އީރާނާއި ލުބްނާނަށް އިޒްރޭލާއި އެމެރިކާ އިން ދެމުންދާ ހަމަލާތައް އދ. ގެ މިނިވަން މާހިރުންގެ ޕެނެލަކުން ކުށްވެރިކޮށްފި

އީރާނާއި ލުބުނާނަށް އަމާޒުކޮށް އެމެރިކާއާއި އިޒްރޭލުން ދެމުންގެންދާ ހަމަލާތައް އދ. ގެ މިނިވަން މާހިރުންގެ ގުރޫޕަކުން ކުށްވެރިކޮށްފިއެވެ.

އދ. ގެ އިންސާނީ ހައްގުތަކާ ބެހޭ 12 މިނިވަން މާހިރަކު ގުޅިގެން ނެރުނު ބަޔާނެއްގައި ބުނެފައިވަނީ، އެމެރިކާއާއި އިޒްރޭލުން އީރާނާއި ލުބުނާނަށް މެދުނުކެނޑި ދެމުންދާ އަސްކަރީ ހަމަލާތަކަކީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފަށް ހިންގަމުންދާ އުދުވާނެއް ކަމަށެވެ.

މި މާހިރުން ވިދާޅުވި ގޮތުގައި، މި ހަމަނުޖެހުންތަކުގެ ސަބަބުން މުޅި ސަރަހައްދު ނުރައްކާތެރި ހަނގުރާމައެއްގެ ތެރެއަށް ވެއްޓިގެން ދިއުމުގެ ބިރު އެބައޮތެވެ. އަދި ދުނިޔޭގެ އަސްކަރީ ގޮތުން އެންމެ ބާރުގަދަ ގައުމުތަކުން ބައިނަލްއަގުވާމީ ގާނޫނުތަކަށް ބެލުމެއްނެތި އަމަލުކުރި ނަމަވެސް، އެ ގައުމުތަކާ މެދު އެއްވެސް ފިޔަވަޅެއް ނޭޅޭނެ ކަމަށް ގަބޫލުކުރެވޭ ފަދަ ނުރައްކާތެރި ސަގާފަތެއް މީގެ ސަބަބުން އުފެދިގެންދާނެ ކަމަށްވެސް އެ ބަޔާނުގައި ފާހަގަކޮށްފައިވެއެވެ.

އދ. އިން ފަލަސްތީނުގެ އިސްތިއުމާރުކޮށްފައިވާ ސަރަހައްދުތަކަށް ކަނޑައަޅާފައި ހުންނަވާ ޚާއްސަ ރެޕަޓުއާ ފްރަންޗެސްކާ އަލްބަނީޒް ހިމެނިވަޑައިގަންނަވާ މި މާހިރުންގެ ގުރޫޕުން ވިދާޅުވީ، އެމެރިކާއާއި އިޒްރޭލުން ކުރަމުންދާ ހަނގުރާމަތައް ހުއްޓާލައި، ހަނގުރާމަ ފުޅާކުރުން ހުއްޓާލަން ޖެހޭ ކަމަށެވެ. އަދި އެ ގައުމުތަކަކީ ބައިނަލްއަގުވާމީ ގާނޫނުތަކަށްވުރެ މަތީގައި ތިބި ބައެއް ކަމަށް ދެކޭ ދެކުން ދޫކޮށްލަން ޖެހޭ ކަމަށްވެސް އެ ބަޔާނުގައި ބުނެފައިވެއެވެ.

މި ބަޔާނުގައި ސޮއިކުރެއްވި އެހެން މާހިރުންގެ ތެރޭގައި އިންސާނީ ހައްގުތަކާއި ޓެރަރިޒަމާ ދެކޮޅަށް މަސައްކަތްކުރާ ޚާއްސަ ރެޕަޓުއާ ބެން ސޯލްއާއި، ކާބޯތަކެތީގެ ހައްގުތަކާ ބެހޭ ޚާއްސަ ރެޕަޓުއާ މައިކަލް ފަޚްރީއާއި، ބޯހިޔާވަހިކަމާ ބެހޭ ޚާއްސަ ރެޕަޓުއާ ބާލަކްރިޝްނަން ރާޖަގޯޕާލް ހިމެނިވަޑައިގަންނަވައެވެ. މީގެ އިތުރުން އަންހެނުންނާއި އަންހެން ކުދިންނަށް ކުރާ ތަފާތުކުރުންތަކާ ދެކޮޅަށް މަސައްކަތްކުރާ އދ. ގެ ވޯކިން ގުރޫޕުން ވެސް ވަނީ މި ބަޔާނުގައި ބައިވެރިވެފައެވެ.