މަސްތުވާތަކެތީ ގެ މައްސަލަތަކާއި ގުޅިގެން އުމުރަށް ޖަލަށްލުމުން އެ ކުށަށް މާފު ނުދެވޭ ގޮތަށް ހަދާ އުމުރަށް ޖަލަށްލުން މާނަ ކުރާ ގޮތަށް މަސްތުވާތަކެތީ ގެ ބިލު އިސްލާހުކޮށްފި އެވެ.

އެ ބިލަށް އިސްލާހު ހުށަހެޅުއްވީ ރައްޔިތުން ގެ މަޖިލީހު ގެ ގަމު ދާއިރާ ގެ މެންބަރު ޔޫސުފް ރަޝީދު އެވެ.

މަސްތުވާތަކެއްޗާ ބެހޭ ގާނޫނު މަޖިލީހުން ބުދަ ދުވަހު އިސްލާހުކޮށްފައިވަނީ 65 މެންބަރުން ގެ ވޯޓާ އެކު އެވެ. ބިލަށް އިދިކޮޅު އެމްޑީޕީ ގެ މެމްބަރު ވޯޓު ދެއްވާފަ އެއް ނުވެ އެވެ.

މި ބިލު މަޖިލީހުގައި ގިނަ ދުވަސްތަކެއް ވަންދެން ތާށިވެފައި އޮތްކަން ފާހަގަކޮށްލެވެ އެވެ. އެގޮތުން މި ބިލު ކޮމިޓީ މަރުހަލާގައި އޮންނަތާ އަހަރެއްހާ ދުވަސް ވަނީ ވެފަ އެވެ. ބިލު ފާސްކުރީ ކޮމިޓީ އިން ގެނައި އިސްލާހުތަކާއި އެކުގަ އެވެ.

މިހާރު ޤާނޫނު އޮންނަ ގޮތުން ނަމަ މަސްތުވާތަކެތީ ގެ މައްސަލަތަކުގައި އުމުރު ދުވަހަށް ޖަލަށް ލުން ކަމަށް ބުނެފައި ވަނީ 25 އަހަރު ގެ ބަދަލުގައި އެ މީހެއް ގެ އުމުރު ގެ ބާކީ އޮތް މުއްދަތަށް ކަމަށް އާ އިސްލާހުގައި ބުނެފައި ވެއެވެ. އާ އިސްލާހު ބުނާ ގޮތުން މިފަދަ މައްސަލަ އެއްގައި އުމުރު ދުވަހަށް ޖަލަށް ލައިފި ނަމަ އެ މީހެއް ގެ ކުށު ގެ އަދަބަށް ލުޔެއް ވެސް ނުދެވޭނެ އެވެ.

މިހާރު ގެނައި އިސްލާހުގައި "އުމުރަށް ޖަލަށްލުން'' ކަމަށް ބަޔާންކޮށްފައި ވަނީ ޕެރޯލް ގެ ދަށުން ލުއި ނުލިބޭ ގޮތަށް ވަނީ އުމުރަށް ޖަލަށް ލުމުން ދޫނުކުރެވޭ ގޮތަށް އަދި ކުށަށް މާފު ވެސް ނުދެވޭނެ ކަމަށް ބަޔާންކޮށްފަ އެވެ. މިފަދަ އިސްލާހެއް ގެނައުމު ގެ ބޭނުމަކީ އުމުރު ދުވަހަށް ޖަލަށްލުމަކީ އޭނާ ގެ އުމުރު ގެ ނިޔަލަށް ކުރާ ޙުކުމެއްކަން ސާފުކޮށް ބަޔާންކޮށްދިނުން ކަމަށް ކޮމިޓީ މަރުހަލާގައި ސަރުކާރު ގެ މެމްބަރުން ވަނީ ބުނެފަ އެވެ.

ރާއްޖެ އަންނަ އިރު މަސްތުވާތަކެތި އެތެރެކުރާ މީހުންނަށް މަރު ގެ އަދަބު ދިނުމަށް ވެސް މި ބިލުގައި ހިމަނާފައިވެ އެވެ. މަރު ގެ އަދަބު ވެސް މާފު ނުކުރެވޭނެ ކަމަށާއި ލުއި ނުކުރެވޭނެ ކަމަށް އެ އިސްލާހުގައި ބަޔާންކޮށްފައި ވެއެވެ. ހަމައެހެންމެ އުމުރުަށް ޖަލަށް ލުމުން ނުވަތަ މަރު ގެ އަދަބު ދޭ މީހަކާއި އެކު އިއުތިރާފް ގެ އެއްބަސްވުމެއް ހަދައިގެން ނުވާނެ ކަމަށް އެ އިސްލާހުގައި ބަޔާންކޮށްފައި ވެއެވެ.

މި ބިލަކީ ރާއްޖޭގައި މަސްތުވާ ތަކެތިން ވިޔަފާރި ކުރުމާއި މަސްތުވާތަކެތި ޓްރެފިކް ކުރުމު ގެ ވިޔަފާރި އިތުރަށް ފުޅާވެ، މަސްތުވާތަކެތި ގެންގުޅުމާއި ބޭނުންކުރާ މިންވަރު އިތުރުވެ، މިކަމާ ގުޅޭ ކުށްތައް އިތުރުވަމުންދާތީ ހުށަހެޅި ބިލެއް ކަމަށް ސަރުކާރުން ބުނެ އެވެ.

އެެހެންކަމުން އެކަންކަން ހުއްޓުވުމަށްޓަކައި ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރު ކުރުމަކީ މުހިއްމު ކަމެއް ކަމަށް ވެސް ބިލުގައި ފާހަގަކޮށްފައި ވެއެވެ.