ޓެކްސީ ލައިންގެ ހިދުމަތް ފަށާނެ ކަމަށް ދިން 3 ވަނަ ތާރީހު ފަހަނައަޅައިގޮސް އަނެއްކާވެސް އިތުރު ތާރީހެއް ދީފި
ސަރުކާރުން އަލަށް ފަށާ ޓެކްސީ ލައިންގެ ޚިދުމަތް މި މަހުގެ 18 ވަނަ ދުވަހު ފެށުމަށް ތައްޔާރުވަމުންދާ ކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެ. މި ޚިދުމަތަށް ބޭނުންވާ ޓެކްސީތައް ދެ ބެޗަކަށް ބަހާލައިގެން ރާއްޖެ ގެނައުމުގެ މަސައްކަތް ކުރަމުންދާއިރު، ފުރަތަމަ ބެޗު މި މަހުގެ 11 ވަނަ ދުވަހު ރާއްޖެ އަންނާނެ ކަމަށް މިނިސްޓަރު ވިދާޅުވި. އެމްޓީސީސީއާ ގުޅިގެން ކުރިއަށްގެންދާ މި މަޝްރޫޢު ފެށުން އެކި ސަބަބުތަކާ ހުރެ މީގެ ކުރިން ތިން ފަހަރެއްގެ މަތިން ވަނީ ފަސްކޮށްފަ.
ޓްރާންސްޕޯޓް މިނިސްޓަރު އަމީނު (ވ) އާއި ރައީސް ޑރ. މުހައްމަދު މުޢިއްޒު (ވ). | ރާއްޖެ އެމްވީ
3 ފަހަރެއްގެ މަތިން ތާރީހު ދިނުމަށްފަހު ވެސް ސަރުކާރުން ފަށަން އުޅޭ ޓެކްސީ ލައިންގެ ހިދުމަތް ނުފެށި އަނެއްކާ ވެސް އިތުރު ތާރީހެއް ޓްރާންސްޕޯޓް މިނިސްޓަރު މުޙައްމަދު އަމީން ދެއްވައިފި އެވެ.
3 ފަހަރެއްގެ މަތިން ޓެކްސީ ލައިންގެ ހިދުމަތް ފަށަން ތާރީހު ދީފައިވާ އިރު، އެންމެ ފަހުން މި ހިދުމަތް ފަށާނެ ކަމަށް "ރައްޔިތުންނާއެކު ކުރިއަށް - ހަފުތާ 104" މިނަމުގައި ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ އެންމެ ލަސްވެގެން ފެބްރުއަރީ މަހުގެ ތެރޭގައި ހިދުމަތް ފެށޭނެ ކަމަށެވެ. ނަމަވެސް ފެބްރުއަރީ މަސް ނިމިގެން ދިޔަ އިރު ވެސް ހިދުމަތް ނުފަށަ އެވެ.
ޓެކްސީ ލައިންގެ ހިދުމަތާއި ގުޅޭގޮތުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ ޓެކްސީ އިލެކްޓްރޯނިކް ނިޒާމުތަކަށް ބަދަލުތަކެއް ގެންނަންޖެހޭ ކަމަށެވެ. އަދި ރާއްޖޭގެ ރަށްތައް މޫދާ ވަރަށް ކައިރީގައި އޮތުމުން، ލޮނުގެ އަސަރުކުރާތީ ގެންނަން ޖެހޭ ބަދަލުތައް ގެނެސް ނިމިގެން 2 ބެޗަކަށް ގެންނަން ނިންމާފައިވާ ކަމަށެވެ. އެގޮތުން ފުރަތަމަ އެމް.ޓީ.ސީ.ސީ އިން ޕްލޭން ކޮށްފައި އޮތީ 2 ޤައުމެއްގައި 2 ބެޗަކަށް ތައްޔާރުކޮށްގެން ގެންނަން ކަމަށެވެ.
އަދި ދެ ބެޗު ވެސް މިހާރު ނިމިގެން ރާއްޖެއަށް އައުމުގެ މަގުމަތީގައި އުޅޭ ކަމަށް މިނިސްޓަރ ވިދާޅުވި އެވެ. އަދި ބުދަ ދުވަހު އެއް ބެޗު ސްރީލަންކާގެ ޕޯޓަށް ވަންނާނެ ކަމަށާއި، އެހެންވީމާ، ލިބިފައި ހުރި މަޢުލޫމާތުތަކަށް ބަލާއިރު، އިރާދަކުރެއްވިއްޔާ މި މަހުގެ 11 ވަނަ ދުވަހު އެއް ބެޗު ރާއްޖެ އަންނާނެ ކަމަށެވެ.
