމަށް ފައިސާ ދިންއިރު، މި އަހަރު ފަގީރުންނާއި މިސްކީނުންގެ ދަފުތަރުގައިވާ ފަރާތްތަކަށް، ބޮލަކަށް 6000 ދިވެހި ރުފިޔާގެ މަގުން 1447 ވަނަ އަހަރުގެ ފިތުރު ޒަކާތް ބަހައި ވަނީ ނިންމާފަ އެވެ.
މިއީ ރާއްޖޭގައި މިހައި ތަނަށް ހަމަހަމަކޮށް ފިތުރު ޒަކާތް ބެހުމުގައި، ބޮލަކަށް އެންމެ ގިނަ އަދަދަކަށް ފިތުރު ޒަކާތް ބެހި ފަހަރު ކަމަށް އިސްލާމިކް މިނިސްޓްރީން ބުނެ އެވެ.
