ފޯމިއުލާ ވަންގެ ސިންގަޕޯ ގްރޭންޑް ޕްރީ އިނގިރޭސިވިލާތުގެ ލުއިސް ހެމިލްޓަން ކާމިޔާބުކޮށްފިއެވެ.
ސިންގަޕޫރުގެ "މެރީނާ ބޭ ސްޓްރީޓް ސާކިޓް" ގައި ކުރިޔަށް ދިޔަ މި ރޭސް ހެމިލްޓަން ކާމިޔާބުކޮށްފައިވަނީ ރެޑްބުލް ރޭސިންގެ ޑެނިއެލް ރިކާޑޯއާ މާސީޑީސް ރޭސިންގެ ވަލްޓޭރީ ބޯޓާސް ފަހަތަށް ޖައްސާލުމަށްފަހުއެވެ.
61 ލެޕްގެ މި ރޭސް ހެމިލްޓަން ނިންމާފައިވަނީ ދެ ގަޑިއިރާ ތިން މިނިޓުންނެވެ. އޭނާގެ ފަހަތުން ދެވަނައަށް ނިންމި ރެޑްބުލް ރޭސިންގެ ޑެނިއެލް ރިކާޑޯއަށް ރޭސް ނިންމުނީ ހެމިލްޓަންއަށް ވުރެ ހަތަރު ސިކުންތު ފަހުންނެވެ. އަދި ތިންވަނައަށް ރޭސް ނިންމި މާސިޑީސްގެ ވަލްޓޭރީ ބޯޓާސްއަށް ރޭސް ނިންމާލެވިފައިވަނީ ހެމިލްޓަންއަށް ވުރެ އަށް ސިކުންތު ލަހުންނެވެ.
ރޭހުގެ ފުރަތަމަ ލެޕުގައި މާސިޑީސްއާ އެންމެ ބޮޑަށް ވާދަކުރަމުން އަންނަ ފެރާރީގެ ދެ ޑްރައިވަރުން ކަމަށްވާ ސެބެސްޓިއަން ވެޓެލްއާ ކިމީ ރައިކޮނެން ވަނީ އެކްސިޑެންޓެވެފައެވެ. ރޭސް ނިންމާލުމަށްފަހު ނޫސްވެރިންނާ ވާހަކަ ދައްކަމުން ހެމިލްޓަން ބުނެފައިވަނީ އޭނާގެ ކެރިއަރުގައި 60 މޮޅު ލިބުމަކީ ގަބޫލްކުރަން ދަތި ކަމެއް ކަމަށާއި ރޭހުން މޮޅުވުމުގައި ނަސީބު ވަރަށް ބޮޑަށް އެހީތެރިވި ކަމަށެވެ.
މި މޮޅާއެކު ހެމިލްޓަންވަނީ ޑްރައިވަރުންގެ ރޭންކިންގައި ވެޓެލްއާ ދެމެދު އޮތް ފަރަގު 28 ޕޮއިންޓަށް ބޮޑުކޮށްފައެވެ އެގޮތުން އެއްވަނައިގައި ހެމިލްޓަންއޮތީ 263 ޕޮއިންޓާއެކެއެވެ. ފެރާރީގެ ޑްރައިވަރު ވެޓެލް އޮތީ 235 ޕޮއިންޓާއެކު ދެވަނައިގއެވެ އަދި 212 ޕޮއިންޓާއެކު ތިންވަނައިގައި އޮތީ މާސިޑީސްގެ ވަލްޓޭރީ ބޯޓާސްއެވެ.
ޓީމުތަކުގެ ރޭންކިންގެ އެއްވަނައިގައި 475 ޕޮއިންޓާއެކު މާސިޑީސް އޮތްއިރު 373 ޕޮއިންޓާއެކު ދެވަނައިގައި އޮތީ ފެރާރީއެވެ. ފޯމިއުލާ ވަންގެ ރޭހެއް ދެން އޮންނާނީ އޮކްޓޯބަރު މަހުގެ އެއްވަނަ ދުވަހު މެލޭޝިއާގެ "ސެޕަންގެ އިންޓަނޭޝަނަލް ސާކިޓް" ގައެވެ.
