ފިސްކަލް ޒިންމާގެ ޤާނޫނަށް އަމަލު ނުކެރެވޭނެކަން ރޭކާލީ ނޭވާހޮޅިއަށް އެޅުނީމަ؟
ފިސްކަލް ޒިންމާގެ ޤާނޫނުގެ ދަށުން އެކުލަވާލަން ޖެހޭ، މާލީ ޒިންމާގެ ޗާޓަރު އެކުލަވާލަން ޖެހޭ މުއްދަތު މަވާން ކުޑަތަން ވެފައި ވަނިކޮށް، އެ ޗާޓަރު އެކުލަވާލުން 2 އަހަރަށް ފަސްކުރުމަށް އިސްލާހު ހުށަހަޅާފައިވާ އިރު މި ޤާނޫނަށް އަމަލުކުރަން ފެށިތާ އަދި މިވީ ކުޑަ ދުވަސްކޮޅެކެވެ. މިހާ އަވަހަށް މި ބަދަލުތައް ގެނައުމުން އެނގެނީ ހިންގުންތެރިކަމެއް ނެތްކަމެވެ.
ފިސްކަލް ޒިންމާގެ ޤާނޫނަށް އަމަލުކުރަން ފެށިތާ އަހަރެއް ނުވަނީސް ސަރުކާރުން އެ ޤާނޫނަށް އިސްލާހު ގެނައުމަށް މަސައްކަތްކުރަން ފެށިއެވެ
ރައީސް ޑރ.މުހައްމަދު މުއިއްޒު އަދި ފިނޭންސް މިނިސްޓަރ މޫސާ ޒަމީރު
ފިސްކަލް ޒިންމާ ގެ ޤާނޫނަކީ މިދިޔަ ޑިސެމްބަރު މަހު ތަސްދީގު ކުރި ޤާނޫނެކެވެ. އެ ދުވަހު ރައްޔިތުން ގެ މަޖިލީހުގައި ދެއްކި ވާހަކަ އަކީ މި ޤާނޫނާއި އެކު މި ސަރުކާރު މާލީ ގޮތުން ދެފުށް ފެންނަ ސަރުކާރެއް ގެ މިސާލު ޤާއިމްކުރާނެ ވާހަކަ އެވެ. އެއްވާނަކަށް ކީ ޅެމަކީ ކަންކަން ނުފޮރުވާނެ ކަމު ގެ ވާހަކަ އެވެ. އެމްޑީޕީ ސަރުކާރަށް ފާޑު ކިޔާ މި ސަރުކާރަށް ހުޝާމަދު ނުކުރާ މެމްބަރަކު އެ ދުވަހު މަޖިލީހުގައި މަދެވެ.
އެއްވާނަކަށް ރާސްލާފައި މި ޤާނޫނު ފާސްކުރި އިރު ހީވީ މިއީ މި ޤައުމު ގެ މާލީ ކުރިމަގު ބަދަލު ކޮށްލުމު ގެ ބިންގާހެންނެވެ. އަޅުގަނދު ވެސް ހުރި ނިކަން އުންމީދުތަކެއް އެހެންވީމަ ކޮށްގެންނެވެ.
އެކަމަކު ކަމަކު ދާކަށް ނެތެވެ. ކުއްލިއަކަށް މި ފެނުނީ ފިސްކަލް ޒިންމާ ގެ ޤާނޫނު ފާސްކުރިތާ އަހަރެއް ނުވަނީސް "ޗުކީ" ކިޔާފައި ބިލަށް އެއޮތީ އިސްލާހު ބަރި އެއް ފޮނުވާފަ އެވެ. ކީހާ ޅެންވީ ފަރިއްސަށެވެ. ކެނޑިހާ ފޮނި ދިޔައީ ޖައްވަށް، ހަވަޔަށް، ފަޒާ އަށެވެ.
އެ ޤާނޫނަށް އަމަލުކުރަން ފެށީ ޖޫން މަހު އެވެ. އެފަހުން އަދި މިއުޅެނީ ހަމަސް ދުވަސް ފުރިހަމަކޮށް ނުލެވިގެންނެވެ. އެ ގާނޫނުގައި ބުނާ ގޮތުން ފިސްކަލް ޒިންމާ ގެ ގާނޫނަށް އަމަލުކުރަން ފަށާތާ ހަ މަސްދުވަހު ގެ ތެރޭގައި ފިސްކަލް ޒިންމާ ގެ ޗާޓަރު އެކުލަވާލަން ޖެހޭނެ އެވެ. އެހެންނަމަވެސް އެކަމާއި ގުޅިގެން ކުރަން ޖެހޭ ކަންކަން ސަރުކާރުން މިހާތަނަށް ފުރިހަމަކޮށްފަ އެއް ނުވެ އެވެ.
