ޕާކިސްތާނުގެ އިސްލާމްއާބާދު ގައި ކާރު ބޮމެއް ގޮއްވާލައިފި، 12 މީހުން މަރުވެއްޖެ
އިސްލާމްއާބާދު ކޯޓެއްގެ ބޭރުގައި ހިނގި ސުއިސައިޑް ބޮމުގެ ހަމަލާއިން 12 މީހުން މަރުވެ 27 މީހުން ޒަހަމްވި ކަމަށް އިންޓީރިއަރ މިނިސްޓަރ ވިދާޅުވި.
ޕާކިސްތާނުގެ އިސްލާމްއާބާދުގެ ކޯޓު ކޮމްޕްލެކްސް އެއްގެ ބޭރުގައި ކާރު ބޮމެއް ގޮއްވާލި މަންޒަރު
އިސްލާމްއާބާދުގައި ކާރެއްގައި މީހަކު ދިން ޖާނުން ފިދާވުމުގެ ހަމަލާ އެއްގައި 12 މީހުން މަރުވެއްޖެ އެވެ.
ހާދިސާ ހިނގީ އަންގާރަ ދުވަހު ޕާކިސްތާނުގެ ވެރިރަށް އިސްލާމްއާބާދު ގައި ހުންނަ ކޯޓެއްގެ ބޭރުގަ އެވެ. ހަމަލާ ގައި 12 މީހުން މަރުވެ، މަދުވެގެން 27 މީހުން ޒަހަމްވެފައިވާ ކަމަށް އެ ގައުމުގެ އިންޓީރިއާ މިނިސްޓަރު ވިދާޅުވި އެވެ.
އިންޓީރިއާ މިނިސްޓަރ މުހްސިން ނަގްވީ ވިދާޅުވީ، ހާދިސާ ހިނގީ އަންގާރަ ދުވަހު އެތާ ގަޑިން މެންދުރު 12:30 ހާ އިރު ކަމަށެވެ. އަދި ހަމަލާ ދޭން އުޅުނު މީހާ ކޯޓަށް ވަންނަން އުޅުނު ކަމަށާއި، އެހެން ނަމަވެސް ބޮން ގޮއްވާލީ ކޯޓުން ބޭރުގައި ކަމަށެވެ.
ނަގްވީ ވިދާޅުވީ ބޮން ގޮއްވާލި މީހާ ދެނެގަތުމުގެ މަސައްކަތް އޮފިޝަލުން ވަރަށް އިސްކަން ދީގެން ކުރިއަށް ގެންދާނެ ކަމަށާއި، މި ކަމުގައި ބައިވެރިވި މީހުން އިންސާފުގެ ކުރިމައްޗަށް ގެންނާނެ ކަމަށެވެ.
އިސްލާމްއާބާދު ގައި ޖާނުން ފިދާވުމުގެ ބޮމުގެ ހަމަލާތައް ހިންގާތާ މިހާރު ގިނަ އަހަރުތަކެއް ވެއްޖެއެވެ.
ޒަހަމްވި 27 މީހުންނަށް ފަރުވާދެމުން އަންނަ ކަމަށް ނަގްވީ ވިދާޅުވި އެވެ.
ޕާކިސްތާނުގެ ރައީސް އާސިފް އަލީ ޒަރްދާރީ ވިދާޅުވީ "ޖާނުން ފިދާވުމުގެ ބޮމުގެ ހަމަލާ ވަރަށް ބޮޑަށް ކުށްވެރި ކުރައްވާ" ކަމަށެވެ.
ބާރުގަދަ ގޮވުމުގެ އަޑު ވަރަށް ދުރަށް އިވުނު ކަމަށް ވެއެވެ. އެ ސަރަހައްދުގައި ހުރި އެތައް އުޅަނދަކަށް ބޮޑެތި ގެއްލުންތައް ވެފައިވާ ކަމަށް ރިޕޯޓުު ކޮށްފައި ވެއެވެ. ބޮން ގޮއްވާލީ، ކޯޓުގެ ޝަރީއަތްތަކަށް ގިނަ ބަޔަކު އަންނަމުން ދިޔަ ގަޑިއެއް ގައެވެ.
މި ގޮއްވާލުމުގެ ޒިންމާ އެއްވެސް ފަރާތަކުން އަދި އުފުލާފަ އެއް ނުވެއެވެ.