ދެން ދެ ވަނަ ބެޗު އަންނަނީ ޗައިނާއިން. އެއީ އިތުރަށް ޖުމުލަ ތިން މޮޑެލްއަށް މީގެތެރޭގައި މި ހިމެނެނީ ޓެކްސީގެ އެއް މޮޑެލެއް އަންނަނީ ތައިލެންޑުން. އަނެއް ދެ މޮޑެލް އަންނަނީ ޗައިނާއިން އިނގޭތޯ. މި އަނެއް ދެ މޮޑެލް މިހާރު އައުމުގެ މަގުމަތީގައި އަޅުގަނޑަށް ޔަޤީން އަޅުގަނޑު މިއަދު ދެން މި ތަނަށް އަންނަން މަޢުލޫމާތު ސާފުކޮށްލި އިރުގައި މާދަން ނޫން އަނެއް ދުވަހު އެއީ ހުކުރު ދުވަހު އެރައިވަލް ޑޭޓް ލިބޭނެ ދެ ވަނަ ބެޗުގަ. ފުރަތަމަ ބެޗުގެ އެރައިވަލް ޑޭޓަކީ ޓެކްސީތަކުގެ އެރައިވަލް ޑޭޓަކީ މި މަހުގެ އެގާރަ އިނގޭތޯ. އެހެންވީމަ އަޅުގަނޑު އުއްމީދުކޮށްގެން މަސައްކަތްކުރަމުން މި ގެންދަނީ. މި ޓެކްސީ ލައިނަކީ ހަމަ ޑަންލާފަ އެއްދުވަހު ފުލް ފުލެޖް އޮޕަރޭޝަނަކަށް ނެރެވޭނެ ކަންތައްތައް، އޭގެ އެޕްލިކޭޝަން ޕްރޮސެސްއަކާ ހުޅުވާލަމުން ގެންދާނީ މި ވަކި މިންގަނޑު ތެރޭގައި. އެކަމަކު ޓެކްސީލައިންގެ އިފްތިތާޙުކޮށް ލިމިޓެޑް ސަރވިސްތަކެއް ފެށުމަށް އަޅުގަނޑުމެން މަސައްކަތްކުރަނީ އިރާދަކުރެއްވިއްޔާ މި މަހުގެ 18 އަށް. އީދަށް މި ކަންތައް ފެށޭތޯ އެމް.ޓީ.ސީ.ސީ.ން މަސައްކަތްކުރަމުން ދަނީ. އެ އެމް.ޓީ.ސީ.ސީ.ން ސަރުކާރާ ގުޅިގެން އިރާދަކުރެއްވިއްޔާ އަޅުގަނޑުމެން ހަމަ މިހާރު މި އޮތް ތާވަލާ އެއްގޮތަށް މި ކަންތައް ކުރެވޭތޯ ބަލަނީ އިނގޭތޯ؟ޓްރާންސްޕޯޓް މިނިސްޓަރު މުޙައްމަދު އަމީން
އެންމެ ފުރަތަމަ މި ހިދުމަތް ފެށުމަށް ސަރުކާރުން ދިން ތާރީހަކީ މިދިޔަ އަހަރުގެ ޖުލައި މަސް ތެރެ އެވެ. ނަމަވެސް ސަރުކާރުން ބުނި ގޮތަށް ޖުލައި މަހުގެ ފުރަތަމަ ހަފްތާގައި ވެސް ހިދުމަތް ނުފެށި މިދިޔަ އަހަރުގެ އޮގަސްޓް މަހުގެ މެދުތެރޭގައި ފަށާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވި އެވެ. ނަމަވެސް މިއަދާ ހަމައަށް އައި އިރުވެސް ހިދުމަތް ފަށާފައި ނުވާ އިރު މިކަމާއި ގުޅޭ ތަފްސީލެއް ވެސް ސަރުކާރުން ނުދެ އެވެ.
މާލެ ސަރަހައްދުގައި ޓެކްސީގެ ޚިދުމަތް ދިނުމަށް ސަރުކާރުން ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާ ހަވާލުކޮށްފަ އެވެ. މި މަސައްކަތް އެމްޓީސީސީއާ ހަވާލުކުރެވުނީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ. ޓެކްސީ ލައިނާއި ގުޅޭގޮތުން މިނިސްޓަރު އަމީން ވިދާޅުވީ ޓެކްސީ ލައިންގެ ޚިދުމަތް ފެށުމުގެ ކުރިން ގިނަ މަސައްކަތްތަކެއް ކުރަން ޖެހޭ ކަމަށެވެ. އަދި ހަމައެކަނި އެ ޚިދުމަތް ދިނުމަށް ބޭނުންވާ ކާރު ގެނައުމަކުން ޚިދުމަތް ނުފެށޭނެ ކަމަށް ވެސް އަމީން ވަނީ ވިދާޅުވެފަ އެވެ. އެގޮތުން ޓެކްސީ ލައިންގެ ޚިދުމަތަށް ބޭނުންވާ ޕްރޮޑަކްޝަންގެ މައްސައްކަތް މިދިޔަ އަހަރުގެ ޖޫން މަހު ފަށާނެ ކަމަށް ބުނެފައިވެ އެވެ.
