ފަލަކީ ހިސާބުން ބުދަ ދުވަހު ހަނދު ފެނުން "މުސްތަހީލު"

2026 ވަނަ އަހަރުގެ ފިޠުރު ޢީދު ދުވަސް ކަނޑައެޅުމަށްޓަކައި، ޝައްވާލު މަހުގެ ހަނދު ބެލުމުގެ މަސައްކަތް ސައުދީ އަރަބިއްޔާއާއި އިސްލާމީ ބައެއް އެހެން ގައުމުތަކުން ހަނދު ބެލި ނަމަވެސް ފަލަކީ ހިސާބުތަކުން ދައްކާގޮތުގައި އެ ދުވަހު ހަނދު ފެނުމަކީ "މުސްތަހީލު" ކަމެކެވެ.

ސައުދީ އަރަބިއްޔާގެ ސުޕްރީމް ކޯޓުން ވަނީ، ރަމަޟާން މަހުގެ 29 ވާ ބުދަ ދުވަހުގެ އިރުއޮއްސޭ ވަގުތު ޝައްވާލު މަހުގެ ހަނދު ބެލުމަށް އެ ގައުމުގެ އެންމެހައި މުސްލިމުންނަށް ގޮވާލާފައެވެ. މިއީ ފިޠުރު ޢީދު ދުވަހަކީ ބުރާސްފަތި ދުވަސްތޯ ނުވަތަ ހުކުރު ދުވަސްތޯ ކަނޑައެޅުމަށެވެ.

އިންޓަނޭޝަނަލް އެސްޓްރޮނޮމީ ސެންޓަރުން ހާމަކުރި ގޮތުގައި، މާރިޗު މަހުގެ 18 ވާ ބުދަ ދުވަހު ހަނދު ބަލާ ގައުމުތަކަށް އެ ދުވަހު ހަނދު ފެނުމަކީ ނާދިރު ކަމެކެވެ. އެއީ އިރު އޮއްސުމުގެ ކުރިން ހަނދު އޮއްސޭތީއާއި، އިރު އޮއްސޭ ފަހުން ހަނދު ކޮންޖަންކްޝަން (އިރާއި ހަނދު އެއް ސަފަކަށް އައުން) މަރުހަލާ ފުރިހަމަވާތީއެވެ.

އެކްސްގައި އެ ސެންޓަރުން ނެރުނު ބަޔާނެއްގައި ބުނެފައިވަނީ، ބުދަ ދުވަހަކީ ސައުދީ އަރަބިއްޔާ، ޔޫއޭއީ، ޤަޠަރު، ބަޙްރައިން، ކުވެއިތު، ޔަމަން، ފަލަސްޠީން، ލުބުނާން، ސޫދާން އަދި އިރާޤުގެ ބައެއް ސަރަހައްދުތަކަށް ރަމަޟާން މަހުގެ 29 ވަނަ ދުވަސް ކަމަށެވެ. 

ނަމަވެސް، ފަލަކީ ހިސާބުތަކަށް ރިއާޔަތްކޮށް އެ ސެންޓަރުން ބާރުއަޅައި ބުނެފައިވަނީ، އެ ދުވަހު ދުނިޔޭގެ އެއްވެސް ސަރަހައްދަކަށް ހަނދު ފެނުމަކީ "މުސްތަހީލު" ކަމެއް ކަމަށެވެ.

އެ ސެންޓަރުން އިތުރަށް ފާހަގަކުރި ގޮތުގައި، މާރިޗު މަހުގެ 19 ވާ ބުރާސްފަތި ދުވަހަކީ ތުރުކީ، އިންޑޮނޭޝިއާ، މެލޭޝިއާ، ބުރުނާއީ، ސިންގަޕޫރު، އިންޑިއާ، ބަންގްލަދޭޝް، ޕާކިސްތާން، އީރާން، އޮމާން، އުރުދުން، ސޫރިޔާ، މިޞްރު، ލީބިޔާ، ޓިއުނީޝިއާ، އަލްޖީރިއާ، މޮރޮކޯ، މޮރިޓޭނިއާ އަދި އިރާޤުގެ ބައެއް ސަރަހައްދުތަކަށް ރަމަޟާން މަހުގެ 29 ވަނަ ދުވަހެވެ. އެހެންކަމުން އެ ގައުމުތަކުން ހަނދު ބެލުމުގެ މަސައްކަތް ކުރާނީ ބުރާސްފަތި ދުވަހުގެ އިރުއޮއްސޭ ވަގުތުގައެވެ.

ބުރާސްފަތި ދުވަހު ވެސް އިސްލާމީ ދުނިޔޭގެ އިރުމަތީ ސަރަހައްދުތަކަށް ހަނދު ފެނުމުގެ ފުރުސަތު ކުޑަ ކަމަށާއި، މެދުތެރޭ ސަރަހައްދުތަކަށް ހަނދު ފެނުން ދަތިވާނެ ކަމަށް އެ ސެންޓަރުން ފާހަގަކުރިއެވެ.

މީގެ އިތުރުން، އިންޓަނޭޝަނަލް އެސްޓްރޮނޮމީ ސެންޓަރުން ވަނީ ދުނިޔެއަށް ހަނދު ފެންނާނެ މިންވަރު ދައްކުވައިދޭ ޗާޓެއް ވެސް އާންމުކޮށްފައެވެ. އެ ޗާޓުގައި ރަތް ކުލައިން ފާހަގަކޮށްފައިވާ ސަރަހައްދުތަކަށް، އިރު އޮއްސުމުގެ ކުރިން ހަނދު އޮއްސޭތީ ހަނދު ފެނުމަކީ މުސްތަހީލު ކަމެއް ކަމަށް ވަނީ ބުނެފައެވެ.