ތަޖުރިބާކާރު ކޯޗު އުރްބާނީއާ ޤައުމީ ޓީމު ހަވާލު ކޮށްފި

ރާއްޖޭގެ ސީނިއާ ޤައުމީ ފުޓުބޯޅަ ޓީމުގެ ކޯޗަކަށް، ހަންގޭރީގެ ތަޖުރިބާކާރު ކޯޗު  އިސްތަވާން އުރްބާނީ ހަމަޖައްސައިފި އެވެ. 

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ޤައުމީ ޓީމުގެ ކޯޗަކަށް އުރުބާނީ ހަމަޖައްސާފައިވާއިރު، މީގެ ކުރިން ވެސް އޭނާ ވަނީ ރާއްޖޭގައި މަސައްކަތް ކޮށްފަ އެވެ. ޤައުމީ ޓީމަށް މީގެ ކުރިން އިރުޝާދު ދީފައިވާ އުރުބާނީ އަކީ، ރާއްޖޭގެ ފުޓުބޯޅަ ދަންނަ، ރާއްޖެ އަށް ފަރިތަ ކޯޗެކެވެ.

އުމުރުން މިހާރު 58 އަހަރުވެފައިވާ އުރުބާނީ ވަނީ މީގެ ކުރިން ދެ ފަހަރެއްގެ މަތިން ރާއްޖޭގެ ޤައުމީ ޓީމަށް އިރުޝާދު ދީފަ އެވެ. އެހެންކަމުން މިއީ، އުރުބާނީ ރާއްޖެ އަށް އިރުޝާދު ދޭނެ ތިން ވަނަ ފަހަރެވެ. އެންމެ ފުރަތަމަ އޭނާ ރާއްޖެ އަށް އިރުޝާދު ދީފައި ވަނީ 2009 ވަނަ އަހަރު އެވެ. އެ ފަހަރު ރާއްޖެ އިން ވަނީ ސަރަހައްދީ ފުޓުބޯޅަ މުބާާރާތް، ސާފް ޗެމްޕިއަންޝިޕްގެ ފައިނަލްގައި ވާދަކޮށްފަ އެވެ.

އޭގެ ފަހުން، ދެ ވަނަ ފަހަރަށް އުރުބާނީ ރާއްޖޭގެ ކޯޗުކަމާ ހަވާލުވީ 2011 ވަނަ އަހަރު އެވެ. އެ ފަހަރު އޭނާ ވަނީ ދެ އަހަރު ވަންދެން ރާއްޖެ އަށް އިރުޝާދު ދީފަ އެވެ. އޭރު އުރުބާނީ ވަނީ ރާއްޖޭގެ ޒުވާން އުމުރުފުރާގެ ޤައުމީ ޓީމަށް ވެސް އިރުޝާދު ދީފަ އެވެ. ދެ އަހަރުގެ އެއްބަސްވުމަށް ފަހު، ރާއްޖޭގެ ކޯޗުކަން އޭނާ ދޫކޮށްލީ 2013 ވަނަ އަހަރު އެވެ. 

ރާއްޖޭގެ ކޯޗުކަން ދޫކޮށްލި ފަހުން ވެސް އުރުބާނީ ވަނީ ކޯޗިންގައި މަސައްކަތް ކޮށްފަ އެވެ. އެގޮތުން އެންމެ ފަހުން އޭނާ މަސައްކަތް ކޮށްފައި ވަނީ ސްޕޯޓިން ކަންސަސް ސިޓީގަ އެވެ. އެފްއޭއެމް އިން ރާއްޖޭގެ ކޯޗަކަށް އުރުބާނީ ހަމަޖައްސާފައިވާއިރު، މި ފަހަރު އޭނާ އަށް ވަނީ ޓެކްނިކަލް ޑައިރެކްޓަރުގެ މަސްއޫލިއްޔަތު ވެސް ހަވާލު ކޮށްފަ އެވެ. 

ތިން ވަނަ ފަހަރަށް ރާއްޖޭގެ ކޯޗުކަމާ އުރުބާނީ ހަވާލުވެފައި މި ވަނީ، ދިވެހި ފުޓުބޯޅަ އަށް ވަރަށް މުހިންމު ވަގުތެއްގަ އެވެ. ޚާއްސަކޮށް ފުޓުބޯޅަ ކުރިއަރުވަން އެފްއޭއެމް އިން ގިނަ މަސައްކަތް ތަކެއް ކުރަމުން އަންނަ ވަގުތެއްގަ އެވެ. ބައިނަލްއަޤުވާމީ މައިދާނުގައި ވެސް ރާއްޖޭގެ ނަތީޖާތައް ދަށްވެފައި ވަނިކޮށް، އެފްއޭއެމްގެ އައު މެނޭޖުމަންޓް އިން އަންނަނީ ނަތީޖާ ރަނގަޅު ކުރުމަށް ގިނަ މަސައްކަތް ތަކެއް ކުރަމުންނެވެ.

އުރުބާނީގެ ކުރިން، ރާއްޖޭގެ ޤައުމީ ޓީމަށް އިރުޝާދު ދީފައި ވަނީ މުޙައްމަދު ޝިޔާޒް (މޯހަން) އެވެ. މޯހަންގެ އިރުޝާދުގެ ދަށުން ރާއްޖެ އިން ވަނީ ސްރީ ލަންކާގައި ކުރިއަށް ދިޔަ ސައުތު އޭޝިއަން ސުޕަ ކަޕް ކާމިޔާބު ކޮށްފަ އެވެ. މޯހަންގެ ކުރިން ރާއްޖެ އަށް އިރުޝާދު ދީފައި ވަނީ އަލީ ސުޒޭން އެވެ.