މިސަރުކާރުން ކުރާ ކޮންމެ ކަމެއްގައި ރައްޔިތުންނަށް އެހެން މޫނެއް ދެއްކުމަށްފަހު، އަޑިން ކުޅެނީ ނުބައި ކާޑެއް: ނިޝާން

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ކުރާ ކޮންމެ ކަމެއްގައި ރައްޔިތުންނަށް އެހެން މޫނެއް ދެއްކުމަށްފަހު، އަޑިން ކުޅެނީ ނުބައި ކާޑެއް ކަމަށް މަޝްހޫރު ގާނޫނީ ވަކީލު މުހައްމަދު ނިޝާން އިބްރާހިމް ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ނިޝާން ވިދާޅުވީ މިސަރުކާރަށް ދެ އަހަރާއި ބައި ވަމުންދާއިރު، މިހާތަނަށް ކޮށްފައިވާ މަސައްކަތްތަކާއި ދައްކާފައިވާ ވާހަކަތަކުން ނަތީޖާ ރައްޔިތުންނަށް ފެނިފައިވާ ކަމަށެވެ. އަދި މިސަރުކާރުން މިހާތަނަށް ކުރި ކޮންމެ ކަމެއްގައި ރައްޔިތުންނަށް މުޅިން ވެސް ތަފާތު މޫނެއް ދެއްކުމަށްފަހު އަޑިން ކުޅިފައި އޮތީ ނުބައި ކާޑެއް ކަަމަށް އޭނާ ވިދާޅުވި އެވެ. 

އީފާސް ބޭނުން ކުރުމާއި، އިލެކްޓްރޯނިކް ވޯޓިން ނިޒާމަށް އިޝާރާތް ކުރައްވައި ނިޝާން ވިދާޅުވީ، ޚިދުމަތަށް އެދުމާއި، ޚިދުމަތް ދިނުން އީފާހަށް ބަދަލު ކުރަމުންދަނީ އެކަމުގެ ފަހަތުގައި ނުދައްކާ އެތައް އަނދިރި ވާހަކަތަކެއް ހުރުމުން ކަމަށެވެ. އަދި އިލެކްޓޯރިކް ވޯޓިން ނިޒާމަކީ އިތުބާރު ކުރެވޭ ނިޒާމެއް ނޫން ކަމަށާއި، ހުރިހާ ކަމެއްގައި އިލެކްޓޯރިކް ކުރުމުން ސަރުކާރުން ބޭނުންވާ ނަތީޖާއެއް ނެރެވޭނެ ކަމަށް އޭނާ ވިދާޅުވި އެވެ.

އަޅުގަނޑުމެން މިކަންކަން ހިސާބު ޖަހާ ރީތިކޮށް ބަލައި ގާނޫނީ އިލްމީ ސިޔާސީ ނަޒަރިއްޔާތާއި، ހުރިހާ ކަމެއް އެއްކޮށްލީމަ ބެލީމަ މިފެންނަނީ އަޑި ނޭނގޭ ކަންތައްތަކެއް މިކަހަލަ ކޮންމެ ކަމެއްގައި ވެސް މިސަރުކާރުން ކުރަން ދިމާކޮށްފައި އޮތްކަން އެނގޭތޯ. އެކަން މި އެނގެނީ އެއްކަލަ އަޅުގަނޑުމެން ބުނާހެން އޮންނާނެ ޅެން ވެރިޔާގެ ބަނޑުގައޭ އޮންނަނީ މާނަ. ދިވެހި ބަހުގައި އޮންނަ ހަރު ބަހެއް. ޅެމެއްގެ އަސްލު މާނަ އޮންނާނީ ޅެން ވެރިޔާގެ ބަނޑުގައޭ. ބޭރަށް ދައްކަނީ އެހެން އެއްޗެކޭ. ހަމަ އެކަހަލަ ގޮތަކަށް މިސަރުކާރުގެ ކަންތައްތައް މިހުރީ އެނގޭތޯ. 

މަޝްހޫރު ގާނޫނީ ވަކީލު މުހައްމަދު ނިޝާން އިބްރާހިމް

މީގެ އިތުރުން ނިޝާން ވިދާޅުވީ، މިސަރުކާރަށް މިވީ މުއްދަތުގެ ތެރޭގައި ސަރުކާރުގެ ނަތީޖާއާ މެދު ރައްޔިތުން ހިތްހަމަ ނުޖެހޭ ކަމަށާއި، މުޅި ރާއްޖޭގައި ވަރަށް ބޮޑު ނުތަނަވަސްކަމެއް އެބައޮތް ކަމަށެވެ. 

ނިޝާން ވިދާޅުވީ ސަރުކާރު ދުވަނީ  ފިނިހަކަ ދުވެލީގައި ކަމަށާއި، ދާން ޖެހޭ ސްޕީޑްގައި ކުރިއަށް ނުދާ ކަމަށެވެ. ސަރުކާރުން ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ފޯރުކޮށްދިނުމުގައި ފެއިލްވެފައިވާ ކަމަށާއި، މިހާރު ވެސް ގިނަ ކަންކަމުގައި ސުވާލު އުފައްމުންދާ ކަމަށް އޭނާ ވިދާޅުވި އެވެ.

ނިޝާން ވިދާޅުވީ ރައްޔިތުންގެ ސުވާލުތަކާއެކު، ސަރުކާރު ކޮށިއަރާ ކަމަށާއި، ޕަރފޯމަންސްއަށް ރައްޔިތުން ދޭނީ ޑީ ގްރޭޑް ކަން ޔަގީންވާ ކަމަށެވެ. އެ ނަތީޖާ މުޅި ދުނިޔެއަށް ފެނިގެން ދާނީ އިންތިޚާބުތަކާ ގުޅިގެން ނަގާ ވޯޓުން ކަަމަށާއި، އިލެކްޓްރޯނިކް ކުރުމުން ނަތީޖާ ބޭނުން ގޮތަކަށް އަނބުރާލުމުގެ ބާރު ސަރުކާރަށް ލިބޭ ކަމަށް އޭނާ ވިދާޅުވި އެވެ. އަދި ވިދާޅުވީ އިލެކްޝަން ކޮމިޝަންގެ މިނިވަންކަން ވެސް ގެއްލުވާލީ އިންތިޚާބުތަކަށް ނުފޫޒު ފޯރުވުމަށް ކަމަށް ނިޝާން ވިދާޅުވި އެވެ.