ނިންމުން ބަދަލުކޮށް، އިންޑިއާ މެޗު ކުޅެން ޕާކިސްތާން އިން ނިންމައިފި

މިހާރު ކުރިއަށްދާ ޓީ20 ވޯލްޑް ކަޕްގައި އިންޑިއާއާ ދެކޮޅަށް ކުޅެން އޮތް މެޗު ނުކުޅޭނެ ކަމަށް ނިންމި ނިންމުން ބަދަލުކޮށް، އެ މެޗު ކުޅުމަށް ޕާކިސްތާންގެ ސަރުކާރުން ނިންމައިފި އެވެ.

މުބާރާތުގައި އިންޑިއާ އާއި ޕާކިސްތާން ބައްދަލު ކުރާ މެޗު އޮތީ ފެބްރުވަރީ މަހުގެ 15 ވާ އާދީއްތަ ދުވަހު އެވެ. މީގެ ކުރިން ޕާކިސްތާންގެ ސަރުކާރުން ނިންމާފައި ވަނީ، އެ ޤައުމުން އެ މެޗު ނުކުޅޭ ގޮތަށެވެ. 

އެކަން ހާމަކޮށް ހޯމަ ދުވަހު ޕާކިސްތާންގެ ސަރުކާރުން ނެރެފައިވާ ބަޔާނެއްގައި ބުނެފައި ވަނީ، 2026 ވަނަ އަހަރުގެ ފެބްރުވަރީ މަހުގެ 15 ވަނަ ދުވަހު، އައިސީސީ ފިރިހެން ޓީ20 ވޯލްޑް ކަޕްގައި ޕާކިސްތާން އިން ކުޅުމަށް ހަމަޖެހިފައިވާ މެޗަށް ނިކުންނަަން ސަރުކާރުން އަންގާ ކަމަށެވެ. 

ޕާކިސްތާންގެ ސަރުކާރުން މި ނިންމުން އިއުލާން ކޮށްފައި ވަނީ، ޕާކިސްތާންގެ ކްރިކެޓު ބޯޑުގެ ރައީސް މުހްސިން ނަގްވީ، އެ ޤައުމުގެ ބޮޑު ވަޒީރު ޝެހްބާޒް ޝަރީފްއާ ބައްދަލު ކުރެއްވި ފަހުންނެވެ. އެ ބައްދަލުވުމުގައި ވަނީ އައިސީސީ އާއި، ބަންގްލަދޭޝް ކްރިކެޓު ބޮޑުގެ ފަރާތްތަކާ އެކު ބޭއްވި ބައްދަލުވުމުގެ ނަތީޖާ ވެސް ހިއްސާ ކޮށްފަ އެވެ. 

އައިސީސީގެ އިސް އޮފިޝަލުން ވަނީ އާދީއްތަ ދުވަހު ބަންގްލަދޭޝް ކްރިކެޓު ބޯޑުގެ ރައީސް އަމީނުލް އިސްލާމް އާއި، ނަގްވީއާ ބައްދަލު ކޮށްފަ އެވެ. އެެއީ މެޗު ބޮއިކޮޓް ނުކޮށް، އެ މެޗު ކުޅުމަށް ޕާކިސްތާން އެއްބަސް ކުރުމަށް ބޭއްވި ބައްދަލުވުމެކެވެ. 

ޕާކިސްތާންގެ ސަރުކާރުން ބުނެފައި ވަނީ، އެ ނިންމުން ނިންމީ ބްންގްލަދޭޝް ކްރިކެޓު ބޯޑާއި، ސްރީ ލަންކާ އާއި، އެކުވެރި ޢަރަބި އިމާރާތް އަދި އެހެނިހެން ޤައުމު ތަކުގެ އެދުމަށް ރިއާޔަތް ކުރުމަށް ފަހު ކަމަށެވެ. މީގެ އިތުރުން ސްރީ ލަންކާގެ ރައީސް އަނޫރާ ކުމާރާ ޑިސަނަޔަކެ ވެސް ވަނީ ޕާކިސްތާންގެ ބޮޑު ވަޒީރަށް ގުޅުއްވައި، އެ ޤައުމުގެ ނިންމުން ބަދަލު ކުރެއްވުމަށް އެެދިވަޑައިގެންފަ އެވެ. 

ޕާކިސްތާން އިން ޓީ20 ވޯލްޑް ކަޕްގެ ހުރިހާ މެޗު ތަކެއް ކުޅުމަށް ހަމަޖެހިފައި ވަނީ ސްރީ ލަންކާގަ އެވެ. މިއަހަރުގެ މުބާރާތް ބާއްވަނީ އިންޑިއާ އާއި، ސްރީ ލަންކާ ގުޅިގެންނެވެ. އެ މެޗު ކެންސަލް ވެއްޖެ ނަމަ، ފަތުރުވެރި ކަމަށް ބަރޯސާވެފައި އޮންނަ ސްރީ ލަންކާ އަށް ވަރަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށް ވަނީ ބެލެވިފަ އެވެ. 

ޕާކިސްތާންގެ ނިންމުން ބަދަލު ކުރުމުގެ ކުރިން، އައިސީސީ އިން ބުނެފައި ވަނީ މިއަހަރުގެ މުބާރާތުން ބަންގްލަދޭޝް ބޭރު ކުރަން ޖެހުމަކީ ހިތާމަ ހުރި ކަމެއް ކަމަށެވެ. އިންޑިއާގައި މެޗުތައް ކުޅުމަށް ބަންގްލަދޭޝް އިން އިންކާރު ކުރި މައްސަލައިގައި، ގިނަ މަޝްވަރާ ތަކަށް ފަހު ވެސް ޙައްލެއް ލިބިފައި ނުވެ އެވެ. އެންމެ ފަހުން އައިސީސީ އިން ނިންމީ ބަންގްލަދޭޝްގެ ބަދަލުގައި ސްކޮޓްލެންޑަށް މުބާރާތުން ފުރުސަތު ދިނުމަށެވެ. 

އެއާ އެކު އައިސީސީ އިން ބުނެފައި ވަނީ ބަންގްލަދޭޝް އަށް އަދަބެއް ނުދޭނެ ކަމަށެވެ. އަދި 2031 ވަނަ އަހަރުގެ ކުރިން، ބަންގްލަދޭޝްގައި އައިސީސީގެ މުބާރާތެއް ބާއްވާނެ ކަމަށް ވެސް ބުނެފައިވެ އެވެ.