މީހުންނަށް އުނދަގޫ ކުރާ ރާމާމަކުނު ބަންދު ކުރަން ސްރީ ލަންކާ ގައި ޑިޓެންޝަން ސެންޓަރުތަކެއް ހަދަނީ
11 ފެބުރުއަރީ 2026 | ބުދަ 17:50ސެންޓަރުގައި ބަންދު ކުރާ ރާމާމަކުނުގެ އާބާދީ ކޮންޓްރޯލް ކުރުމަށްޓަކައި އަންހެން ރާމާމަކުނުތައް މާބަނޑުވުން ހުއްޓުވުމުގެ އައު ޕްރޮސީޖަރެއް ވެސް ތައާރަފުކުރުމަށް ވަނީ ނިންމާފައި.
3 މާރިޗު 2016 ގައި ނަގާފައިވާ މި ފޮޓޯ އިން ފެންނަނީ ސްރީލަންކާގެ ކޮލަމްބޯ ކައިރީގައި ހުންނަ ދެހިވަލަ ޒޫ ގައި ބަންދު ކޮށްފައިވާ އެފްރިކަން ޗިމްޕަންޒީއެއް. | ގެޓީ އިމޭޖަސް
މީހުންނަށް އުނދަގޫ ކުރާ ރާމާމަކުނު ބަންދު ކުރަން ސްރީލަންކާ ގައި ޑިޓެންޝަން ސެންޓަރުތަކެއް ހަދަން ސަރުކާރުން ނިންމައިފި އެވެ.
މި ގޮތުން ހަދާ ފުރަތަމަ ރާމާމަކުނު ބަންދުކޮށްފައި ބައިތިއްބާ މަރުކަޒު ގާއިމުކުރުމަށްޓަކައި، އެ ގައުމުގެ މަޓަލެ ޑިސްޓްރިކްޓްގެ ކަލުގަންގާ ރިޒަވޮޔާ ކައިރިން ބިމެއް ޑިޕާޓްމަންޓް އޮފް ވައިލްޑްލައިފް ކޮންޒަވޭޝަން (ޑީ.ޑަބްލިއު.ސީ) އިން ކަނޑައަޅައިފި ކަމަށް އެ ގައުމުގެ މީޑިއާ ރިޕޯޓުތައް ބުނެފައިވެ އެވެ.
ވައިލްޑްލައިފް ކޮންޒަވޭޝަން އޮފިސަރު ޗަމަތު ލަކްޝްމަން ޕެރޭރާ "ޑެއިލީ މިރަރ" ނޫހަށް މައުލޫމާތު ދެއްވަމުން ވިދާޅުވީ، 150 އޭކަރުގެ ބިމެއްގައި ތަރައްގީކުރާ މި މަރުކަޒުގައި ފެނާއި، ކާނާ އަދި ސަލާމަތީ ވަސީލަތްތައް ގާއިމުކުރެވޭނެ ކަމަށެވެ. މި މަޝްރޫއަކީ ޑިޕާޓްމަންޓް އޮފް ވައިލްޑްލައިފް ކޮންޒަވޭޝަންގެ ލަފާގެ މަތިން، މަޓަލެ ޑިސްޓްރިކްޓް ޑިވެލޮޕްމަންޓް ކޮމިޓީގެ ހުއްދައާއެކު ކުރިއަށްގެންދާ މަޝްރޫއެކެވެ.
"މި މަރުކަޒު ބިނާކުރާނީ އެތަނުގައި ބައިތިއްބާ ރާމާމަކުނުތައް އަލުން ޖަންގަލީގެ ތެރެއަށް ފިލައިގެން ނުދެވޭނެ ފަދަ ވަރުގަދަ ސަލާމަތީ ފިޔަވަޅުތަކާއެކު. މި ސަރަހައްދަކީ ގުދުރަތީ ގޮތުން ކާނާ ލިބެން ހުރި ތަނެއް ނަމަވެސް، ބޭނުންވެއްޖެ ހާލަތެއްގައި އިތުރު ކާނާ ވެސް ފޯރުކޮށްދެވޭނެ. މި މަޝްރޫއުގެ މައިގަނޑު ބޭނުމަކީ އެ ސިޓީގެ ރައްޔިތުންނަށް އުނދަގޫ ކުރަމުންދާ ރާމާމަކުނުތައް ހިފައި، ރައްކާތެރިކަމާއެކު މި މަރުކަޒަށް ބަދަލުކުރުން،" ޕެރޭރާ ވިދާޅުވި އެވެ.
މީގެ އިތުރުން، ސެންޓަރުގައި ބަންދު ކުރާ ރާމާމަކުނުގެ އާބާދީ ކޮންޓްރޯލް ކުރުމަށްޓަކައި އަންހެން ރާމާމަކުނުތައް މާބަނޑުވުން ހުއްޓުވުމުގެ އައު ޕްރޮސީޖަރެއް ވެސް ތައާރަފުކުރުމަށް ވަނީ ނިންމާފަ އެވެ. ޕެރޭރާ އިތުރަށް ވިދާޅުވީ، މޫސުމީ ސަބަބުތަކާ ހުރެ އެއް ޕްރޮވިންސުން އަނެއް ޕްރޮވިންސަށް ރާމާމަކުނު ބަދަލުކުރުމަކީ ދަތި ކަމަކަށް ވާތީ، ސްރީލަންކާގެ ނުވަ ޕްރޮވިންސެއްގައި މިފަދަ ނުވަ މަރުކަޒު ގާއިމުކުރުމަށް ރާވާފައިވާ ކަމަށެވެ.
މީހުން ދިރިއުޅޭ ސިޓީގެ ސަރަހައްދުތަކުގައި އުނދަގޫކުރާ ރާމާމަކުނުތައް ބަދަލުކުރާނީ އަލަށް ބިނާކުރާ މި މަރުކަޒަށެވެ.
ޕެރޭރާ ފާހަގަކުރެއްވި ގޮތުގައި މެލޭޝިއާ ފަދަ ބައެއް ގައުމުތަކުގައި މިހާރުވެސް މިފަދަ ރާމާމަކުނު ބަންދުކުރާ މަރުކަޒުތައް ދަނީ ހިންގަމުންނެވެ.
މަސްދަރު: ޑެއިލީ މިރަރ
