ފ. އަތޮޅު ކައުންސިލުން ސައިފަތް އުފައްދާގޮތާއި އަތޮޅު ފިހާރައަށް މުދާ ގަންނަން ލަންކާ އަށް ކުރި ދަތުރަކީ ބޭކާރު ހަރަދެއް: އޮޑިޓް

ފ. އަތޮޅު ކައުންސިލުން ސައިފަތް އުފައްދާގޮތުގެ މަސައްކަތާއި ފަތްޕިލާވެލީގެ ބޭސްވެރިކަން ކުރުމުގެ މަސައްކަތް ބެލުމަށް ސްރީ ލަންކާ އަށް ކުރި ދަތުރަކީ ކައުންސިލް އިދާރާއިން ކުރަމުންގެންދާ މަސައްކަތްތަކާއި ގުޅުންހުރި ކަންކަން ކަންކަން ނޫން ކަމަށާއި، އެއި ކުރި ބޭކާރު ހަރަދެއް ކަމަށް އޮޑިޓް ރިޕޯޓުގައި ބުނެފި އެވެ. 

2024 ވަނަ އަހަރުގެ ކޮމްޕްލަޔަންސް އޮޑިޓުގައި ބުނެފައިވަނީ ހަރަދު ކުޑަކުރުމަށް އަންގާފައިވާ ސަރކިއުލާފގައި ރާއްޖެއިން ބޭރުން ހުރިހާ ހަރަދެއް ލިބޭ ކުރުމުއްދަތުގެ ކޯސްތަކާއި ޓްރެއިނިންގތައް ފިޔަވައި އިތުރު އެއްވެސް ޓްރެއިނިންގ ޕްރޮގްރާމެއް ކުރިއަށް ނުގެންދިއުމަށް އިރުޝާދު ދީފައިވާ ކަމަށެވެ. އަދި ކައުންްސިލްތަކުން ވެސް ބްލޮކްގްރާންޓް އަދި އަމިއްލަ އާމްދަނީ ފައިސާއިން ހަރަދު ކުރުމުގައި ސަރކިއުލާގައި ބަޔަންކޮށްފައިވާ ކަންކަމަށް ރިއާޔަތްކޮށް ހަރަދުތައް ބައްޓަންކުރުމަށާއި ކައުންސިލްގެ ބަޖެޓުގެ ތެރެއިން ހަރަދުތައް ހަމަޖައްސައި، ހަރަދުތަކުގެ އެފިޝިއަންސީ މަތިކުރުމަށް ސަމާލުކަން ދިނުމަށް ބަޔާންކޮށްފައިވާ ކަމަށެވެ. 

ނަމަވެސް ފ. އަތޮޅު ކައުންސިލް އިދާރާއިން 2024 ވަނަ އަހަރު ސްރީލަންކާ އަށް ކޮށްފައިވާ ދަތުރުގެ ހަރަދުތައް ކުރުމުގައި މިނިސްޓްރީ އޮފް ފިނޭންސުން ދީފައިވާ އިރުޝާދާ އެއްގޮތަށް އަމަލުކޮށްފައި ނުވާކަމަށެވެ. މިގޮތުން އަތޮޅު ކައުންސިލްގެ އިދާރާ ތަމްސީލު ކުރާ 2 މެންބަރުންނާއި ސެކްރެޓަރީ ޖެނެރަލްއާއި 17 އިދާރީ މުވައްޒަފުން ހިމެނޭ ގޮތަށް ޖުމްލަ 20 މުވައްޒަފުން ސެޕްޓެމްބަރު 6 އިން 13 ސްރީލަންކާ އަށް 8 ދުވަހުގެ ތަޖުރިބާ ދަތުރެއް ކޮށްފައިވާއިރު، މި ދަތުރަށް ހިނގާނޭ ހަރަދުގެ ފައިސާ ލިބޭނޭ އެހެންގޮތްތަކެއް ހޯދުމަކާއި ނުލާ ކައުންސިލްގެ ބަޖެޓުން 140،971 ރުފިޔާ ހަރަދު ކޮށްފައިވާ ކަމަށެވެ. 

މި ދަތުރުގެ ދަތުރު ރިޕޯޓުގައި މި ދަތުރުގެ މަގްސަދަކީ، މަސައްކަތާއި ގުޅޭ ތަޖުރިބާ ހޯދުމާއި މުވައްޒަފުންގެ މެދުގައި ގުޅުން ބަދަހިކޮށް އެކުވެރިކަން އާޅަކުރުން ކަމަށް ބަޔާންކޮށްފައިވެ އެވެ. އަދި ދަތުރުގައި ތަޖުރިބާ ހޯދުމަށް ކޮށްފައިވާ ކަންތައްތަކުގެ ތެރޭގައި ސައިފަތް އުފައްދާގޮތުގެ މަސައްކަތްތަކާއި އަޔުރްވެދިކް ބޭސްވެރިކަމުގެ މަސައްކަތް ކުރާގޮތް ބަލާފައި ވުމާއި، ފ. އަތޮޅު ސްޓޯރަށް ބޭނުންވާ މުދާ ގަތުމާއި އަދި ކޮލަންބޯގައި ހުންނަ ދިވެހިރާއްޖޭގެ ހައި ކޮމިޝަނަށް ޒިޔާރަތްކޮށް ފޮރިން ސަރވިސްގެ މަސައްކަތްތަކައި ގުޅޭގޮތުން މައުލޫމާތު ހޯދާފައިވާ ކަމަށް ދަތުރު ރިޕޯޓުގައި ބަޔާންކޮށްފައިވެ އެވެ. 

އޮޑިޓުގައި ބުނީ މި ކަންތައްތަކަކީ ކައުންސިލް އިދާރާއިން ކުރަމުން ގެންދާ މަސައްކަތްތަކާއި ގުޅުންހުރި ކަންކަން ނޫން ކަމަށެވެ.