ޑްރަގް އެތެރެކުރާ މީހުންނަށް މަރު ގެ އަދަބު ދެވޭ ގޮތް ހަދަން ފާސްކޮށްފި
މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭނީ ސުޕްރީމް ކޯޓުގެ ހުރިހާ ފަނޑިޔާރުންގެ އިއްތިފާގުން
ސުޕްރީމް ކޯޓު
މަސްތުވާތަކެތި އެތެރެކުރާ މީހުންނަށް މަރު ގެ އަދަބު ދެވޭގޮތަށް މަސްތުވާތަކެތީ ގެ ގާނޫނު އިސްލާހުކުރަން ރައްޔިތުންގެ މަޖިލީހުން ފާސްކޮށްފި އެވެ.
ބުދަ ދުވަހު ގެ ރައްޔިތުންގެ މަޖިލީހުގެ ޖަލްސާގައި މަސްތުވާތަކެތީ ގެ ގާނޫނަށް ހުށަހެޅި އިސްލާހުގެ ބިލު ފާސް ކޮށްފައިވަނީ 65 މެންބަރުންގެ އިއްތިފާގުންނެވެ.
ސަރުކާރުގެ ފަރާތުން ގަމު ދާއިރާގެ މެންބަރު ޔޫސުފް ނަޝީދު ހުށަހެޅުއްވި މި ބިލަކީ ރާއްޖޭގައި މަސްތުވާ ތަކެތިން ވިޔަފާރި ކުރުމާއި މަސްތުވާތަކެތި ޓްރެފިކް ކުރުމުގެ ވިޔަފާރި އިތުރަށް ފުޅާވެ، މަސްތުވާތަކެތި ގެންގުޅުމާއި ބޭނުންކުރާ މިންވަރު އިތުރުވެ، މިކަމާ ގުޅޭ ކުށްތައް އިތުރުވަމުންދާތީ ހުށަހެޅި ބިލެއް ކަމަށް މެންބަރު ވިދާޅުވި އެވެ.
އެެހެންކަމުން އެކަންކަން ހުއްޓުވުމަށްޓަކައި ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރު ކުރުމަކީ މުހިއްމު ކަމެއް ކަމަށް ވެސް ބިލުގައި ފާހަގަކޮށްފައި ވެއެވެ.
މި ބިލު ދިރާސާ ކޮށްފައިވަނީ މަޖިލީހުގެ ޖުޑީޝަރީ ކޮމިޓީ އިންނެވެ. އަހަރެއްހާ ދުވަހު ޖުޑީޝަރީ ކޮމިޓީގައި މި ބިލު އޮތުމަށް ފަހު ބުދަ ދުވަހުގެ ޖަލްސާގައި ކޮމިޓީ އިން ބިލު ދިރާސާ ކޮށް ނިންމި ގޮތުގެ ރިޕޯޓު، ބައެއް އިސްލާހު ތަކާއެކު މަޖިލީހުގެ ތަޅުމަށް ހުށަހަޅާފައި ވެއެވެ.
ބިލުގައި ވާގޮތުން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމަށް ކަނޑައެޅިދާނެ އެވެ. އަދި އެ އަދަބު ކަނޑައެޅޭނީ ސުޕްރީމް ކޯޓުގެ ފަޑިޔާރުންގެ ބެންޗުގައި ތިއްބާވާ ހުރިހާ ފަނޑިޔާރުންގެ އިއްތިފާގުން ކަމަށް ބިލުގައި ފާހަގަ ކޮށްފައި ވެއެވެ.
އެންމެ ފަނޑިޔާރަކު ވެސް މަރުގެ އަދަބު ދޭން ދެކޮޅު ހަދާ ނަމަ އެމީހަކަށް ދޭނެ އަދަބަކީ އުމުރަށް ޖަލަށްލުމާ އެކު، 1 ލައްކަ ރުފިޔާ އާއި 10 މިލިއަން ރުފިޔާއާ ދެމެދު އަދަދަކުން ޖޫރިމަނާ ކުރުމެވެ. އެއީ މިހާރު ވެސް ގާނޫނުގައި ބަޔާން ކުރާ އަދަބެވެ.
މަރުގެ އަދަބު ކަނޑައެޅޭނީ ވަކި ޝަރުތުތަކެއް ފުރިހަމަވާނަމަ ކަން ފާހަގަކޮށް ބިލުގައި އެ ތިން ޝަރުތު ބަޔާން ކޮށްފައި ވެއެވެ. އެގޮތުން މީހަކަށް އެ އަދަބު ކަނޑައެޅޭނީ އެ މީހަކު ރާއްޖެއަށް އެތެރެކުރި މަސްތުވާތަކެތީގެ ބަރުދަނަކީ 350 ގްރާމަށް ވުރެ އިތުރު މިންވަރުގެ ކެނަބިސް ކަމުގައިވާނަމަ އެވެ.
ނުވަތަ އެތެރެ ކޮށްފައި ވަނީ 250 ގްރާމަށް ވުރެ އިތުރު މިންވަރެއްގެ ޑައިމޯފިން ކަމަށް ވުން ނުވަތަ ކެނެބިސް ނުވަތަ ޑައިމޯފިން ފިޔަވައި ޖަދުވަލުގެ އެކެއްގައިވާ މަސްތުވާތަކެތީގެ ބާވަތެއް ނަމަ، 100 ގްރާމަށް ވުރެ މަތިވުން ކަމަށް ބިލްގައި ވެއެވެ. ޖަދުވަލު އެކެއްގައި 139 ބާވަތެއްގެ މަސްތުވާތަކެތި ހިމެނެ އެވެ.
މީގެ އިތުރުން މަރުގެ އަދަބު ދެވޭނީ އެ މީހަކު ރާއްޖެއަށް އެތެރެކުރި މަސްތުވާއެއްޗަކ،ީ އޭނާ ރާއްޖެއަށް އެތެރެވިއިރު އެތެރެކުރި އެއްޗަކަށްވާނަމަ ކަމަށް ވެސް ބިލުގައި ބަޔާން ކޮށްފައި ވެއެވެ.
އެ ބިލުގައި ވަނީ މަސްތުވާތަކެތި ބޭނުންކުރާ ތަންތަން ހިންގުމުގެ ކުށުގެ ނަމުގައި މާއްދާއަކާއި ފައިނޭންސްކުރުމަކީ ވެސް ވަކި ކުށެއް ކަމަށް އިތުރުކޮށް ބޮޑެތި އަަދަބުތަކެއް ހިމަނާފަ އެވެ.
