އުރުބާނީގެ ތައުރީފު ދިވެހި ފުޓުބޯޅަ އަށް، އެނބުރި އައީ ޓޮމްގެ ސަބަބުން

ދިވެހި ރާއްޖޭގައި ފުޓުބޯޅަ އަށް އޮންނަ ފޯރި އަށް ތައުރީފު ކުރުމާ އެކު، އަލުން ރާއްޖޭގެ ސީނިއާ ޤައުމީ ފުޓުބޯޅަ ޓީމާ ހަވާލުވާން ނިންމި ސަބަބަކީ ޤައުމީ ޓީމުގެ ކުރީގެ ފޯވާޑު އަޙުމަދު ޠާރިޤު (ޓޮމް) ކަމަށް، ދާދި ފަހުން ރާއްޖޭގެ ކޯޗުކަށް ހަމަޖެއްސި ހަންގޭރީގެ ތަޖުރިބާކާރު ކޯޗު އިސްތަވާން އުރްބާނީ ބުނެފި އެވެ.

އޭނާ މިހެން ބުނީ ހަންގޭރީގެ މީޑިއާ އަކަށް ދިން އިންޓަވިޔުއެއްގަ އެވެ. އެގޮތުން އަލުން އެނބުރި ރާއްޖެ އަށް އައުމުގެ ފަހަތުގައި އެތައް ސަބަބު ތަކެއް ވާ ކަމަށް އުރުބާނީ ބުންޏެވެ. ރާއްޖެ އަކީ އޭނާ އަށް ވަރަށް ރަނގަޅަށް އިނގޭ ޤައުމެއް ކަމަށާއި، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގައި ހުރީ އައު ރައީސެއް ކަމަށް އުރުބާނީ ބުންޏެވެ. އަދި އެއީ ރާއްޖެ އަންނަން ނިންމި އެއް ސަބަބު ކަމަށް އުރުބާނީ ވަނީ ބުނެފަ އެވެ.

ދެ ވަނަ ފަހަރަށް އެފްއޭއެމްގެ ރައީސް ކަމުގެ މަޤާމަށް ޓޮމް އިންތިޚާބު ކޮށްފައި ވަނީ 2025 ވަނަ އަހަރުގެ ޖުލައި މަހުގެ 26 ވަނަ ދުވަހު އެވެ. މީގެ ކުރިން ދެ ފަހަރެއްގެ މަތިން ރާއްޖޭގެ ޤައުމީ ޓީމަށް އުރުބާނީ އިރުޝާދު ދީފައިވާއިރު، ޤައުމީ ޓީމުގައި އޭރު ޓޮމް ވެސް ވަނީ ކުޅެފަ އެވެ. 

އެގޮތުން އުރުބާނީގެ އިރުޝާދުގެ ދަށުން 2009 ވަނަ އަހަރު ރާއްޖެ އިން ވަނީ ސަރަހައްދީ ފުޓުބޯޅަ މުބާރާތް، ސާފް ޗެމްޕިއަންޝިޕްގެ ފައިނަލްގައި ވާދަކޮށްފަ އެވެ. ބަންގްލަދޭޝްގައި އޮތް އެ މުބާރާތުގެ ފައިނަލްގައި ރާއްޖެ އިން އިންޑިއާއާ ދެކޮޅަށް ކުޅެ ބަލިވީއިރު، ރާއްޖޭގެ ޓީމުގައި އެންމެ މޮޅު ކުޅުމެއް ދެއްކި އެއް ކުޅުންތެރިޔަކީ ޓޮމް އެވެ. އެ ފަހަރުގެ މުބާރާތުގައި ހަތަރު ލަނޑު ޖަހައިގެން، ޓޮމް ވަނީ މުބާރާތުގެ އެންމެ ގިނަ ލަނޑު ޖެހި ކުޅުންތެރިންގެ ތެރޭގައި ވެސް ހިމެނި ރަން ބޫޓު ހޯދައިފަ އެވެ. 

