އައިއާރުޖީސީން އިޒްރޭލުގެ ދާޚިލީ ސަލާމަތީ އިދާރާ ޝިންބެޓްގެ މައިމަރުކަޒަށް ހަމަލާ ދީފި
13 މާރިޗު 2026 | ހުކުރު 01:07އިޒްރޭލުގެ އަސްކަރީ މަރުކަޒުތަކަށް އަމާޒުކޮށް އައިއާރުޖީސީން ދިން މި ހަމަލާތަކުގައި ގޮވާތަކެތި ހަރުކޮށްފައިވާ ޑްރޯންތައް ބޭނުންކޮށްފައިވާއިރު، މައިގަނޑު ގޮތެއްގައި އަމާޒުކޮށްފައިވަނީ އެއާބޭސްތަކުގެ ރަންވޭތަކަށާއި އޮބްޒަވޭޝަން ޓަވަރުތަކުގެ އިތުރުން ޝިން ބެޓްގެ މައި މަރުކަޒަށް. މި ހަމަލާތައް ދީފައިވާ ޕަލްމާހިމް އެއާބޭސްއަކީ އިޒްރޭލުގެ މިސައިލް ޑިފެންސް ސިސްޓަމްތަކާއި ޑްރޯންތައް ބަލަހައްޓާ މުހިންމު މަރުކަޒެއްގެ އިތުރުން، ސެޓެލައިޓްތައް ފޮނުވުމަށްވެސް ބޭނުންކުރާ ތަނެއް. މީގެ އިތުރުން އިޒްރޭލުގެ ވައިގެ ސިފައިން ތަމްރީނުކުރާ އޮވްބެޑާ އެއާބޭސްއާއި، އެ ގައުމުގެ ދާޚިލީ ސަލާމަތާ ބެހޭ އިދާރާގެ މައި މަރުކަޒަށްވެސް މި ހަމަލާތަކުގައި ބޮޑެތި ގެއްލުންތަކެއް ދީފައިވާކަމަށް އައިއާރުޖީސީން ބުނޭ.
އީރާނުން ގިނަ އަދަދެއްގެ ޑްރޯން ބޭނުންކޮށްގެން އިޒްރޭލަށް ވަރުގަދަ ހަމަލާތަކެއް ދީފައިވާ ކަމަށް ބުނޭ. | އެކްސް
އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ނެރުނު އާ ބަޔާނެއްގައި ބުނެފައިވަނީ، އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުންނަ ޕަލްމާހިމް އެއާބޭސް އާއި ޝިން ބެޓް (ޝަބަކް) ގެ މައި މަރުކަޒަށް އަމާޒުކޮށް ޑްރޯން ހަމަލާތަކެއް ދީފައިވާ ކަމަށެވެ.
އައިއާރުޖީސީން ހާމަކުރި ގޮތުގައި، އިޒްރޭލުގެ އަސްކަރީ މަރުކަޒުތަކަށް ދިން މި ހަމަލާގައި ބޭނުންކޮށްފައިވަނީ ގޮވާތަކެތި ހަރުކޮށްފައިވާ ނުރައްކާތެރި ޑްރޯންތަކެކެވެ. މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ ޕަލްމާހިމް އަދި އޮވްބެޑާ އެއާބޭސްގެ އޮބްޒަވޭޝަން ޓަވަރުތަކަށާއި، ރަންވޭތަކަށާއި، ބޯޓުފަހަރު ބާއްވާ ހޭންގަރުތަކުގެ އިތުރުން ޝިން ބެޓްގެ މައި މަރުކަޒަށެވެ.
ތެލް އަވީވް ކައިރީގައި ހުންނަ ޕަލްމާހިމް އެއާބޭސްއަކީ އިޒްރޭލުގެ ސެޓެލައިޓްތައް ފޮނުވުމަށާއި މިސައިލް ޓެސްޓުތައް ކުރުމަށް ބޭނުންކުރާ މަރުކަޒެކެވެ. މީގެ އިތުރުން، އެ ތަނަކީ "ޑޭވިޑްސް ސްލިންގް" މިސައިލް ޑިފެންސް ސިސްޓަމާއި "ހާމީސް 900" މަރުކާގެ ޑްރޯންތައް ބަލަހައްޓާ މަރުކަޒުވެސް މެއެވެ.
އޮވްބެޑާ އެއާބޭސްއަކީ އިޒްރޭލުގެ ވައިގެ ސިފައިން ތަމްރީނު ކުރުމަށް ބޭނުންކުރާ ސްޓްރެޓީޖިކް މަރުކަޒެކެވެ. ތާރީޚީ ގޮތުން ބަލާއިރު، މި މަރުކަޒަކީ އެމެރިކާގެ އެފް-22 މަރުކާގެ ފައިޓާ ޖެޓްތައްވެސް ބޭނުންކުރާ ތަނެކެވެ.
އިޒްރޭލުގެ ދާޚިލީ ސަލާމަތާ ބެހޭ އިދާރާ ކަމަށްވާ ޝިން ބެޓަކީ، އެ ގައުމުގެ ސަލާމަތީ އޮޕަރޭޝަންތައް ކޮމާންޑްކޮށް، އިސްވެރިންނާއި މުހިންމު މަރުކަޒުތައް ރައްކާތެރިކުރުމުގެ މަސައްކަތްތައް ވިލަރެސްކުރާ މައި އިދާރާއެވެ.
މަސްދަރު: ތަސްނީމް ނިއުސް އޭޖެންސީ
