ޝައްވާލް މަހުގެ ހަނދު ފެނިއްޖެ ނަމަ އަންގަން އެދެފި

ޝައްވާލު މަހުގެ ހަނދު ފެނިއްޖެ ނަމަ އެކަން އެންގުމަށާއި، އެކަމާ ގުޅޭ ގޮތުން ހެކިބަސް ދިނުމަށް އައުމާއި ދިއުމުގެ ހަރަދުތައް ހަމަޖައްސައިދޭނެ ކަމަށް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ބުނެފި އެވެ.

އީދަށް ހަނދު ބެލުން އޮންނާނީ މި އަންނަ ހަފްތާގެ ބުދަ ދުވަހު ކަމަށާއި، ހަނދު ދުށް މީހަކު ނުވަތަ ބަޔަކު ވީއެންމެ އަވަހަކަށް ހަނދާ ބެހޭ މައުލޫމާތު ދިނުމަށް އެ އިދާރާ އިން އެދިފައިވެ އެވެ.

ހަނދު ދުށް މީހަކު ނުވަތަ ބަޔަކު ހެކިބަސް ދޭން ޖެހޭނީ މާލޭގައި ނަމަ، މާލޭގެ ކޯޓެއްގެ ގާޒީއެއްގެ ކުރިމަތީގަ އެވެ. އަދި އެހެން ރަށެއްގައި ނަމަ، އެ ރަށެއްގެ މެޖިސްޓްރޭޓް ކޯޓުގެ މެޖިސްޓްރޭޓެއްގެ ކުރިމަތީގަ އެވެ.

ޑީޖޭއޭ އިން ބުނި ގޮތުގައި މެޖިސްޓްރޭޓެއް ގާއިމުވެ ނެތް ރަށެއް ނަމަ، އެ ވަގުތަކު އެ ރަށެއްގެ މެޖިސްޓްރޭޓް ކޯޓާ ހަވާލުވެ ހުންނެވި މެޖިސްޓްރޭޓެއްގެ ކުރިމަތީގައި ހެކިބަސް ދެވޭނެ އެވެ.

ހަނދު ފެނިގެން އެ މައުލުމާތު ދޭއިރު ގާތްގަނޑަކަށް ހަނދު ހުރި އުސްމިނާއި މިސްރާބާއި އަދި އެ ނޫންވެސް އެފަދަ މައުލޫމާތު ދޭންޖެހޭ ކަމަށް ވެސް އެ އިދާރާ އިން ބުންޏެވެ.

ޝައްވާލު މަހުގެ ހަނދުގެ މައްސަލާގައި ވަކި ގޮތެއް ނިމެންދެން 18 މާރިޗު ވާ ބުދަ ދުވަހުގެ ހަވީރު 05:30 އިން ފެށިގެން ޑީޖޭއޭ އާއި ރަށްރަށުގެ މެޖިސްޓްރޭޓް ކޯޓުތަކާއި ރަށު ކައުންސިލު އިދާރާތަކާއި އަތޮޅު ކައުންސިލުތައް ވެސް ހުޅުވާފައި ހުންނާނެ ކަމަށް އެ އިދާރާ އިން ބުންޏެވެ.

މި ރަމަޟާން މަހަކީ ކަލަންޑަރުން އަދި ހިސާބުތަކުން ވެސް ދައްކާ ގޮތުން ތިރީސް ދުވަހުގެ މަހެކެވެ. ކަލަންޑަރުގައި މިހާރު އޮތް ގޮތުން ފިތުރު އީދު ދުވަހަށް ވާނީ އަންނަ ހަފްތާގެ ހުކުރު ދުވަހެވެ.

ނަމަވެސް ހަނދު ބެލުމަކީ އިސްލާމީ ޝަރީއަތުގައި ކަނޑައަޅާފައިވާ އުސޫލެކެވެ. އެހެންކަމުން ބުދަ ދުވަހު ހަނދު ބަލައި، ހަނދު ފެނިއްޖެ ނަމަ އެ ދުވަހުން ފެށިގެން ޝައްވާލު މަސް ފެށިގެން ދާނެ އެވެ. އެ ގޮތުން ފިތުރު އީދު ދުވަހަށް ވާނީ އަންނަ ހަފްތާގެ ބުރާސްފަތި ދުވަހެވެ.

ހަނދު ނުފެނިއްޖެ ނަމަ ރަމަޟާން މަސް ފުރިހަމަ ކުރުމަށްފަހު ފިތުރު އީދު ފާހަގަ ކުރާނީ އަންނަ ހަފްތާގެ ހުކުރު ދުވަހު އެވެ.