ފިނޭންސް މިނިސްޓަރު ޒަމީރު ސާޖަރީއެއް ކުރައްވައިފި

ފިނޭންސް މިނިސްޓަރު މޫސާ ޒަމީރު ސާޖަރީއެއް ކުރައްވާފައިވާ ކަމަށް، ފިނޭންސް މިނިސްޓްރީ އިން ހާމަ ކޮށްފި އެވެ. 

ބުދަ ދުވަހު ފިނޭންސް މިނިސްޓްރީ އިން މީޑިއާ ތަކަށް ފޮނުވާފައިވާ ސްޓޭޓްމަންޓެއްގައި ބުނެފައި ވަނީ، އެއީ ދުރާލާ ކުރިން ރޭވިގެން ކޮށްފައިވާ ސާޖަރީއެއް ކަމަށެވެ. އަދި މިނިސްޓަރު ޒަމީރުގެ ސާޖަރީ ކާމިޔާބު ކަމަށާއި، މިވަގުތު މިނިސްޓަރުގެ ހާލު ކޮޅު ރަނގަޅު ކަމަށް ކަމަށް ވެސް ބުނެފައިވެ އެވެ. 

ފިނޭންސް މިނިސްޓްރީ އިން ބުނެފައި ވަނީ ސާޖަރީ އަށް ފަހު މިނިސްޓަރު ޒަމީރު އަންނަނީ ރިކަވަރީ ފުރިހަމަ ކުރައްވަމުން ކަމަށެވެ. އަދި އަންނަ ހަފުތާގެ ތެރޭގައި މިނިސްޓަރު ޒަމީރު އޮފީހަށް ނިކުންނަވާނެ ކަމަށް ލަފާ ކުރެވޭ ކަމަށް ވެސް ފިނޭންސް މިނިސްޓްރީ އިން ވަނީ ބުނެފަ އެވެ. 

ނަމަވެސް، މިނިސްޓަރު ޒަމީރު ސާޖަރީ ކުރައްވާފައި ވަނީ ކޮންކަމަކާ ގުޅިގެން ކަމެއް ހާމަ ކޮށްފައި ނުވެ އެވެ. އަދި ސާޖަރީ ކޮށްފައި ވަނީ ކޮށް ޤައުމެއްގައި ކަމެއް ވެސް ހާމަ ކޮށްފައި ނުވެ އެވެ. އެކި އެކި މަސްދަރު ތަކުން މައުލޫމާތު ލިބިފައިވާ ގޮތުގައި، މިނިސްޓަރު ޒަމީރު ސާޖަރީ ކުރައްވާފައި ވަނީ ސިންގަޕޫރުގަ އެވެ. 

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ވެރި ކަމުގައި އެންމެ ފުރަތަމަ ޒަމީރު އައްޔަން ކުރެއްވީ ފޮރިން މިނިސްޓަރުގެ މަގާމަށެވެ. ނަމަވެސް، ފަހުން ކެބިނެޓަށް ބަދަލު ގެންނަވައި ޒަމީރު ވަނީ ފިނޭންސް މިނިސްޓަރުގެ މަގާމަށް ބަދަލު ކުރައްވައިފަ އެވެ. ޒަމީރުގެ ބަދަލުގައި ފޮރިން މިނިސްޓަރަކަށް އައްޔަން ކުރެއްވީ، ކުރިން ހެލްތު މިނިސްޓަރަކަށް ހުންްނެވި ޑޮކްޓަރު ޢަބްދުﷲ ޚަލީލް އެވެ.

ޒަމީރު ކުރިން ވަނީ ހިތުގެ ފަރުވާ އަށް އެންޖިއޯޕްލާސްޓީ އެއް ހައްދަވާފައި ކަމަށް މައުލޫމާތު ލިބެއެވެ.