މުއިއްޒުގެ ކުރިމަތީގައި ޚާމަނާއީ އަކީ އިސްލާމީ ގައުމެއްގެ ލީޑަރަކަށް ވެސް ނުވި
އީރާނުގެ އެންމެ އިސް ލީޑަރު އަވަހާރަކޮށްލުމާ ގުޅިގެން ދުނިޔޭގެ ގިނަ ގައުމުތަކުން ތައުޒިޔާ ކިޔަމުންދާއިރު، މުއިއްޒުގެ ސަރުކާރުން ހިމޭނުން އޮތް އިރު، މާޒީގައި އީރާނުގެ ލީޑަރުން އަވަހާރަވުމުން ރާއްޖޭގައި ހިތާމަ ފާޅުކޮށް ދިދަ ބައިދަނޑިއަށް ތިރިކޮށްފައިވާކަން ފާހަގަ ކުރެވޭ.
އީރާންގެ ރޫހާނީ ލީޑަރު ޚާމަނާއީ، އެމެރިކާގެ ހަމަލާ ތަކުގައި ޚާމަނާއީ އަވަހާރަ ވެފައިވާކަން ވަނީ ކަށަވަރު ވެފައި | ރޮއިޓާސް
އެމެރިކާގެ ރައީސް ޑޮނަލްޑް ޓްރަމްޕާއި އިޒްރޭލުން އީރާނަށް ދޭން ފަށާފައިވާ ނުރައްކާތެރި އަދި ޣައިރު ގާނޫނީ ހަމަލާތަކުގައި އެ ގައުމުގެ އެންމެ އިސް ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލުމާ ގުޅިގެން ދިވެހިރާއްޖޭގެ މުހައްމަދު މުއިއްޒުގެ ސަރުކާރުން ހިތާމައިގެ އެއްވެސް ފިޔަވަޅެއް އަޅާފައި ނުވާއިރު އެކަމަށް އެއްވެސް އެއްޗެކޭ ވެސް ބުނެފައި ނުވާތީ ގިނަ ބައެއްގެ ފާޑު ކިޔުން އަމާޒުވެއްޖެ އެވެ.
މީސް މީޑިއާ ގައި ފާޑުކީ ފަރާތްތަކުން ފާހަގަ ކުރާ ގޮތުގައި އިސްލާމީ ގައުމުތައް ނޫން ގައުމުތަކުން ވެސް އީރާނުގެ ލީޑަރު އަވަހާރަވި ހާދިސާ ކުށްވެރިކޮށް އަދި އީރާނުގެ ރައްޔިތުންނަށް ތައުޒިޔާ ކިޔާފައިވެ އެވެ.
އަނެއްކޮޅުން ރައީސް މައުމޫނުގެ ވެރިކަމުގައި، 31 އޮގަސްޓް 1981 ގައި އީރާނުގެ އޭރުގެ ރައީސް އާއި ބޮޑު ވަޒީރު އަވަހާރަވި ހާދިސާ އާ ގުޅިގެން ދިވެހި ދިދަ ބައިދަނޑިއަށް ތިރިކޮށްފައިވެއެވެ.
އެ ތާރީޚުގައި ރައީސް އޮފީހުން ނެރުނު ދެންނެވުމުގައި ބުނެފައިވަނީ އިރާނުގެ ރައީސް މުހައްމަދު އަލީ ރަޖާއީ އާއި އެ ގައުމުގެ ބޮޑުވަޒީރު މުހައްމަދު ޖަވާދު ބޮހޯނާ އަވަހާރަވުމުގެ ހިތާމަވެރި ޚަބަރު ލިބުމާ ގުޅިގެން ސަރުކާރުގެ ތަންތާނގެ ދިދަ 1 ސެޕްޓެމްބަރު 1981 ވީ ދުވަހުގެ ހެނދުނު 6ން ހަވީރު 6ށް ބައިދަނޑިއަށް ތިރި ކުރުމަށް ރައީސުލްޖުމްހޫރިއްޔާ ވިދާޅުވި ކަމަށެވެ.
އެމެރިކާ އާއި އިޒްރޭލުން މެދުއިރުމަތި ކޮންޓްރޯލުން ނެއްޓިފައިވާ ބޮޑު ހަމަނުޖެހުމެއްގެ ތެރެއަށް ވައްޓާލުމުގެ ސަބަބުން، ދުނިޔެއަށް، ހާއްސަކޮށް އެ ސަރަހައްދުގެ ގައުމުތަކަށް ކުރިމަތިވަމުންދާ ނުރައްކާތަކާ ދެކޮޅަށް ވަރަށް ގިނަ ގައުމުތަކުން ވަނީ އަޑު އުފުލާފަ އެވެ.