އެކަން ކުރުމު ގެ ފަހު މުއްދަތަކީ އަންނަ ބުދަ ދުވަހު އެވެ. މި ހަފްތާގައި މި ފެނުނީ އިތުރު ޖަލްސާ އެއް ބާއްވައިގެން މި ޤާނޫނަށް އިސްލާހު ގެންނަ މަންޒަރެވެ. ނޭވާހޮޅިއަށް އެޅުމުން ތެޅިބާލާ މޭރުމުން ބިލު ފާސްކުރުމުން ދެން ވެސް ރައްޔިތު މީހާ ބުނަންވީ ހާދަހާވާ ރަނގަޅޭ ހާދަހާވާ މޮޅޭތޯ އެވެ؟
އިސްލާހު ހުށަހަޅީ ދައުލަތު ގެ ފިސްކަލް ޒިންމާ ގެ ގާނޫނު ގެ ދަށުން އެކުލަވާލަން ޖެހޭ ފިސްކަލް ޒިންމާ ގެ ޗާޓަރު އެކުލަވާލުމަށް ގާނޫނުގައި ކަނޑައަޅާފައިވާ މުއްދަތު އިތުރުކުރުމަށެވެ. އިސްލާހު ހުށަހަޅާފައި ވަނީ ފިސްކަލް ޒިންމާ ގެ ޗާޓަރު އެކުލަވާލުމު ގެ މުއްދަތު ދެ އަހަރަށް އިތުރުކުރުމަށެވެ. އެހެންކަމުން ދެން އެ ޗާޓަރު އެކުލަވާލަން ޖެހޭނީ 3 ޑިސެމްބަރު 2026ގަ އެވެ.
މިވަރަކުން ނިމުނީކީ ނޫނެވެ. އާ އިސްލާހުގައި ބުނެފައިވާ ގޮތުން، ޕަބްލިކް ސެކްޓަރ އިންވެސްޓުމެންޓު (ޕީއެސްއައިޕީ) ގެ ދަށުން ހިންގަން ރާވާ ޕްރޮގްރާމުތައް ބަޖެޓުގައި ހިމެނުމު ގެ ކުރިން އެ ޕްރޮގްރާމުތަކު ގެ ފީޒިބިލިޓީ ވަޒަންކޮށް، އެ ކަންކަމުން ލިބޭނެ ކަމަށް ލަފާކުރާ އިގްތިސޯދީ އަދި މާލީ މަންފާ އާއި އިޖުތިމާއީ މަންފާ އަދި ހަރަދުތަކާއި އެ ޕްރޮގްރާމުތަކުން ލިބިދާނެ ގެއްލުންތައް ދައުލަތު ގެ ފިސްކަލް ޕޮލިސީ ކަނޑައަޅާއިރު ފިނޭންސް މިނިސްޓަރު ވަޒަން ކުރަންޖެހޭނެ ކަމަށް ބުނެފައިވާ މާއްދާއަށް ވެސް އެ މުއްދަތުގައި އަމަލު ކުރާކަށް ނުޖެހޭނެ އެވެ.
އެހެންވީމަ ތިމާމެން މާ މޮޅު ފަރިހިތަކެއް ކިޔާފައި އަމިއްލަ އަށް ފާސްކުރި ޤާނޫނަށް ވެސް އަމަލު ނުކުރެވުނީ އެވެ. މީ ގެ ފަހަތުގައި އޮތީ ކޮން ކަމެއްތޯ އެނގޭނީ ސަރުކާރު ގެ އަމަލުތައް ދެން ބަލަން ތިބި ބަޔަކަށެވެ. ހަމަ ގައިމުވެސް ހިންގުންތެރިކަމު ގެ ކަންފުޅެއް ވެސް ހުރި ނަމަ ޤަނޫނުގައި ބުނާ ގޮތަށް އަމަލު ނުކޮށް ތިބެފައި މިހާ ހުތުރުކޮށް އަމަލުކުރާކަށް ނުޖެހުނީސްތާ އެވެ. ޤާނޫނުގައި ބުނާ މުއްދަތު ހަމަ ވާން ދެ ދުވަހަށް ވީމައި މަޖިލީހު ގެ މެޖޯރިޓީ ބޭނުންކޮށްގެން ހިތު ހުރި ގޮތަކަށް ކަންކަން ކުރާކަށް ނުޖެހުނީސްތާ އެވެ.
