ރަމަޟާން 2026: ފަލަކީ ޢިލްމުވެރިން އަންނަ އަހަރުގެ ރޯދަ މަހުގެ ފުރަތަމަ ދުވަސް ލަފާ ކޮށްފި

ފަލަކީ ހިސާބުތަކުން ދައްކާ ގޮތުގައި 2026 ވަނަ އަހަރުގެ ބަރަކާތްތެރި ރަމަޟާން މަސް ފެށޭނެ ކަމަށް ލަފާކުރެވެނީ، ފެބްރުއަރީ 19 ވާ ބުރާސްފަތި ދުވަހު ކަމަށް އަލް އަރަބިއްޔާ އިން ރިޕޯޓުކޮށްފައިވެއެވެ.

އެމިރޭޓްސް އެސްޓްރޮނޮމިކަލް ސޮސައިޓީގެ ރައީސް އިބްރާހިމް އަލް ޖަރުވާން ވިދާޅުވެފައިވަނީ ހިޖުރީ ސަނަތުން 1447 ވަނަ އަހަރުގެ ރަމަޟާން މަހުގެ ހަނދު ފުރަތަމަ ފާޅުވާނީ ފެބްރުއަރީ 17 ވާ އަންގާރަ ދުވަހު ކަމަށެވެ.

އެހެން ނަމަވެސް އެ ދުވަހު އިރުއޮއްސުމުގެ އެއް މިނެޓު ފަހުން ހަނދު އޮއްސޭނެއަތީ، އެ ރޭ ހަމަ ލޮލަށް ހަނދު ފެންނާނެ ކަމަށް ނުބެލެވެއެވެ. އެހެން ކަމުން، ފެބްރުއަރީ 19 އަކީ ރަމަޟާން މަހުގެ ފުރަތަމަ ދުވަސް ކަމުގައިވާނެ ކަމަށް އޭނާ ވިދާޅުވިއެވެ.

"ބުރާސްފަތި ދުވަހު، ފެބްރުއަރީ 19 އަކީ ރަމަޟާން މަހުގެ ފުރަތަމަ ދުވަސް ކަމަށާއި، ހުކުރު ދުވަހު، މާރޗް 20 އަކީ ޝައްވާލް މަހާއި ޢީދުލް ފިޠުރުގެ ފުރަތަމަ ދުވަސް ކަމުގައިވާނެ" ކަމަށް އަލް ޖަރުވާން ވިދާޅުވިކަމަށް އަލް އަރަބިއްޔާ އިން ރިޕޯޓް ކޮށްފައި ވެއެވެ.

ސަޢޫދީ ޢަރަބިއްޔާގެ ހަނދުބަލާ ކޮމިޓީން ފެބްރުއަރީ 18 ގައި ހަނދުބަލައި ރޯދަ ފެށޭ ސީދާ ތާރީޚު ކަނޑައަޅާނެ ކަމަށް ބެލެވެއެވެ.

ރަމަޟާން މަހާއި އެހެނިހެން އިސްލާމީ ހަނދުމަސްތައް ފެށޭ ތާރީޚު ކަނޑައެޅެނީ ހިޖުރީ ކަލަންޑަރާ އެއްގޮތަށެވެ. މި ކަލަންޑަރު ބިނާވެފައިވަނީ ދުނިޔެ ވަށައިގެން ހަނދު ދައުރުވާ 12 މަހުގެ ސައިކަލްގެ މައްޗަށެވެ.

2026 ވަނަ އަހަރުގެ ރަމަޟާން މަހުގައި ރޯދައިގެ ވަގުތުތައް ދުނިޔޭގެ އެކި ކަންކޮޅުތަކުގައި ތަފާތުވާނެ ކަމަށް ބެލެވެއެވެ.

މަހުގެ ފުރަތަމަ ދުވަސްތަކުގައި ގިނަ ޢަރަބި ޤައުމުތަކުގައި - ސަޢޫދީ ޢަރަބިއްޔާ، މިޞްރު، ޔޫ.އޭ.އީ، ޤަޠަރު، އަދި ކުވެއިތް ހިމެނޭ ގޮތަށް - ރޯދައިގެ ވަގުތު ގާތްގަނޑަކަށް 12 ގަޑިއިރު ވާނެއެވެ. އަދި މި ބަރަކާތްތެރި މަހުގެ ފަހު ދުވަސްތަކާ ހަމައަށް ދާއިރު ދުވާލުގެ ވަގުތު އިތުރުވެ ގާތްގަނޑަކަށް 13 ގަޑިއިރާ ހަމައަށް އަރާނެއެވެ.