އުރުބާނީ ބުނީ އިންޑިއާގައި އޮތް ސާފް ޗެމްޕިއަންޝިޕްގައި ރާއްޖެ އިން ރަނގަޅަށް ކުޅުނު ކަމަށާއި، ރަނގަޅު ނަތީޖާއެއް ވެސް ލިބުނު ކަމަށެވެ. އެކަމަކު، ރާއްޖޭގައި މަސައްކަތް ކުރި ދުވަސް ވަރު އޭނާ އެންމެ އުފާވީ، ރާއްޖޭގެ ޒުވާން ޤައުމީ ޓީމަށް އިރުޝާދު ދީ، އެ ޓީމާ އެކު މުބާރާތެއް ކާމިޔާބު ކުރެވިފައި އޮތުމުންނެވެ. އުރުބާނީގެ އިރުޝާދުގެ ދަށުން ރާއްޖޭގެ ޒުވާން ޓީމުން ވަނީ 2013 ވަނަ އަހަރު ސްރީ ލަންކާގައި ކުރިއަށް ގެންދިޔަ ރާޖަޕަކްސަ އިންޓަނޭޝަނަލް މުބާރާތް ކާމިޔާބު ކޮށްފަ އެވެ.

އެ މުބާރާތުގެ ހަނދާންތައް އައު ކުރަމުން އުރުބާނީ ބުނީ، އެ މުބާރާތް ކާމިޔާބު ކޮށްގެން އެނބުރި ރާއްޖެ އައިއިރު ތަފާތު އިޙުސާސެއް ކުރެވުނު ކަމަށެވެ. އެގޮތުން އޭނާ ބުނީ، އެ ދުވަހު ކުރެވުނީ ވޯލްޑް ޗެމްޕިއަންޝިޕް ކާމިޔާބު ކޮށްގެން އައި ކަހަލަ އިޙުސާސެއް ކަމަށާއި، ރާއްޖޭގައި ފުޓުބޯޅަ އަށް ވަރަށް ބޮޑު ފޯރިއެއް އޮންނަ ކަމަށެވެ. އަދި ފުޓުބޯޅަ އަކީ ރާއްޖޭގެ އެއް ނަންބަރު ކުޅިވަރު ކަމަށް ވެސް އޭނާ ބުންޏެވެ.

އުމުރުން މިހާރު 53 އަހަރުވެފައިވާ އުރުބާނީ އެންމެ ފުރަތަމަ ރާއްޖެ އަށް އިރުޝާދު ދީފައި ވަނީ 2009 ވަނަ އަހަރު އެވެ. ދެ ވަނަ ފަހަރަށް ރާއްޖޭގެ ކޯޗުކަމާ އޭނާ ހަވާލުވީ 2011 ވަނަ އަހަރު އެވެ. އޭގެ ފަހުން 2013 ވަނަ އަހަރު ރާއްޖޭގެ ކޯޗުކަން ދޫކޮށްލުމަށް ފަހު ވެސް، ފުޓުބޯޅައިގައި އޭނާ މަސައްކަތް ކޮށްފައިވެ އެވެ. ތިން ވަނަ ފަހަރަށް ރާއްޖޭގެ ކޯޗުކަމާ ހަވާލުވެފައިވާއިރު، އުރުބާނީ އަކީ ދިވެހި ފުޓުބޯޅަ އަށް ފަރިތަ ކޯޗެކެވެ. 

އެފްއޭއެމްގެ ރައީސް ޓޮމް އަށް އުރުބާނީ ތައުރީފު ކޮށްފައިވާއިރު، އެފްއޭއެމްގެ ރައީސް ކަމާ ހަވާލުވެ ޓޮމް އާއި އޭނާ ގެ ޓީމުން އަންނަނީ ގިނަ މަސައްކަތް ތަކެއް ކުރަމުންނެވެ. އެގޮތުން ވަޅު ޖެހިފައިވާ ދިވެހި ފުޓުބޯޅަ އަލުން ކޮޅަށް ޖެހުމަށް އެފްއޭއެމް އިން އަންނަނީ ގިނަ މަސައްކަތް ތަކެއް ކުރަމުންނެވެ.