ސަރުކާރުގެ ޚަރަދުތައް ހަމަޖައްސަން ޓީ-ބިލް ވިއްކައިގެން ކުރުމުއްދަތެއްގައި 1.8 ބިލިއަނަށް ވުރެ ގިނަ ރުފިޔާ ހޯދަނީ

ދައުލަތުގެ ޚަރަދުތައް ހަމަޖެއްސުމަށްޓަކައި ބޭނުންވާ ފައިސާ ހޯދުމަށް، ކުރު މުއްދަތުގެ ޓްރެޜަރީ ބިލް (ޓީ-ބިލް) ވިއްކައިގެން ރާއްޖޭގެ ބާޒާރުން 1.8 ބިލިއަން ރުފިޔާއަށްވުރެ ބޮޑު އަދަދެއް ހޯދުމަށް ސަރުކާރުން ނިންމައިފި އެވެ.

މިނިސްޓްރީ އޮފް ފައިނޭންސް އެންޑް ޕްލޭނިންގް އިން ނެރުނު އިޢުލާނެއްގައިވާ ގޮތުން، މި ޓީ-ބިލްތަކަށް އިއްޔެ ވަނީ ސަބްސްކްރައިބް ކުރުމުގެ ފުރުޞަތު ހުޅުވާލާފަ އެވެ. އަދި މި ބިލްތަކަށް ފައިސާ ދެއްކުމުގެ ކަންކަން ހޯމަ ދުވަހު ކުރިއަށްދާނެވއެވެ. މިފަހަރުގެ އިޝޫ ކުރި ޓީ-ބިލުގައި ހިމެނެނީ 28 ދުވަހާއި އެއް އަހަރާ ދެމެދުގެ މުއްދަތަކަށް ބަހާލެވިފައިވާ ބިލްތަކެކެވެ. މީގެ ތެރެއިން އެންމެ ބޮޑު ބައެއް ހިއްސާ ކުރަނީ ދިގު މުއްދަތުގެ ބިލްތަކެވެ.

ވިއްކުމަށް ހުޅުވާލި ޓީ-ބިލުގެ ތަފްޞީލަށް ބަލާއިރު، 3.50 އިންސައްތަ އިންޓްރެސްޓް ރޭޓުގައި 350 މިލިއަން ރުފިޔާގެ 28 ދުވަހުގެ ޓީ-ބިލާއި، 3.87 އިންސައްތަ އިންޓްރެސްޓް ރޭޓުގައި 31.03 މިލިއަން ރުފިޔާގެ 98 ދުވަހުގެ ޓީ-ބިލް ހިމެނެ އެވެ. މީގެ އިތުރުން 4.23 އިންސައްތަ އިންޓްރެސްޓް ރޭޓުގައި 245 މިލިއަން ރުފިޔާގެ 182 ދުވަހުގެ ޓީ-ބިލާއި، 4.60 އިންސައްތަ އިންޓްރެސްޓް ރޭޓުގައި 1.26 ބިލިއަން ރުފިޔާގެ 364 ދުވަހުގެ ޓީ-ބިލް ހިމެނެ އެވެ.

އެތެރޭގެ ދަރަނީގެ ގޮތުގައި ފައިސާ ހޯދުމަށް ވިއްކުމަށް ހުޅުވާލި ޓީ-ބިލުގެ ތަފްސީލަށް ބަލާއިރު އަވަހަށް ފައިސާ ހޯދުމަށް ސަރުކާރުން ބޭނުންވެފައިވާ މިންވަރު ހާމަވެ އެވެ.  

މި ޓީ-ބިލްތަކަށް އެދި ހުށަހަޅަންޖެހެނީ ކަނޑައެޅިފައިވާ ރަސްމީ ފޯމުތައް މެދުވެރިކޮށް، ކަނޑައެޅިފައިވާ ވަގުތުތަކުގައެވެ. އަދި ފައިސާ ދައްކަންޖެހޭ ދުވަހަށް ފައިސާ ނުދައްކައިފި ނަމަ، ކުރިއަށް އޮތް ތަނުގައި ސަރުކާރުގެ މިފަދަ މާލީ މުއާމަލާތްތަކުގައި ބައިވެރިވުމުގެ ފުރުޞަތު ގެއްލިދާނެ ކަމަށް ފައިނޭންސް މިނިސްޓްރީން ވަނީ ހާމަކޮށްފަ އެވެ.