އާމްދަނީ އަށް ވުރެ ޚަރަދު ބޮޑުވާތީ، ފޫބައްދަން ސަރުކާރުން 1.16 ބިލިއަން ރުފިޔާގެ ޓީ-ބިލް ވިއްކަން ހުޅުވާލައިފި
ސަރުކާރުގެ ކުރު މުއްދަތުގެ ޚަރަދުތައް ހަމަޖެއްސުމަށްޓަކައި 1.16 ބިލިއަން ރުފިޔާ ހޯދުމަށް ހަތަރު މުއްދަތަކަށް ބަހާލައިގެން ޓީ-ބިލް ވިއްކަން ފިނޭންސް މިނިސްޓްރީން ވަނީ ހުޅުވާލާފައި. މީގެ ތެރެއިން އެންމެ ބޮޑު ބައެއް ހިއްސާކުރަނީ 4.60 އިންސައްތައިގެ އިންޓްރެސްޓް ރޭޓުގައި އެއް އަހަރު ދުވަހުގެ މުއްދަތަށް ވިއްކާ 759.4 މިލިއަން ރުފިޔާގެ ޓީ-ބިލު. މި ފިޔަވަޅަކީ ދައުލަތުގެ ކޭޝްފްލޯ މެނޭޖްކުރުމަށާއި އެތެރޭގެ ބާޒާރުން ފައިސާ ހޯދުމަށް ކުރާ މަސައްކަތުގެ ތެރޭގައި ހިމެނޭ ކަމެއް.
ދިވެހި ރުފިޔާގެ ބޭންކް ނޫޓެއް. | އައިސްޓޮކް
ސަރުކާރުގެ ވަގުތުން ބޭނުންވާ ޚަރަދުތައް ހަމަޖެއްސުމަށްޓަކައި، 1.16 ބިލިއަން ދިވެހި ރުފިޔާއަށް ވުރެ ބޮޑު އަދަދެއް ހޯދުމަށް ޓްރެޜަރީ ބިލް (ޓީ-ބިލް) ވިއްކަން ހުޅުވާލައިފިއެވެ.
ރައީސް މުއިއްޒުގެ ސަރުކާރުން ޓީ-ބިލު ވިއްކައިގެން އާމްދަނީ ހޯދުމަށް ޢާއްމުގޮތެއްގައި ބަރޯސާވަމުންދާއިރު، އެކަމުން ދޭހަކޮށްދެނީ ޓެކްސް އާއި އެހެނިހެން ގޮތް ގޮތުން ލިބޭ އާމްދަނީ އަށް ވުރެ ޚަރަދުތައް އިތުރުވެފައިވުން ކަމުގައި ތަޖުރިބާކާރުން ދެކެ އެވެ.
މިނިސްޓްރީ އޮފް ފައިނޭންސް އެންޑް ޕްލޭނިންގް އިން އާންމުކޮށްފައިވާ ޓީ-ބިލް ގަތުމުގެ ދައުވަތުގައިވާ ގޮތުން، 28 ދުވަސް، 98 ދުވަސް، 182 ދުވަސް އަދި 364 ދުވަހުގެ މުއްދަތުން އަނބުރާ ދައްކާ ގޮތަށް ހަތަރު ސީރީޒެއްގެ ބިލް ވަނީ ހުޅުވާލާފައެވެ. މީގެ ތެރެއިން އެންމެ ބޮޑު ބައެއް ހިއްސާކުރަނީ 4.60 އިންސައްތައިގެ އިންޓްރެސްޓް ރޭޓުގައި، 2027 ވަނަ އަހަރުގެ ފެބްރުއަރީ މަހަށް މުއްދަތު ހަމަވާ ގޮތަށް ހުޅުވާލާފައިވާ 759.4 މިލިއަން ރުފިޔާގެ 364 ދުވަހުގެ ޓީ-ބިލެވެ.
މީގެ އިތުރުން 3.50 އިންސައްތައިގެ އިންޓްރެސްޓް ރޭޓުގައި ވިއްކާ 300 މިލިއަން ރުފިޔާގެ 28 ދުވަހުގެ ބިލަކާއި، 3.87 އިންސައްތައިގެ އިންޓްރެސްޓްގައި ވިއްކާ 50.01 މިލިއަން ރުފިޔާގެ 98 ދުވަހުގެ ބިލުގެ އިތުރުން، 4.23 އިންސައްތައިގެ އިންޓްރެސްޓްގައި ވިއްކާ 57 މިލިއަން ރުފިޔާގެ 182 ދުވަހުގެ ބިލެކެވެ.
މި ޓީ-ބިލްތައް ވިއްކުމަށް ހަމަޖެހިފައިވަނީ 22 ފެބްރުއަރީ 2026 ގައެވެ. އަދި ފައިސާ ދައްކާ ޚަލާސްކުރަންޖެހޭނީ އޭގެ އަނެއް ދުވަހުއެވެ. ރަމަޟާން މަހާ ގުޅިގެން ޓީ-ބިލުގެ މުއާމަލާތްތައް ކުރާ ގަޑިތަކަށް ވަނީ ބަދަލު ގެނެސްފައެވެ.
ޓީ-ބިލަކީ ސަރުކާރުގެ ގެރެންޓީ އޮންނަ އެއްޗަކަށް ވާތީ، މިއީ އިންވެސްޓަރުންގެ އިތުބާރު އޮތް ރައްކާތެރި އިންވެސްޓްމަންޓެއްގެ ގޮތުގައި ބެލޭ އެއްޗެކެވެ. ސަރުކާރަށް ލިބޭ ޓެކްސްގެ އާމްދަނީއާއި އެހެނިހެން އާމްދަނީ އާ ކުރަންޖެހޭ ހަރަދުތައް ނުބައްދަލު ހާލަތްތަކުގައި، ފައިސާގެ ދަތިކަން ހައްލުކޮށް ކޭޝްފްލޯ މެނޭޖްކުރުމަށް ޓީ-ބިލް ވިއްކާ އިރު، އާއްމުކޮށް އާމްދަނީ ހޯދުމަށް ޓީ-ބިލަށް ބަރޯސާ ވުމުން ދިގު މުއްދަތުގެ ފައިސާ މެނޭޖް ކުރުމާއި އާމްދަނީ ހޯދުމުގެ ތަސަރައްވުރެއް ގެންގުޅުމުގެ ބަދަލުގައި ކުރު މުއްދަތުގައި އަވަހަށް ފައިސާ ހޯދައިގެން ކަންކަން ފޫބައްދަން ސަރުކާރުން އިސްކަން ދޭކަން ހާމަވެ އެވެ. ޓީ-ބިލަކީ މުސާރަ ދިނުމާއި، ދިފާއީ ކަންކަމާއި، އަދި އުމްރާނީ ތަރައްގީގެ މަޝްރޫއުތަކަށް އަވަހަށް ދަރަންޏަށް ފައިސާ ހޯދުމަށް ބޭނުން ކުރާ މާލީ ވަސީލަތެކެވެ.
