މެސީގެ އެއްބަސްވުމުގައި ސޮއިކުރީ އޭނާގެ ބައްޕަ: ބާސެލޯނާ

ބާސެލޯނާ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީގެ ފަރާތުން އާ އެއްބަސްވުމުގައި ސޮއިކުރީ އޭނާގެ ބައްޕަ ޖޯޖް ހޮރަސިއޯ މެސީ ކަމަށް އެ ކްލަބުގެ ރައީސް ޖޯސެފް މާރިއާ ބާޓެމިއު ވިދާޅުވެއްޖެއެވެ.

ބާސާގައި 2021 ވަނަ އަހަރުގެ ނިޔަލަށް މެސީ މަޑުކުރަން އެއްބަސްވެފައިވާކަމަށް އެ ކްލަބުން މިދިޔަ ޖުލައި މަހު ހާމަކޮށްފައިވާއިރު، އެ ކްލަބުން ބުނަމުންދިޔައީ ވަރަށް އަވަހަށް އެއްބަސްވުމުގައި މެސީ ސޮއިކުރާނެ ކަމަށެވެ.

އެހެންނަމަވެސް ބާސާގެ ރަސްމީ ވެބްސައިޓަށް ދިން އިންޓަވިއުއެއްގައި ބާޓެމިއު ވިދާޅުވީ، މެސީގެ އެއްބަސްވުމުގައި ސޮއިކުރީ އޭނާގެ ބައްޕަ ކަމަށާއި، މިހާރު ހަމައެކަނި ނުކުރެވި އޮތް ކަމަކީ ފޮޓޯއެއް ނެގުން ކަމަށެވެ.

މިކަމާ ގުޅިގެން މެސީ އަދި އޭނާގެ ބައްޕަވެސް އެއްވެސް ރަސްމީ އެއްޗެއް ބުނެފައިނުވާއިރު، ބާސާ އާއި މެސީއާ މެދު މައްސަލަ އުފެދިފައިވާ ކަމަށް ރިޕޯޓްތައް ބުނެއެވެ. އެގޮތުން އޭނާ އެ ކްލަބް ދޫކޮށް ޕްރިމިއާ ލީގުގެ މެންޗެސްޓާ ސިޓީއަށް ބަދަލުވާން އުޅޭކަމަށްވެސް ރިޕޯޓްތައް ބުނެއެވެ.

ދާދިފަހުން މެސީ ދިން އިންޓަވިއުއެއްގައި އޭނާ ބުނެފައިވަނީ، ކެރިއަރު ނިންމާލަން އޭނާ ބޭނުންވަނީ ބާސާގައި ކަމަށާއި، އެއީ އަބަދު ވެސް އޭނާ ދެކެމުން އައި ހުވަފެނެއް ކަމަށެވެ. ބާސެލޯނާގެ ޔޫތު އެކަޑަމީއިން ތަމްރީން ވެފައިވާ މެސީ ވަނީ މިހާތަނަށް އެ ކުލަބާއެކު ސްޕެނިޝް ލީގު 8 ފަހަރު، ސްޕެނިޝް ކަޕް 5 ފަހަރު، އަދި ޗެމްޕިއަންސް ލީގު 4 ފަހަރު ކާމިޔާބުކޮށްފައެވެ.